Vikubyrjun 5. maí 2025
Í apríl jókst verðbólga úr 3,8% í 4,2%, nokkuð umfram okkar spá um 4,0% verðbólgu. Velta samkvæmt VSK-skýrslum jókst á milli ára í flestum atvinnugreinum á fyrstu tveimur mánuðum ársins. Á fyrsta ársfjórðungi mældist hagvöxtur á evrusvæðinu en samdráttur í Bandaríkjunum. Í þessari viku er vaxtaákvörðun í Bandaríkjunum og einnig í Bretlandi.
5. maí 2025
Vikan framundan
- Á miðvikudag birta Arion banki, Kvika banki og Sýn uppgjör. Þá er vaxtaákvörðun hjá Seðlabanka Bandaríkjanna.
- Á fimmtudag birta Alvotech, Eik og Íslandsbanki uppgjör og svo er vaxtaákvörðun hjá Englandsbanka.
- Á föstudag birtir Ferðamálastofa gögn um fjölda ferðamanna um Keflavíkurflugvöll og Vinnumálastofa birtir skráð atvinnuleysi.
Mynd vikunnar
Verg landsframleiðsla í Bandaríkjunum dróst saman um 0,3 prósentustig á ársgrundvelli á fyrsta ársfjórðungi. Landsframleiðslan var minni en búist hafði verið við og verulegur viðsnúningur varð frá fjórða ársfjórðungi síðasta árs, þegar hagvöxtur mældist 2,4%. Samdrátturinn skýrist að miklu leyti af auknum vöruinnflutningi fyrirtækja sem birgðu sig upp áður en tollar tóku gildi. Þessi áhrif endurspeglast að hluta til í þjóðhagsreikningum sem auknar birgðir, en ekki nóg til þess að vega á móti auknum innflutningi. Þar að auki minnkuðu útgjöld hins opinbera á milli ára. 177 þúsund ný störf urðu til í Bandaríkjunum í apríl. Fjölgunin var lítillega umfram væntingar en ný störf voru þó færri en í mars þegar þau voru um 185 þúsund. Atvinnuleysi í Bandaríkjunum hélst óbreytt á milli mánaða í 4,2%.
Það helsta frá vikunni sem leið
- Verðbólga hækkaði úr 3,8% í 4,2% í apríl, nokkuð umfram spá okkar um 4,0% verðbólgu. Reiknuð húsaleiga hækkaði meira en við bjuggumst við og það sama má segja um verð á mat og drykkjarvöru. Verð á fötum og skóm hækkaði aftur á móti minna en við höfðum spáð. Framlag innfluttra vara til ársverðbólgu hækkaði nokkuð á milli mánaða. Við teljum að verðbólga hjaðni aðeins næstu mánuði og verði komin niður í 3,7% í júlí.
- Gistinóttum á öllum tegundum skráðra gististaða fækkaði um 2,9% á milli ára í mars, þar af um 3,4% á hótelum. Hagstofan vinnur nú að endurskoðun á flokkun gistinótta eftir þjóðerni og birtir því ekki skiptingu á milli Íslendinga og erlendra ferðamenn að sinni.
- Velta samkvæmt VSK-skýrslum jókst um 4,5% á milli ára á föstu verðlagi á VSK-tímabilinu janúar-febrúar 2025.
- Árstíðaleiðrétt atvinnuleysi var 3,7% í mars, samkvæmt vinnumarkaðsrannsókn Hagstofu Íslands.
- Á evrusvæðinu mældist 0,4% hagvöxtur á milli ársfjórðunga á fyrsta ársfjórðungi. Vöxturinn var meiri en búist var við, en það skýrist að hluta til af einskiptisaukningu á VLF á Írlandi vegna alþjóðlegra fyrirtækja sem taka tekjur í gegnum írsk dótturfélög. Flestir greinendur telja að tollar í Bandaríkjunum dragi niður hagvöxt á evrusvæðinu það sem eftir er árs.
- Verðbólga á evrusvæðinu í apríl var óbreytt á milli mánaða í 2,2%. Verðbólga var umfram væntingar. Árshækkun þjónustuverðs, sem ECB álítur helsta mælikvarða á innlendan verðþrýsting, hækkaði úr 3,5% í 3,8%. Hækkunin setur Seðlabanka Evrópu í eins konar klemmu hvað varðar næstu vaxtaákvarðanir, en bankinn hóf vaxtalækkunarferil síðasta sumar.
- S&P hækkaði lánshæfismat Landsbankans úr BBB+ í A-.
