Undirliggjandi þrýstingur eykst þrátt fyrir óbreytta verðbólgu
Vísitala neysluverðs hækkaði um 0,94% á milli mánaða í febrúar, samkvæmt nýbirtum tölum Hagstofunnar. Verðbólga stóð því í stað og mælist áfram 5,2%. Mælingin var töluvert yfir spá okkar um 0,64% hækkun á milli mánaða og 4,9% verðbólgu. Mestu munar um hækkun á flugfargjöldum til útlanda sem eru orðin 22% dýrari en á sama tíma í fyrra. Matarkarfan hækkaði einnig töluvert umfram spá okkar.
Undirliggjandi verðbólga jókst á milli mánaða
Í frétt Hagstofunnar kom fram að mistök hefðu orðið í janúar þegar verð á bensíni og dísel var skráð of hátt. Þetta var leiðrétt nú í febrúar. Það þýðir að verðbólga hefði átt að mælast lægri í janúar og því má segja að í raun hafi verðbólga aukist á milli mánaða í febrúar. Allar kjarnavísitölur, sem ætlað er að meta undirliggjandi verðbólgu, hækkuðu einnig á milli mánaða og hafa því allar hækkað þrjá mánuði í röð.
Innlendar vörur hafa hækkað um 7,0% síðastliðið ár, en á sama tíma hafa innfluttar vörur lækkað um 2,4%. Þjónustuverðbólga eykst áfram á milli mánaða en nú í febrúar hefur hún aukist um 9%. Ferðaþjónustutengdir liðir hafa mest áhrif í febrúar, en flugfargjöld til útlanda mælast nú 22% hærri en á sama tíma í fyrra. Hægt hefur á hækkunum á reiknaðri húsaleigu allra síðustu mánuði en þrátt fyrir það er framlag heildar húsnæðiskostnaðar að mestu óbreytt. Það skýrist meðal annars af ýmsum gjaldskrárbreytingum, þar á meðal hitaveitu í desember og gjaldskrárhækkana fyrir sorphirðu, holræsagjöld og kalt vatn nú í febrúar. Greidd leiga hækkaði einnig um 1% í febrúar.
Ef við skoðum breytingu á samsetningu ársverðbólgu á milli janúar og febrúar sést að framlag innfluttra vara til ársverðbólgu dróst saman, sem skýrist að miklu leyti af lækkun á bensínverði. Framlag ferðaþjónustu jókst á milli mánaða, aðallega vegna mikillar hækkunar á flugfargjöldum til útlanda, en einnig hækkunar á verði gistingar.
Helstu liðir
- Matarkarfan hækkaði aftur nokkuð meira en við gerðum ráð fyrir, eða um 0,9%. Við höfðum spáð 0,35% hækkun.
- Verð á fötum og skóm hækkaði um 5,1% og verð á húsgögnum og heimilisbúnaði um 5,4%, nokkurn veginn í takt við okkar spá. Útsölur á fötum og skóm eru því að ganga hraðar til baka en í fyrra, sem hefur áhrif til hækkunar á verðbólgu til skamms tíma.
- Flugfargjöld hækkuðu um 6,8%, en við spáðum 1,4% lækkun. Nú er 22% dýrara að fljúga en í febrúar í fyrra. Í desember var um 10% dýrara að fljúga en í sama mánuði árið áður og í janúar voru flugfargjöld 16% dýrari. Flugverð hefur því hækkað töluvert þrjá mánuði í röð.
- Reiknuð húsaleiga hækkaði um 0,15%, sem er minna en við höfðum spáð, en spá okkar gerir ráð fyrir um 0,5% hækkun að meðaltali á milli mánaða þó vísitalan sveiflist aðeins um það meðaltal.
- Annar kostnaður vegna húsnæðis hækkaði um 1,28%, en við spáðum 0,5% hækkun. Þar munar mest um að greidd leiga hækkaði um 1%, auk þess sem fyrrnefndar gjaldskrárhækkanir höfðu áhrif í febrúar.
Eigum von á að verðbólga fari aftur undir 5% í apríl
Spá okkar fyrir næstu mánuði er +0,28% í mars, +0,69% í apríl og +0,03% í maí. Gangi spáin eftir mun ársverðbólgan mælast 5,1% í mars, 4,8% í apríl og 4,7% í maí. Spáin er aðeins hærri en seinasta spá sem við birtum í verðkönnunarvikunni þar sem febrúarmælingin var hærri en við áttum von á.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
