Íbúðaverð tók stökk í janúar en raunverð íbúða lækkar áfram
Vísitala íbúðaverðs hækkaði um 1,7% á milli mánaða í janúar. Þetta er mesta hækkun vísitölunnar síðan í febrúar 2024. Árshækkunin mælist nú 2,4%, en í desember mældist árshækkunin 2,1% og hafði ekki mælst jafn lítil frá því í september 2023. Íbúðaverðshækkanir síðustu þrjá mánuði hafa verið minni en hækkanir á almennu verðlagi og mælist því raunverðslækkun á milli ára.
Hækkunin í janúar drifin áfram af sérbýli
Hækkunin í janúar var drifin áfram af verðhækkunum á sérbýli á höfuðborgarsvæðinu, sem hækkaði um 3,2%. Einnig hækkaði sérbýli á landsbyggðinni um 1,9%. Verð á sérbýli sveiflast mun meira en verð á fjölbýli þar sem sérbýli eru færri og fjölbreytilegri, því segja skammtímaverðbreytingar á þeim minna um undirliggjandi verðþrýsting en þróun á verði fjölbýlis. Verð á fjölbýli á höfuðborgarsvæðinu hefur sveiflast mun minna síðustu mánuði og hefur raun verið nokkuð stöðugt frá miðju síðasta ári. Árshækkun íbúðaverðs mælist 2,4% í janúar og hefur haldist á bilinu 2-4% á síðustu misserum, en í janúar 2025 mældist árshækkunin 10,4%.
Raunverð 2% lægra en í janúar í fyrra
Síðustu þrjá mánuði hafa íbúðaverðshækkanir á ársgrundvelli verið lægri en hækkanir á almennu verðlagi. Raunverð fæst með því að taka tillit til verðbólgu, til þess notum við vísitölu neysluverðs án húsnæðis. Raunverð lækkar þannig á milli ára ef árshækkun íbúðaverðs er minni en árshækkun vísitölu neysluverðs án húsnæðis. Vísitala íbúðaverðs hefur því lækkað um rétt rúmlega 2%, leiðrétt fyrir verðlagi. Ársbreyting raunverðs hefur ekki lækkað eins mikið síðan í nóvember 2023.
Rólegri taktur á íbúðamarkaði
Velta á íbúðamarkaði var töluvert minni nú í janúar en í fyrra en þá var fjöldi samninga óvenju mikill. Alls voru 611 kaupsamningar um íbúðarhúsnæði undirritaðir í janúar en í janúar 2025 var fjöldi kaupsamninga 731. Þannig fækkaði kaupsamningum um 16% á milli ára. Töluverðar sveiflur hafa verið í fjölda kaupsamninga síðustu mánuði, en óvissa í kjölfar dóms hæstaréttar í Vaxtamálinu í október hefur þar eflaust haft mikið að segja. Heilt á litið hefur dregið úr veltu allra síðustu mánuði.
Vísitala leiguverðs lækkaði annan mánuðinn í röð
Vísitala leiguverðs lækkaði um 0,3% á milli mánaða í janúar og árshækkun hennar mældist 5%. Svo lítil hefur árshækkun leiguvísitölunnar ekki mælst síðan í lok árs 2021. Þetta er í fyrsta skipti síðan í maí 2023 þar sem árshækkun vísitölunnar er minni en verðbólga, en árshækkun leiguverðs er enn nokkuð meiri en árshækkun íbúðaverðs.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