- Festi (fjárfestakynning), Hagar, Icelandair (fjárfestakynning), Landsbankinn, Play, Síminn, Skagi og Skel birtu uppgjör.
- Orkuveita Reykjavíkur hélt útboð á grænum skuldabréfum og Síminn hélt útboð á víxlum.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
7. maí 2025
Ætla má að um þriðjungur íslenskra vara sem fluttar eru frá Íslandi til Bandaríkjanna sé undanþeginn þeim tollum sem nú eru í gildi, til dæmis lyf og flestar lækningavörur. Óvissa um framvindu mála í alþjóðaviðskiptum getur samt ein og sér leitt til þess að fyrirtæki halda að sér höndum og ráðast síður í nýjar fjárfestingar. Á síðasta ári fór um 12% af vöruútflutningi Íslands til Bandaríkjanna.
2. maí 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
2. maí 2025
Ör fólksfjölgun og hækkun húsnæðisverðs hefur aukið eftirspurn eftir leiguíbúðum. Stærstur hluti Airbnb-íbúða er nú leigður út af leigusölum með fleiri en tvær íbúðir í útleigu. Frumvarp um hert skilyrði um skammtímaleigu hefur verið sett í samráðsgátt. Hömlur á skammtímaleigu gætu aukið framboð leiguíbúða og jafnvel söluframboð.
29. apríl 2025
Verðbólga mældist 4,2% í apríl og hækkaði úr 3,8% frá því í mars. Verðbólga var umfram okkar spá, einkum vegna þess að reiknuð húsaleiga og verð á matvörum hækkaði meira en við bjuggumst við.
28. apríl 2025
Alþjóðagjaldeyrissjóðurinn (AGS) birti nýja efnahagsspá um páskana. Hagvaxtarhorfur í heiminum hafa verið færðar niður og AGS telur að spenna í alþjóðaviðskiptum og veruleg óvissa komi til með að draga úr umsvifum í heimshagkerfinu.
28. apríl 2025
Hagstofan birtir verðbólgutölur fyrir aprílmánuð á morgun og við búumst við að verðbólga hækki tímabundið upp í 4%. Í vikunni fáum við fyrstu uppgjör fyrir fyrsta ársfjórðung og fyrsta mat á hagvexti í Bandaríkjunum og á evrusvæðinu á fyrsta ársfjórðungi.
23. apríl 2025
Við teljum horfur á tiltölulega hófstilltum verðhækkunum á íbúðamarkaði næstu árin, 5,9% hækkun á þessu ári, 4,8% hækkun á næsta ári og 6,4% hækkun árið 2027. Til samanburðar hefur íbúðaverð hækkað um 9% á ári að jafnaði frá aldamótum, og að meðaltali um 13% á ári frá árinu 2021.
22. apríl 2025
Leiguverð hefur hækkað um 11,3% á síðustu tólf mánuðum, þó nokkuð meira en íbúðaverð sem hefur hækkað um 8% á sama tímabili. Hækkanir á íbúða- og leigumarkaði eru þó nokkuð umfram almennar verðhækkanir í landinu, en verðbólga mældist 3,8% í mars. Áfram er kraftur í innlendri neyslu, greiðslukortavelta heimila hefur aukist statt og stöðugt síðustu mánuði og var 1,8% meiri í mars síðastliðnum en í mars í fyrra.
16. apríl 2025
Sviptingar í alþjóðaviðskiptum gætu haft margvísleg áhrif á ferðaþjónustu hér á landi. Tollar gætu rýrt kaupmátt Bandaríkjamanna og haft áhrif á komur þeirra hingað til lands. Auk þess eru merki um að áhugi Evrópubúa á að heimsækja Bandaríkin fari dvínandi, sem gæti haft áhrif hingað heim, enda hafa Evrópubúar gjarnan komið við á Íslandi á leið sinni vestur um haf. Í nýrri hagspá gerum við ráð fyrir samdrætti í ferðaþjónustu á þessu ári, en að hún taki aftur við sér á næstu tveimur árum.
14. apríl 2025
Í síðustu viku birtum við hagspá til næstu ára þar sem við spáum 1,4% hagvexti í ár og um 2% hagvexti næstu árin. Ferðamönnum fækkaði um 13,8% milli ára í mars. Skráð atvinnuleysi í mars var 0,4 prósentustigum hærra en í mars í fyrra. Þau tíðindi bárust einnig að skuldabréfaeigendur ÍL-sjóðs hefðu samþykkt að breyta skilmálum bréfanna sem heimilar útgefanda að gera upp bréfin. Í þessari viku birtir svo HMS vísitölu íbúðaverðs og leiguverðs.