22. ágúst 2022 - Greiningardeild
Vikan framundan
- Í dag birta Reginn og Reitir uppgjör fyrir annan ársfjórðung.
- Á þriðjudag gefur Hagstofan út launavísitölu í júlí og aðrar tengdar vísitölur auk þess sem Síminn birtir ársfjórðungsuppgjör.
- Á miðvikudag er vaxtaákvörðunardagur hjá Seðlabanka Íslands. Við eigum von á að stýrivextir verði hækkaðir um 0,75 prósentustig. Seðlabankinn gefur einnig út ársfjórðungsrit sitt, Peningamál, með uppfærðri verðbólgu- og þjóðhagsspá.
- Á fimmtudag gefur Hagstofan út tölur júlímánaðar um vinnumarkaðinn auk gagna um vöru- og þjónustuviðskipti á öðrum ársfjórðungi. Brim og Eik gefa einnig út ársfjórðungsuppgjör.
- Á föstudag birtir Play ársfjórðungsuppgjör.
Mynd vikunnar
Seðlabanki Íslands kannar ársfjórðungslega væntingar markaðsaðila, þ.e. banka, lífeyrissjóða, verðbréfa- og fjárfestingarsjóða, verðbréfamiðlana og fyrirtækja með starfsleyfi til eignastýringar. Samkvæmt nýrri könnun sem var framkvæmd í byrjun ágúst, vænta markaðsaðilar þess að verðbólgan nái hámarki nú á þriðja ársfjórðungi og verði að meðaltali 10% en taki svo að hjaðna. Þessi niðurstaða passar ágætlega við nýútgefna verðbólguspá Hagfræðideildar Landsbankans þar sem við spáum því að verðbólgan hafi þegar náð hámarki og fari hjaðnandi strax í september. Þó má sjá í síðustu tveimur könnunum Seðlabankans, frá því í janúar og apríl, að markaðsaðilar , rétt eins og spáaðilar hafa haft tilhneigingu til þess að vanspá verðbólgunni.
Efnahagsmál
- Íbúðaverð á höfuðborgarsvæðinu hækkaði um 1,1% milli júní og júlí sem er mun minni hækkun en hefur sést á síðustu mánuðum. Vísitala leiguverðs á höfuðborgarsvæðinu stóð í stað milli júní og júlí eftir 0,8% lækkun milli maí og júní.
- Velta innlendra greiðslukorta jókst alls um 6,8% að raunvirði á milli ára í júlí en Íslendingar virðast gera töluvert betur við sig erlendis nú en fyrir faraldurinn.
- Seðlabankinn birti ársfjórðungslega könnun á væntingum markaðsaðila.
- Í síðustu viku var síðasti verðkönnunardagur Hagstofunnar fyrir vísitölu neysluverðs í ágúst en við spáum því að vísitalan hækki um 0,4% milli júlí og ágúst. Gangi spáin eftir verður ársverðbólgan óbreytt milli mánaða í 9,9%. Við eigum von á að nú sé hámarki verðbólgu náð og að verðbólgan muni hjaðna hægt á næstu mánuðum.
Fjármálamarkaðir
- Eimskip, Kvika banki, Síldarvinnslan og VÍS birtu ársfjórðungsuppgjör fyrir annan ársfjórðung.
Hagtölur og markaðsupplýsingar
Þú gætir einnig haft áhuga á
17. nóv. 2025
Skráð atvinnuleysi var 3,9% í október, 0,5 prósentustigum meira en í sama mánuði í fyrra. Brottförum erlendra ferðamanna um Keflavíkurflugvöll fækkaði um 6,2% í október en utanlandsferðum Íslendinga fjölgaði um 3%. Peningastefnunefnd kemur saman á miðvikudaginn og við búumst við að stýrivöxtum verði haldið óbreyttum.
