Spáum óbreyttri verðbólgu í ágúst
Verðbólga var í takt við væntingar í júlí og gangi spá okkar eftir verður ágúst sjöundi mánuðurinn í röð með verðbólgu á bilinu 3,8% til 4,2%. Raunar verður verðbólga á því bili út þetta ár, samkvæmt spánni. Við spáum því að vísitala neysluverðs hækki um 0,07% á milli mánaða í ágúst og að ársverðbólga verði óbreytt í 4,0%. Við teljum að lægri flugfargjöld til útlanda haldi aftur af hækkun vísitölunnar í ágúst, en almennt lækka flugfargjöld í ágúst þegar sumareftirspurnin fer dvínandi. Við gerum ráð fyrir að reiknuð húsaleiga hafi áhrif til hækkunar vísitölunnar í mánuðinum en auk þess má ætla að útsölulok hafi áhrif til hækkunar. Hagstofan birtir ágústmælingu vísitölu neysluverðs þann 28. ágúst nk.
Áfram minni hækkanir á matvöru
Verð á mat og drykkjarvörum hefur hækkað umfram almennt verðlag síðasta árið. Að hluta til skýrast hækkanirnar af hækkandi heimsmarkaðsverði á súkkulaði og kaffi, en einnig hefur verð á kjöti og mjólk hækkað umfram almennt verðlag. Í júlí hægði á hækkun matvöru og verð á matarkörfunni stóð nokkurn veginn í stað á milli mánaða. Árshækkun flestra liða lækkaði, að kaffi undanskildu. Leiðandi vísitala verðlagseftirlits ASÍ hefur lækkað um tæplega 0,2% það sem af er ágúst. Síðustu mánuði hefur Verðlagseftirlitið mælt minni hækkun á milli mánaða en Hagstofan. Við gerum nú ráð fyrir að matarkarfan hækki um 0,1% í ágúst.
Spáum áfram svipaðri þróun á reiknaðri húsaleigu
Við spáum því áfram að reiknuð húsaleiga hækki um 0,6% á milli mánaða, sem er svipað og meðalhækkun síðustu 12 mánaða. Þá gerum við ráð fyrir að annað vegna húsnæðis hækki um 0,24%, sem er nokkuð undir meðalhækkun seinustu tólf mánaða. Alls verða áhrif húsnæðiskostnaðar 0,15 prósentustig til hækkunar á vísitölunni, gangi spáin eftir.
Sumarútsölur ganga til baka
Eftir faraldurinn hafa sumarútsölur verið nokkuð dræmari en þær voru fyrir faraldur. Mæling Hagstofunnar fyrir júlí sl. sýndi tæplega 5% verðlækkun milli mánaða, eða verstu sumarútsölur frá því á covid-árinu 2020. Við gerum ráð fyrir að sumarútsölurnar gangi til baka í tveimur skrefum, í ágúst og í september, og hækki um 2,5% í hvorum mánuði.
Flugfargjöld lækka í ágúst og bensínverð lækkar áfram
Það sem af er ári hefur verð á flugfargjöldum til útlanda verið að meðaltali nokkuð svipað og í fyrra. Flugfargjöld til útlanda hækkuðu meira í júní og júlí en við spáðum og voru tæplega 5% hærri en í júlí í fyrra. Flugfargjöld lækka alla jafna í ágúst og við spáum því að flugfargjöld til útlanda lækki um 9,5% á milli mánaða í ágúst og að flugmiðar verði því um 2% dýrari en í fyrra.
Samkvæmt verðmælingu okkar lækkar bensín um 0,8% á milli mánaða í ágúst, aðeins meira en við gerðum ráð fyrir í síðustu spá.
Spá um þróun VNV í júlí 2025
| Undirliður | Vægi í VNV | Breyting (spá) | Áhrif (spá) |
| Matur og drykkjarvara | 15,4% | 0,1% | 0,02% |
| Áfengi og tóbak | 2,5% | 0,2% | 0,01% |
| Föt og skór | 3,6% | 2,5% | 0,09% |
| Húsnæði án reiknaðrar húsaleigu | 9,5% | 0,3% | 0,03% |
| Reiknuð húsaleiga | 20,2% | 0,6% | 0,12% |
| Húsgögn og heimilisbúnaður | 4,6% | 0,6% | 0,03% |
| Heilsa | 4,1% | 0,2% | 0,01% |
| Ferðir og flutningar (annað) | 3,9% | 0,4% | 0,02% |
| - Kaup ökutækja | 6,1% | -0,2% | -0,01% |
| - Bensín og díselolía | 3,5% | -0,8% | -0,03% |
| - Flugfargjöld til útlanda | 2,6% | -9,5% | -0,27% |
| Póstur og sími | 1,6% | 0,0% | 0,00% |
| Tómstundir og menning | 10,7% | -0,1% | -0,01% |
| Menntun | 0,9% | 1,0% | 0,01% |
| Hótel og veitingastaðir | 5,5% | 0,6% | 0,03% |
| Aðrar vörur og þjónusta | 5,2% | 0,5% | 0,03% |
| Alls | 100,0% | 0,07% |
Verðbólga ekki undir 4% á árinu
Við spáum því að vísitala neysluverðs hækki um 0,07% í ágúst, lækki um 0,06% í september, hækki um 0,32% í október og lækki um 0,07% í nóvember. Gangi spáin eftir verður ársverðbólga 4,0% í ágúst, 4,2% í september, 4,2% í október og 4,0% í nóvember. Spáin er aðeins lægri en síðasta spá, sem við birtum daginn sem Hagstofan birti verðbólgutölur í júlí. Breytingin skýrist helst af því að verðkönnun okkar á bensíni sýnir meiri lækkun nú en við gerðum ráð fyrir þá. Einnig gerum við ráð fyrir minni verðhækkunum á matarkörfunni en áður, meðal annars vegna þess að verðvísitala ASÍ á matvöruverði sýnir nú lækkun á milli mánaða, en ekki hækkun.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
