Vikubyrjun 22. júní 2026
Í vikunni fáum við verðbólgutölur fyrir júnímánuð, en við spáum því að verðbólga mælist 5,1% og standi í stað á milli mánaða. Í liðinni viku komu nýjar kortaveltutölur frá Seðlabankanum sem sýna að það hægir á vexti neyslunnar, en þó eru ekki merki um snöggkólnun líkt og fyrri gögn, sem nú hafa verið leiðrétt, höfðu bent til.
22. júní 2026
Vikan framundan
- Á miðvikudag birtir Hagstofan vísitölu launa.
- Á fimmtudag birtir Hagstofan veltu skv. VSK-skýrslum á tímabilinu mars-apríl.
- Á föstudag birtir Hagstofan vísitölu neysluverðs í júní og Seðlabankinn birtir Hagvísa.
Mynd vikunnar
Olíuverð lækkaði skarpt í síðustu viku samfara fréttum af því að Bandaríkjamenn og Íranar væru að ná saman varðandi deiluna við Persaflóa. Um miðja síðustu viku var undirrituð viljayfirlýsing um að stöðva átök og hefja frekari samningaviðræður. Við það fór heimsmarkaðsverð á olíu (Brent) niður fyrir 80 USD/fatið og hefur ekki verið lægra síðan í byrjun mars, en hæst fór það upp í um 120 USD/fatið. Helsti óvissuþátturinn í verðbólguspá okkar er þróun olíuverðs. Við hækkuðum spá okkar við síðustu birtingu og gerum nú ráð fyrir hærra verði lengur en áður. Nýjustu vendingar benda þó til þess að við séum mögulega að ofspá olíuverði fram á við og gætu verðbólguspár því lækkað á komandi vikum haldi þessi þróun áfram. Þó er vert að nefna að staðan breytist hratt og á meðan Hormússundið er enn lokað er alls óvíst hvort verðið lækki mikið meira. Hagstofan birtir á föstudag júnímælingu vísitölu neysluverðs og samhliða munum við birta nýja bráðabirgðaspá til næstu þriggja mánaða.
Það helsta frá vikunni sem leið
- Alls nam greiðslukortavelta heimilanna um 130 mö.kr. í maí og jókst aðeins um 0,1% á milli ára, að teknu tilliti til verðlag og gengis. Í uppfærslu á tölunum í síðustu viku kom fram að mikill samdráttur hefði verið í kortaveltu Íslendinga í apríl. Greiðslukortavelta heimilanna dróst því minna saman en fyrri gögn sýndu.
- Vísitala íbúðaverðs lækkaði um 0,4% á milli mánaða í maí. Lækkunin var drifin áfram af sérbýli á höfuðborgarsvæðinu, en sérbýli geta verið mjög mismunandi og best er að lesa ekki of mikið í þessa lækkun. Fjölbýli á höfuðborgarsvæðinu hefur aftur á móti haldist nokkuð stöðugt á síðustu misserum og gefur að okkar mati bestu mynd af þróun íbúðaverðs. Raunverð íbúða hefur nú lækkað sjö mánuði í röð og ef vísitala íbúðaverðs er leiðrétt fyrir almennt verðlag (VNV án húsnæðis) nemur árslækkunin í maí um 2,4%.
- Vísitala leiguverðs hækkaði um 0,39% á milli mánaða. Síðustu tólf mánuði mælist hækkunin 4,87%.
- HMS birti nýja mánaðarskýrslu þar sem meðal annars kemur fram að auglýsingatími íbúða hefur lengst talsvert, sér í lagi nýrra íbúða. Rúmlega þriðjungur alls framboðs af nýjum íbúðum til sölu hefur verið á söluskrá í meira en eitt ár; hlutfallið mælist 17% meðal annarra íbúða.
- Seðlabanki Bandaríkjanna ákvað að halda vöxtum óbreyttum á fundi sínum í vikunni. Þetta var fyrsti fundur bankans eftir að Kevin Warsh var skipaður seðlabankastjóri og fundurinn bar að einhverju leyti merki um breyttar áherslur. Yfirlýsingin var styttri en áður og innihélt enga beina framsýna leiðsögn. Samkvæmt punktspá (e. dot plot) gera flestir meðlimir peningastefnunefndarinnar ráð fyrir að vextir verði að meðaltali hærri en þeir gerðu ráð fyrir í mars. Warsh tók ekki þátt í punktspánni enda vill hann síður gefa upplýsingar um skoðun sína fram á við.