14. nóv. 2025
Við spáum því að peningastefnunefnd haldi stýrivöxtum óbreyttum í næstu viku. Verðbólga jókst umfram væntingar í október og verðbólgumælingin bar þess merki að undirliggjandi verðþrýstingur hefði aukist. Í ljósi breytts lánaframboðs og óviðbúinna áfalla í útflutningsgeirunum má líkast til búast við mildari tón frá peningastefnunefnd.
13. nóv. 2025
Við spáum því að verðbólga standi óbreytt á milli mánaða og mælist 4,3% í nóvember. Flugfargjöld til útlanda verða til lækkunar á vísitölunni, en reiknuð húsaleiga og matarkarfan verða til hækkunar. Við búumst við aukinni verðbólgu á næstu mánuðum.
10. nóv. 2025
Raungengi krónunnar er mjög hátt í sögulegu samhengi en hefur gefið lítillega eftir á allra síðustu dögum. Horfur í álútflutningi eru dræmar eftir bilun hjá Norðuráli og aflaheimildir gefa fyrirheit um samdrátt í útflutningi sjávarafurða. Ferðaþjónusta hefur vaxið umfram væntingar það sem af er ári og telja má horfur á vexti í nýjustu útflutningsstoðum Íslands. Velta samkvæmt VSK-skýrslum hefur þróast með svipuðum hætti í útflutningsgeiranum og í innlenda hagkerfinu, en ávöxtun hlutabréfa félaga í kauphöllinni með tekjur í erlendri mynt er mun lakari en fyrirtækja með tekjur í íslenskum krónum.
10. nóv. 2025
Fáar áhugaverðar hagtölur voru birtar í síðustu viku, en í þessari viku birtir Vinnumálastofnun skráð atvinnuleysi og Ferðamálastofa birtir ferðamannatölur. Uppgjörstímabilið fyrir þriðja ársfjórðung er í fullum gangi.
6. nóv. 2025
Hátt vaxtastig og ströng lánþegaskilyrði hafa slegið verulega á verðhækkanir á íbúðamarkaði. Á sama tíma hefur fjöldinn allur af nýjum íbúðum risið og sölutími þeirra lengst til muna. Eftir að dómur Hæstaréttar í vaxtamálinu féll hafa viðskiptabankarnir tekið lánaframboð til endurskoðunar og það sama má segja um suma lífeyrissjóðina. Seðlabankinn ákvað í síðustu viku að slaka lítillega á lánþegaskilyrðum.
3. nóv. 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
3. nóv. 2025
Verðbólga jókst umfram væntingar í október og mældist 4,3%. Svo mikil hefur verðbólga ekki verið síðan í febrúar síðastliðnum. Telja má áhyggjuefni að aukin verðbólga skýrist ekki af tilfallandi sveiflukenndum liðum heldur virðist undirliggjandi verðþrýstingur hafa aukist. Í þessari viku halda félög áfram að birta uppgjör og hugsanlega má búast við fleiri púslum í breytta mynd af framboði íbúðalána í kjölfar vaxtamálsins.
31. okt. 2025
Eftirspurn eftir vinnuafli hefur minnkað og dregið hefur úr hækkun launa. Atvinnuleysi hefur aukist smám saman og rólegri taktur í atvinnulífinu hefur endurspeglast í hægari fólksfjölgun. Kaupmáttur hefur aukist jafnt og þétt og við teljum að þótt hægi á launahækkunum komi kaupmáttur til með að aukast áfram á næstu árum. Mikill kraftur er í neyslu landsmanna, kortavelta eykst sífellt og Íslendingar hafa aldrei farið í fleiri utanlandsferðir.
30. okt. 2025
Vísitala neysluverðs hækkaði um 0,47% á milli mánaða í október og verðbólga jókst úr 4,1% í 4,3%. Vísitala neysluverðs hækkaði meira en við bjuggumst við, ekki síst reiknuð húsaleiga og verð á mat og drykk. Skammtímaspá okkar gerir nú ráð fyrir að verðbólga haldist í 4,3% út árið, en aukist svo í janúar og mælist 4,5%.