Ferðamenn mun fleiri á þessu ári en því síðasta – en fækkaði í október
Tæplega tvær milljónir ferðamanna hafa heimsótt landið það sem af er ári, um 1,8% fleiri en á sama tíma í fyrra. Frá því í maí hefur ferðamönnum fjölgað á milli ára í hverjum einasta mánuði, að október undanskildum. Þá fækkaði ferðamönnum um 6,2% og hafa ekki verið færri í októbermánuði síðan árið 2022. Hér hlýtur fall Play í lok september að hafa spilað inn í. Það kann bæði að hafa gert það að verkum að hluti fyrirhugaðra heimsókna hingað til lands hafa fallið niður og einnig dregið úr flugframboði. Þá má líka vera að hátt raungengi sé farið að hafa áhrif á komu ferðamanna. Þótt gengið hafi veikst á undanförnum vikum er raungengið enn hátt, líkt og við fjölluðum um í nýlegri hagsjá.
Kortavelta dróst saman í október
Kortavelta ferðamanna í október dróst saman í takt við fækkun þeirra. Sé velta erlendra korta hér á landi í október borin saman við veltuna í október í fyrra dróst hún saman um 13,7% á föstu verðlagi á milli ára og á föstu gengi dróst hún saman um 3,7%. Það sem af er ári hefur erlend kortavelta aukist þó nokkuð frá fyrra ári, eða um 10% á föstu gengi.
Ekki er ólíklegt að fall Play haldi áfram að lita ferðaþjónustuna að einhverju leyti á allra næstu mánuðum, en þó má telja að önnur félög hlaupi í skarðið. Þróunin næstu mánuði kann einnig að velta á gengisþróun, en gengið hefur veikst nokkuð skarpt á síðustu vikum eftir áföll í útflutningsgreinunum.
Utanlandsferðum Íslendinga fjölgar sífellt á milli ára
Í október fóru rúmlega 56 þúsund Íslendingar erlendis, 3% fleiri en á sama tíma í fyrra. Landsmenn hafa aldrei farið í jafnmargar utanlandsferðir á fyrstu tíu mánuðum ársins eins og nú. Það sem af er ári hafa Íslendingar farið í um 18% fleiri utanlandsferðir en á sama tíma í fyrra og ferðunum hefur fjölgað á milli ára alla mánuði ársins. Fjölgun utanlandsferða í október er í takt við aukna kortaveltu Íslendinga erlendis sem jókst um tæplega 24% á milli ára. Þetta er mesti vöxtur í kortaveltu erlendis síðan í apríl, þegar tímasetning páskanna átti stærstan þátt í aukningu á milli ára. Fyrir þann tíma hafði kortavelta erlendis ekki aukist jafn mikið frá því árið 2023. Í þessu samhengi ber að hafa í huga að kortavelta Íslendinga erlendis kemur bæði frá kortum sem eru notuð á ferðalögum til útlanda en einnig af kortum í erlendri netverslun.
Kortavelta Íslendinga innanlands jókst einnig talsvert í október, um 4%, og hefur ekki aukist jafn mikið síðan í maí 2024. Fall Play kann að hafa ýtt undir innlendu kortaveltuna, en fjöldi fólks þurfti að kaupa nýja flugmiða þegar flug með Play féllu niður.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
