Vikubyrjun 19. desember 2022
Samkvæmt talningu Ferðamálastofu fóru 138 þúsund erlendir ferðamenn og 34 þúsund Íslendingar um Leifsstöð í nóvember. Erlendir ferðamenn voru 5% fleiri en í nóvember 2019, þ.e. síðasta ár fyrir faraldurinn, en í sumar og það sem af er vetri hefur fjöldinn verið mjög svipaður því sem var á sama tíma árið 2019.
19. desember 2022
Vikan framundan
- Á þriðjudag birtir HMS vísitölu íbúðaverðs á höfuðborgarsvæðinu.
- Á miðvikudag birtir Hagstofan launavísitöluna og niðurstöður úr mánaðarlegri vinnumarkaðsrannsókn sinni.
- Á fimmtudag birtir Hagstofan verðbólgutölur. Við spáum því að verðbólgan hækki úr 9,3% í 9,6%, en að ársverðbólgan hjaðni aftur strax í janúar á næsta ári og verði komin niður í 7,9% í mars. Seðlabankinn birtir ársfjórðungslega Hagvísaþennan dag.
Mynd vikunnar
Samkvæmt talningu Ferðamálastofu fóru 138 þúsund erlendir ferðamenn og 34 þúsund Íslendingar um Leifsstöð í nóvember. Tölurnar ber þó að taka með þeim fyrirvara að þær byggja á úrtaksmælingu gerðri á seinni hluta mánaðarins. Þær endurspegla engu að síður mat Ferðamálastofu á mánuðinum í heild. Erlendir ferðamenn voru 5% fleiri en í nóvember 2019, þ.e. síðasta ár fyrir faraldurinn, en í sumar og það sem af er vetri hefur fjöldinn verið mjög svipaður því sem var á sama tíma árið 2019. Þetta er í annað sinn á þessu ári sem fleiri erlendir ferðamenn fara um Leifsstöð en í sama mánuði árið 2019. Það sem af er ári hafa 1.580 þúsund erlendir ferðamenn komið til Íslands. Í þjóðhagsspánni sem við gáfum út í október gerðum við ráð fyrir 1,7 milljónum erlendra ferðamanna á þessu ári, en miðað við þessar tölur er nokkuð líklegt að það gangi eftir. Við eigum von á að nokkur fleiri erlendir ferðamenn komi til landsins á næsta ári, eða kringum 1,9 milljónir.
Helsta frá vikunni sem leið
- Greiðslukortavelta heimila jókst um 2,0% að raunvirði milli ára í nóvember. Eins og í september og október var aukningin einungis vegna aukinnar veltu erlendis sem jókst um 26% milli ára á meðan velta innanlands dróst saman um 3%. Velta erlendra greiðslukorta hér á landi var 16,7 ma. kr., sem samsvara 120 þúsund krónur á ferðamann. Á föstu verðlagi jókst kortavelta á ferðamann um 2,6% miðað við nóvember 2019, en á föstu gengi jókst hún um 8,7%. Kortaveltujöfnuðurinn mældist neikvæður um 7,2 ma. kr. í október, þ.e.a.s. Íslendingar greiddu meira með greiðslukortum erlendis en ferðamenn gerðu hér á landi.
- Skráð atvinnuleysi mældist 3,3% í nóvember. Í nýjustu mánaðarskýrslu Vinnumálastofnunar kemur fram að stofnunin hafi vantalið fjölda atvinnulausra á tímabilinu frá júní og til október í fyrri birtingum. Atvinnuleysi hafi verið 3,2% í október en ekki 2,8% eins og stofnunin hafði áður gefið út.
- Kaupmáttur ráðstöfunartekna á mann dróst saman um 6,1% á þriðja ársfjórðungi miðað við sama ársfjórðung í fyrra. Heildarráðstöfunartekjur heimilanna jukust um 5,8% milli ára, en samdráttur kaupmáttar ráðstöfunartekna á mann skýrist af verðbólgu og fólksfjölgun, en vísitala neysluverðs hækkaði um 9,7% á þessu tímabili og landsmönnum fjölgaði um 2,8%.
- Í vikunni voru birtar verðbólgutölur í Bandaríkjunum og Bretlandi. Verðbólga í Bandaríkjunum minnkaði úr 7,7% í 7,1% og verðbólga í Bretlandi fór úr 11,1% í 10,7%. Báðar tölurnar voru lægri en var búist við. Þrátt fyrir þetta hækkaði Seðlabanki Bandaríkjanna, Seðlabanki Evrópu, Englandsbanki og Seðlabanki Sviss allir stýrivexti um 0,5%. Norski seðlabankinn hækkaði svo vexti um 0,25%.
