23. júní 2025
Vikan framundan
- Í dag birtir Hagstofan vísitölu launa fyrir maímánuð.
- Á þriðjudag birtir Hagstofan veltu samkvæmt VSK-skýrslum fyrir VSK-tímabilið mars-apríl.
- Á fimmtudag birtir Hagstofan gögn um gistinætur í maí og Hagar birta uppgjör.
- Á föstudag birtir Hagstofan vísitölu neysluverðs í júní. Við spáum því að verðbólga hækki lítillega og mælist 3,9%. Þá birtir Seðlabankinn Hagvísa.
Mynd vikunnar: Afborganir íbúðalána hækka langt umfram laun
Afborganir af íbúðalánum hafa hækkað langt umfram laun á síðustu þremur árum, sérstaklega af óverðtryggðum lánum. Laun hafa hækkað tiltölulega stöðugt frá árinu 2014 en lánaafborganir sveiflast þó nokkuð meira. Á myndinni er miðað við afborgun á nýju íbúðaláni að gefnu hækkandi íbúðaverði, þ.e. höfuðstóll lánsins fylgir vísitölu íbúðaverðs, og miðað við lægstu vexti sem bjóðast hjá viðskiptabönkum hverju sinni.
Það helsta frá vikunni sem leið
- Vísitala íbúðaverðs lækkaði um 0,45% á milli mánaða í maí. Íbúðaverð hefur hækkað um 5,7% á síðustu tólf mánuðum en í apríl var tólf mánaða hækkunin 7,6%. Ársbreytingin hefur ekki verið jafn lítil frá því í byrjun síðasta árs. Árshækkun vísitölu íbúðaverðs umfram VNV án húsnæðis er nú 3,0%.
- HMS birti einnig vísitölu leiguverðs sem hækkaði um 1,15% á milli mánaða í maí. Tólf mánaða hækkun vísitölunnar nemur nú 8,8%. Þá birti HMS einnig mánaðarskýrslu júnímánaðar.
- Greiðslukortavelta landsmanna jókst um 6,8% á milli ára í maí, að teknu tilliti til verðlags og gengis. Sem fyrr jókst kortavelta erlendis (+20,9% á milli ára) mun meira en kortavelta innanlands (+3,3% á milli ára). Íslendingar hafa aldrei farið í jafnmargar utanlandsferðir í maímánuði eins og nú. Ferðirnar voru 25% fleiri en í maí í fyrra, sem rímar ágætlega við kortaveltutölurnar. Kortavelta erlendra greiðslukorta hér á landi jókst um 3,2% á föstu verðlagi (VNV) á milli ára í maí en um 11,4% á föstu gengi (GVT).
- Verðbólga í Bretlandi mældist 3,4% í maí og lækkaði um 0,1 prósentustig á milli mánaða. Mælingin var aðeins hærri en greinendur bjuggust við.
- Seðlabanki Bandaríkjanna og Englandsbanki héldu stýrivöxtum óbreyttum og voru báðar ákvarðanir í takt við væntingar.
- Kvika birti mat á áhrifum af fyrirhugaðri innleiðingu CRR III.
- Landsbankinn lauk sölu á grænum skuldabréfum, Íslandsbanki lauk útboði á sértryggðum skuldabréfum, Orkuveita Reykjavíkur lauk sölu á grænum skuldabréfum og Lánamál ríkisins héldu útboð ríkisbréfa.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
23. júní 2025
Færri ferðamenn hafa heimsótt Ísland það sem af er ári en á sama tíma í fyrra. Þrátt fyrir það hefur erlend kortavelta aukist á milli ára og það sama má segja um útflutningstekjur af ferðaþjónustu. Við teljum ýmislegt benda til þess að erlendir ferðamenn hafi verið fleiri síðustu mánuði en talning Ferðamálastofu segir til um.
19. júní 2025
Kortavelta jókst um 6,8% á milli ára í maí að raunvirði þar af jókst hún um 21% erlendis. Það sem af er ári hefur kortavelta aukist um 5,5% frá sama tímabili í fyrra, að teknu tilliti til verðlags og gengis. Íslendingar hafa aldrei farið í fleiri utanlandsferðir í maímánuði en nú í ár. Greiðslukortajöfnuður var neikvæður um 4,2 ma.kr. sem er töluvert meiri halli en í maí í fyrra.
16. júní 2025
Í síðustu viku fór fram uppgjör við eigendur HFF-bréfa. Erlendum ferðamönnum fjölgaði aðeins á milli ára í maí og atvinnuleysi jókst á milli ára. Í vikunni fram undan birtir HMS vísitölu íbúðaverðs, vísitölu leiguverðs og mánaðarskýrslu.
12. júní 2025
Við spáum því að verðbólga aukist lítillega í júní og mælist 3,9%. Verðbólga helst líklega nær óbreytt í sumar en eykst svo aðeins með haustinu, þegar einskiptisliðir vegna skólagjalda og skólamáltíða detta út úr tólf mánaða taktinum. Við gerum áfram ráð fyrir 4,0% verðbólgu í árslok.
11. júní 2025
Eftir hægagang í bílaviðskiptum á síðasta ári virðast þau hafa færst í aukana í byrjun þessa árs. Um 53% fleiri fólksbílar hafa verið nýskráðir til einkanota á fyrstu fimm mánuðum ársins en á sama tíma í fyrra. Um 21% þeirra bíla sem hafa verið nýskráðir á þessu ári eru hreinir rafmagnsbílar.
10. júní 2025
Viðskiptahalli Íslands hefur aldrei verið jafnmikill og á síðustu tveimur fjórðungum. Þá hefur halli á vöruviðskiptum aldrei verið meiri en í maí og hið sama má segja um innflutningsverðmæti, samkvæmt Hagstofu Íslands. Í næstu viku verða birtar atvinnuleysistölur og brottfarir um Keflavíkurflugvöll í maí.
6. júní 2025
Alls var 59,5 ma.kr. halli á viðskiptum við útlönd á fyrsta fjórðungi ársins. Viðskiptahalli Íslands hefur aldrei verið jafnmikill og á síðustu tveimur fjórðungum. Hann skýrist að verulegu leyti af stórfelldum innflutningi á tölvubúnaði vegna uppbyggingar á gagnaverum. Erlend staða þjóðarbúsins breyttist lítið á fjórðungnum.
5. júní 2025
Útgjöld til hernaðar- og varnarmála hafa stóraukist á síðustu árum, einkum í Evrópu og Mið-Austurlöndum. Leiðtogafundur NATO verður haldinn í Haag í lok mánaðarins og talið er að viðmið um útgjöld aðildarríkja til varnarmála verði hækkað til muna. Enn er óljóst upp að hvaða marki Ísland gæti þurft að auka varnartengd útgjöld. Aukin hernaðaruppbygging litar hagvaxtar- og verðbólguhorfur á heimsvísu og getur haft margþætt efnahags- og samfélagsleg áhrif.
2. júní 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
2. júní 2025
Verðbólga hjaðnaði úr 4,2% í 3,8% í apríl og landsframleiðsla jókst um 2,6% á milli ára á fyrsta ársfjórðungi. Gistinóttum fjölgaði alls um 11,6% á milli ára í apríl. Í vikunni birtir Seðlabankinn viðskiptajöfnuð við útlönd og fundargerð peningastefnunefndar.