Staðan í hagkerfinu er um margt óræð um þessar mundir. Verðbólga og stýrivextir stóðu í stað í nýliðnum mánuði, hagvöxtur dróst saman undir lok síðasta árs og atvinnuleysi hefur aukist hraðar en áður. Á sama tíma sýna kortaveltutölur að heimilin standa enn nokkuð traustum fótum og svigrúm virðist til staðar fyrir áframhaldandi neyslu. Það þarf raunar ekki að koma á óvart, enda hefur kaupmáttur haldið áfram að aukast á milli mánaða.
Verðbólga stóð í stað í febrúar og mælist áfram 5,2%. Framlag innfluttra vara til ársverðbólgu dróst saman, sem skýrist að stórum hluta af lækkun á bensínverði. Framlag ferðaþjónustu jókst á milli mánaða vegna mikillar hækkunar á flugfargjöldum til útlanda, en einnig vegna hækkunar á verði gistingar. Matarkarfan hækkaði einnig nokkuð meira en við áttum von á. Mælingin ber þess merki að undirliggjandi þrýstingur hafi aukist. Við spáum því að verðbólga fari niður fyrir 5% í apríl.
Peningastefnunefnd hélt vöxtum óbreyttum í byrjun febrúar og meginvextir bankans standa því áfram í 7,25%. Nefndin benti á að þrátt fyrir skýr merki um kólnun á vinnumarkaði og að hægt hafi á efnahagsumsvifum væri undirliggjandi verðbólguþrýstingur enn þrálátur. Það kom flestum greinendum á óvart að tónninn í yfirlýsingunni væri ekki harðari. Nefndin var þó afdráttarlausri á kynningarfundinum. Peningastefnunefnd birtir aftur vaxtaákvörðun þann 18. mars.
Húsnæðismarkaðurinn hefur kólnað á síðustu mánuðum. Nafnverð íbúða hefur hækkað um 2,4% á síðustu tólf mánuðum, vel undir almennu verðlagi. Febrúar var þriðji mánuðurinn í röð þar sem raunverð íbúða lækkar á milli ára. Sveiflur hafa verið í veltu síðustu mánuði, sem helst má rekja til vaxtadómsins, en heilt yfir hafa færri kaupsamningar verið undirritaðir síðustu mánuði.
Skýr merki eru um minni spennu á vinnumarkaði og atvinnuleysi heldur áfram að aukast. Skráð atvinnuleysi hjá Vinnumálastofnun mældist 4,9% í janúar. Íslendingar fóru í færri utanlandsferðir nú í janúar en í janúar í fyrra, en þrátt fyrir það jókst kortavelta Íslendinga erlendis talsvert, sem bendir til þess erlend netverslun hafi verið sterk. Heimili landsins standa því heilt yfir vel. Sparnaður eykst og ekki eru merki um að vanskil hafi færst í aukana.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