- Á skuldabréfamarkaði héldu Landsbankinn, Lánasjóður sveitarfélaga og Lánamál ríkisins útboð. Lánasjóður sveitarfélaga birtu útgáfuáætlun fyrir 2023.
- Í vikunni birtum við Hagsjár um fjölda fyrstu kaupenda á fasteignamarkaði, launasummu, sem er staðgreiðsluskyld laun allra á vinnumarkaði og greiðslukortaveltu í nóvember.
Hagtölur og markaðsupplýsingar
Þú gætir einnig haft áhuga á
27. ágúst 2024
Afgangur af þjónustuviðskiptum náði ekki að vega upp halla af vöruviðskiptum á öðrum ársfjórðungi, ólíkt því sem var fyrir ári síðan. Bæði var meiri halli af vöruviðskiptum og minni afgangur af þjónustuviðskiptum en á öðrum fjórðungi síðasta árs.
26. ágúst 2024
Peningastefnunefnd hélt vöxtum óbreyttum í síðustu viku, eins og búist var við. Nokkur kraftur er í fasteignamarkaðnum og vísitala íbúðaverðs og vísitala leiguverðs hækkuðu báðar þó nokkuð í júlí. Í þessari viku fáum við verðbólgutölur fyrir ágústmánuð og þjóðhagsreikninga annars ársfjórðungs.
20. ágúst 2024
Hagstofan hefur frá því í júní notað nýja aðferð við að mæla kostnað við búsetu í eigin húsnæði. Hefði Hagstofan ekki breytt um aðferð væri verðbólgumælingin nú líklega hærri. Um næstu áramót áforma stjórnvöld að breyta innheimtu gjalda á ökutæki sem mun að líkindum einnig hafa áhrif til lækkunar á mældri verðbólgu.
19. ágúst 2024
Uppfærð gögn Seðlabankans gefa til kynna að kortavelta íslenskra heimila hafi verið þó nokkuð meiri á þessu ári en áður var talið. Heildarkortavelta Íslendinga hefur aukist á milli ára alla mánuði ársins og hefur verið 4% meiri að raunvirði það sem af er ári en á sama tímabili í fyrra.
19. ágúst 2024
Kortavelta erlendra ferðamanna hér á landi það sem af er ári er meiri en áður var talið, samkvæmt uppfærðum tölum sem Seðlabanki Íslands birti í síðustu viku. Í þessari viku ber hæst vaxtaákvörðun hjá Seðlabankanum á miðvikudag.
16. ágúst 2024
Uppfærðar tölur um kortaveltu teikna upp töluvert aðra mynd af stöðu ferðaþjónustunnar en áður birt gögn. Það sem af er ári hefur kortavelta aukist frá fyrra ári, þvert á það sem áður var talið. Ferðamenn eru því lítillega fleiri í ár en í fyrra og eyða meiru.
15. ágúst 2024
Við spáum því að vísitala neysluverðs hækki um 0,36% á milli mánaða í ágúst og að verðbólga standi í stað í 6,3%. Alla jafna ganga sumarútsölur á fötum og skóm að hluta til baka í ágúst á meðan flugafargjöld til útlanda lækka. Við eigum von á að verðbólga hjaðni næstu mánuði og verði komin niður í 5,4% í nóvember.
15. ágúst 2024
Verðbólga jókst umfram væntingar í júlí og jafnvel þótt verðbólga hafi almennt verið á niðurleið undanfarið hefur hjöðnunin verið hægari en vonir stóðu til. Nú í ágúst hafa stýrivextir verið 9,25% í heilt ár og við teljum að peningastefnunefnd haldi þeim áfram óbreyttum í næstu viku, sjötta skiptið í röð.
12. ágúst 2024
Brottfarir erlendra ferðamanna um Keflavíkurflugvöll voru hálfu prósenti fleiri í júlí í ár en í fyrra. Fjöldi skráðra gistinótta útlendinga dróst minna saman í júní en síðustu mánuði. Noregur hefur sótt í sig veðrið sem vinsæll ferðamannastaður og hafa gistinætur þar aukist langmest af norðurlöndunum.
12. ágúst 2024
Brottfarir erlendra ferðamanna frá Keflavíkurflugvelli í júlí voru álíka margar og í fyrra, en brottförum Íslendinga fækkaði nokkuð á milli ára. Í þessari viku fara fram verðmælingar vegna ágústmælingar vísitölu neysluverðs og nokkur félög í kauphöllinni birta uppgjör.