Um er að ræða annan mánuðinn í röð þar sem samdráttur mælist í neyslu Íslendinga innanlands milli ára. Það ætti þó ekki að koma á óvart þar sem neysla Íslendinga var mikil innanlands á meðan á faraldrinum stóð. Kortavelta Íslendinga erlendis jókst örlítið milli júní og júlí miðað við fast gengi þannig að um er að ræða enn einn metmánuðinn í kortaveltu erlendis. Síðustu þrír mánuðir hafa jafnframt allir slegið met.
Heildarvelta innlendra greiðslukorta í júlí nam 106 mö.kr. samkvæmt nýútgefnum gögnum Seðlabanka Íslands. Velta íslenskra greiðslukorta innanlands nam 82,5 mö.kr. sem er 3,4 ma.kr. lækkun milli ára, núvirt með vísitölu neysluverðs án húsnæðis, sem gerir um 4% lækkun á milli ára. Aftur á móti nam velta greiðslukorta erlendis um 23,5 mö.kr. og hækkaði veltan, núvirt með gengisvísitölu, um 10,1 ma.kr. - nærri 76% hækkun frá júlí í fyrra. Þetta er fjórði mánuðurinn í röð sem Íslendingar slá eigin kortveltumet erlendis.
Ferðaþyrstir og eyðsluglaðir Íslendingar
Eins og fyrr segir hafa síðustu fjórir mánuðir allir verið metmánuðir í kortaveltu erlendis. Það er athyglisvert að sjá hversu mikil neysla fer fram erlendis en hún mældist tæplega 40% meiri nú en í júlímánuði 2018, miðað við fast gengi. Júlí árið 2018 var metmánuður í ferðalögum Íslendinga til útlanda en þá fóru 66 þúsund Íslendingar í gegnum Leifsstöð. Í júlí í ár fóru 65 þúsund Íslendingar um Leifsstöð. Þetta sýnir okkur að ferðaþorsti landsmanna er mikill og að Íslendingar gera betur við sig erlendis en áður. Næstu misserin verður vöxtur einkaneyslu að öllum líkindum innfluttur í formi aukinna ferðalaga.
Aukin umsvif hjá ferðaskrifstofum
Ef litið er til kortaveltu eftir þeim útgjaldaliðum sem Rannsóknarsetur verslunarinnar birtir sjást enn nokkur merki faraldursins. Mest áberandi er aukning frá júlímánuði 2021 í verslun á skipulagðri ferðaþjónustu. Það ætti ekki að koma á óvart í ljósi mikils ferðaþorsta Íslendinga en sá flokkur er engu að síður sá eini sem hefur dregist saman miðað við júlímánuð árið 2019.
Að sama skapi dregst gistiþjónusta mest saman frá 2021 en ef litið er til 2019, fyrir faraldurinn, hefur kortavelta aukist nokkuð skarpt í kaupum á gistiþjónustu innanlands. Áfengisverslun lækkar næst mest á eftir gistiþjónustu frá 2021, en áætla má að faraldurinn hafi haft mikil áhrif þar sem kaup á áfengi í verslun jókst almennt á meðan samkomutakmarkanir voru við gildi og lítið hægt að heimsækja veitingastaði. Annað sem vekur athygli er mikil aukning í raf- og heimilistækjaverslunum þar sem landinn hefur aukið kortaveltu sína um 52% frá 2019.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsmanna Hagfræðideildar Landsbankans á þeim degi þegar greiningin er dagsett, en þær geta breyst án fyrirvara. Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti. Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
