Verðbólga þróaðist í takt við væntingar í júlí og mældist 4,0%. Flugfargjöld til útlanda hækkuðu meira en við gerðum ráð fyrir, reiknuð húsaleiga hækkaði minna og sumarútsölur á fötum og skóm voru lakari. Við teljum horfur á að verðbólga haldist um og yfir 4% út þetta ár og spáum 4,0% verðbólgu í ágúst, 4,2% í september og 4,3% í október.
Seðlabankinn tilkynnir um vaxtaákvörðun þann 20. ágúst næstkomandi. Ef peningastefnunefnd telur verðbólguhorfur svipaðar og við má telja ólíklegt að vextir verði lækkaðir. Áfram virðist þó nokkur neyslukraftur í hagkerfinu en kortavelta landsmanna hélt áfram að aukast að raunvirði í síðasta mánuði, auk þess sem utanlandsferðum Íslendinga fjölgar stöðugt. Ferðirnar voru næstum sjö þúsund fleiri í júní á þessu ári en í júní í fyrra. Þá hefur gengi krónunnar styrkst talsvert upp á síðkastið og atvinnuleysi haldist hóflegt þó smám saman hafi slaknað á spennu á vinnumarkaði. Líklega telur peningastefnunefnd útlit fyrir að hægja þurfi meira á hagkerfinu en áður þótti líklegt til þess að ná verðbólgu niður í markmið.
Íbúðaverð hefur verið á rólegri siglingu undanfarið og árshækkun íbúðaverðs var 4,7% í júní. Árshækkunin er því ekki langt umfram verðbólgu um þessar mundir og raunverð aðeins lítillega hærra en á sama tíma í fyrra.
Bandaríkin og Evrópusambandið tilkynntu í lok júlí um meiri háttar viðskiptasamning. Bandaríkin takmarka innflutningstolla á flestar evrópskar vörur við 15% og Evrópa skuldbindur sig meðal annars til orku- og vopnakaupa af Bandaríkjunum og heitir því að stórauka evrópska fjárfestingu í Bandaríkjunum.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
