Kortavelta Íslendinga erlendis eykst og veldur auknum greiðslukortahalla
Greiðslukortavelta landsmanna var 6,8% meiri núna í maí en í maí í fyrra, að teknu tilliti til verðlags og gengis. Þá jókst kortavelta innanlands um 3,3% að raunvirði á milli ára og erlendis jókst hún um 20,9% á föstu gengi.
Verulega aukin kortavelta Íslendinga erlendis rímar við stórfellda fjölgun utanlandsferða á þessu ári. Það sem af er ári hafa utanlandsferðir Íslendinga verið um 29% fleiri en á sama tíma í fyrra. Í maí síðastliðnum voru utanlandsferðir Íslendinga um 25% fleiri en í maí á síðasta ári og ferðir í maímánuði hafa aldrei verið fleiri. Í þessu samhengi ber að hafa í huga að kortavelta Íslendinga erlendis kemur bæði frá kortum sem eru notuð á ferðalögum til útlanda en einnig í erlendri netverslun.
Einkaneysla eykst minna en kortavelta
Kortavelta gefur gjarnan ágæta vísbendingu um þróun einkaneyslu, þótt kortaveltan sveiflist þó nokkuð meira. Hagstofan birtir einkaneyslugögn fyrir hvern ársfjórðung með tæplega tveggja mánaða töf en Seðlabankinn birtir kortaveltugögn fyrir hvern mánuð, næsta mánuð á eftir. Heildarkortavelta hefur aukist á milli ára í hverjum einasta mánuði frá því í október 2023. Á fyrstu fimm mánuðum þessa árs hefur kortavelta aukist um 5,5% frá sama tímabili í fyrra, að teknu tilliti til verðlags og gengis. Einkaneysla jókst um 2,3% á fyrsta fjórðungi, samkvæmt þjóðhagsreikningum, en kortavelta jókst um 3,6%. Einkaneyslugögnin kunna að verða uppfærð með næstu birtingu þjóðhagsreikninga.
Áfram ber þróun kortaveltu þess merki að meðalheimilið hafi að miklu leyti staðið af sér hátt vaxtastig án þess að hafa þurft að halda verulega aftur af neyslu. Á sama tíma og kortavelta hefur aukist og utanlandsferðum fjölgað hafa innlán heimila aukist talsvert. Samhliða virðist tiltölulega lítið um yfirdrátt sem er einnig merki um að heimilin standi vel. Því er líklega áfram innistæða til neyslu næstu misserin.
Meiri kortaveltuhalli en í maí í fyrra
Greiðslukortajöfnuður var neikvæður um rúmlega 4,2 ma.kr. í maí, töluvert meiri halli en í maí í fyrra þegar hann nam tæplega 1,7 ma.kr. Aukinn halli skýrist af því að kortavelta Íslendinga erlendis hefur aukist umfram erlenda kortaveltu hér á landi. Greiðslukortajöfnuður hefur verið neikvæður frá því í október á síðasta ári. Almennt er afgangur á sumrin, frá maí eða júní í tengslum við háannatíma ferðaþjónustunnar sem snýst yfir í halla í október eða nóvember.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
