Sumarhúsum fjölgar jafnt og þétt
Sumarhús á Íslandi voru rúmlega 15 þúsund í lok ársins 2024, rúmlega 45% fleiri en árið en fjölgunin hefur haldist nokkuð stöðug frá árinu 2015. Sumarhúsum fjölgaði um rúm 31% á milli áranna 2005 og 2015, en um rúm 10% á árunum 2015-2024.
Flest sumarhús á Suður- og Vesturlandi
Rúmlega helmingur sumarhúsa á landinu var á Suðurlandi í árslok 2024 og rétt tæplega fjórðungur á Vesturlandi. Á síðustu 20 árum hefur sumarhúsum þó fjölgað hlutfallslega mest á Norðurlandi, um 57,3%. Frá árinu 2005 hefur sumarhúsum á Suðurlandi fjölgað um 56,6% og um 30,8% á Vesturlandi.
Sala eykst á ný
Velta með sumarhús hefur verið mjög mismikil eftir árum, ef marka má kaupskrá Húsnæðis- og mannvirkjastofnunar. Kaupsamningum fjölgaði þó nokkuð á uppgangstíma ferðaþjónustunnar á árunum 2016-2017. Þeim fækkaði svo árið 2018 og sérstaklega árið 2019 þegar hægði á í efnahagslífinu, ekki síst í tengslum við fall WOW air. Faraldurinn blés nýju lífi í sumarhúsakaup og kaupsamningum fjölgaði um 84% á milli áranna 2019 og 2020. Ferða- og samkomutakmarkanir breyttu neyslumynstri auk þess sem opinber stuðningur við framkvæmdir og viðhald hlýtur að hafa spilað inn í. Kaupsamningum um sumarhús fjölgaði áfram árið 2021, um 25%. Árin 2022 og 2023 hægðist um og kaupsamningum fækkaði um að meðaltali 20% hvort ár. Á síðasta ári virðist aftur hafa glaðnað yfir markaðnum og kaupsamningar um sumarhús voru 25% fleiri en árið á undan.
Hér er einungis stuðst við þá kaupsamninga sem HMS metur nothæfa í vísitöluútreikning og samanburð. Samningur getur verið metinn ónothæfur ef hann er á milli skyldmenna, vegna fleiri en einnar fasteignar, ef fasteign er seld að hluta eða ef greitt er með lausafé svo eitthvað sé nefnt.
Hóflegar verðhækkanir
Í takt við stóraukna eftirspurn hækkaði verð á sumarhúsum hressilega á tímum faraldursins, um allt að 24% á milli ára. Á síðustu tveimur árum hefur hægt töluvert á verðhækkunum. Meðalfermetraverð seldra sumarhúsa var um 562 þúsund á síðasta ári og hækkaði um 2,9% á milli ára á sama tíma og kaupsamningum fjölgaði um rúmlega 25%. Hér má þó hafa í huga að sumarhús geta verið mjög fjölbreytt að stærð og gerð og því ber að taka meðaltölum með fyrirvara.
Meðalfermetraverð á sumarhúsum og meðalfermetraverð á íbúðarhúsnæði á landsbyggðinni hefur þróast með svipuðum hætti á síðustu árum. Í fyrra hækkaði meðalfermetraverð á sumarhúsum (+2,9%) þó mun minna en á íbúðarhúsnæði á landsbyggðinni (+9,9%).
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