- Verðbólga í Bretlandi hélst óbreytt á milli mánaða, í 2,8%, en spár höfðu gert ráð fyrir lítils háttar aukningu. Englandsbanki hélt í kjölfarið vöxtum óbreyttum.
- Alvotech lauk hlutafjárútboði í Bandaríkjunum. Lánamál ríkisins héldu útboð á ríkisbréfum. Landsbankinn gaf út víkjandi forgangsbréf í norskum og sænskum krónum. Reykjavíkurborg birti uppgjör. Bera hf. lauk sölu á nýjum skuldabréfaflokki. Nova gekk frá kaupum á Ofar.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
18. júní 2026
Vísitala íbúðaverðs lækkaði um 0,4% á milli mánaða í maí. Árshækkun vísitölunnar mælist nú 2,2% og er talsvert lægri en hækkanir á almennu verðlagi. Raunverð íbúða hefur því lækkað um 2,4% á milli ára og maí er sjötti mánuðurinn í röð þar sem raunverð lækkar á þann mælikvarða. Velta á íbúðamarkaði hefur jafnframt verið talsvert minni það sem af er ári en á sama tímabili í fyrra.
16. júní 2026
Kortavelta íslenskra heimila stóð nokkurn veginn í stað á milli ára í maí, að teknu tillit til verðlags og gengis. Tölur fyrir apríl voru jafnframt leiðréttar upp á við en þær höfðu sýnt töluverðan samdrátt. Gömlu apríltölurnar voru birtar daginn fyrir ákvörðun peningastefnunefndar og hafa mögulega haft áhrif á ákvörðunina. Uppfærðar tölur benda til þess að áfram hægi á vexti einkaneyslu, en ekki til snöggkólnunar eins og apríltölurnar gáfu til kynna.
15. júní 2026
Erlendum ferðamönnum fjölgaði í maí þrátt fyrir minna flugframboð en utanlandsferðir Íslendinga eru færri. Skráð atvinnuleysi mældist 4,2% í maí.
12. júní 2026
Fjölgun sumarhúsa hér á landi hefur haldist nokkuð stöðug síðasta áratug, en rúmlega helmingur sumarhúsa landsins er staðsettur á Suðurlandi. Kaupsamningum hefur fækkað lítillega frá því í fyrra og verðhækkanir hafa verið hóflegar.
11. júní 2026
Við spáum því að verðbólga standi í stað í júní og mælist aftur 5,1%. Ferðaþjónustutengdir liðir hækka alla jafna í júní og mun verð á flugfargjöldum til útlanda hafa mest áhrif til hækkunar, gangi spáin eftir. Við gerum einnig ráð fyrir hækkun á hótelum og veitingastöðum í júnímælingunni. Við gerum ráð fyrir að verðbólga aukist næstu mánuði og teljum nánast öruggt að forsendur kjarasamninga bresti í ágúst.
8. júní 2026
Á fyrsta ársfjórðungi mældist minni halli á viðskiptum við útlönd en á sama tíma í fyrra. Í síðustu viku birti HMS fasteignamat fyrir 2027, en fasteignamat lækkaði að raunvirði á milli ára.
1. júní 2026
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
1. júní 2026
Samkvæmt fyrsta mati Hagstofunnar mældist 2,7% hagvöxtur á fyrsta ársfjórðungi. Vísitala neysluverðs hækkaði um 0,07% á milli mánaða og verðbólga lækkaði því úr 5,2% í 5,1%.
29. maí 2026
Landsframleiðsla jókst um 2,7% á milli ára að raunvirði á fyrsta fjórðungi ársins. Mest var framlag utanríkisviðskipta til hagvaxtar sem skýrist að mestu af auknum umsvifum gagnavera. Einkaneysla jókst einnig á fjórðungnum þó hægt hafi á vexti hennar.
28. maí 2026
Vísitala neysluverðs hækkaði um 0,07% á milli mánaða og verðbólga lækkar því úr 5,2% í 5,1%. Við höfðum spáð því að verðbólga myndi lækka í 4,9%. Hækkun á flugfargjöldum hafði mest áhrif til hækkunar á ársverðbólgu í mánuðinum en lækkun á virðisaukaskatti á eldsneyti hafði mest áhrif til lækkunar. Án lækkunarinnar á virðisaukaskatti hefði verðbólga mælst 5,5%. Athygli vekur að verð á mat og drykk lækkaði á milli mánaða, annan mánuðinn í röð.