Íbúðaverð stendur nánast í stað
Vísitala íbúðaverðs hefur hækkað um 1,6% á síðustu tólf mánuðum samkvæmt nýjustu gögnum HMS og hefur ársbreyting ekki mælst jafn lág síðan í júlí 2023. Árshækkun íbúðaverðs hélst nokkuð stöðug fyrstu fimm mánuði ársins, eða á bilinu 2,2-2,6%, en lækkaði í 1,8% í júní og 1,6% í júlí.
Á síðustu tólf mánuðum hefur íbúðaverð hækkað þó nokkuð minna en verðbólga, sem þýðir að raunverð íbúða hefur lækkað og er nú 3,0% lægra en á sama tíma í fyrra. Raunverð hefur dregist samfellt saman á milli ára níu mánuði í röð. Raunverð fæst með því að líta til íbúðaverðs að teknu tilliti til verðbólgu og notum við vísitölu neysluverðs án húsnæðis til þess. Raunverð lækkar þannig á milli ára ef árshækkun íbúðaverðs er minni en samsvarandi hækkun á vísitölu neysluverðs án húsnæðis.
Íbúðir á höfuðborgarsvæðinu hækkuðu meira en á landsbyggðinni
Hækkunin í júlí var drifin áfram af eignum á höfuðborgarsvæðinu. Verð á sérbýli á höfuðborgarsvæðinu hækkaði um 0,8% og fjölbýli um 0,5%. Bæði verð á sérbýli og fjölbýli á landsbyggðinni lækkaði um 1,2%. Rétt er að hafa í huga að verð á sérbýli sveiflast mun meira en verð á fjölbýli, enda eru sérbýli færri og fjölbreyttari en íbúðir í fjölbýli. Skammtímabreytingar á verði sérbýlis segja því minna um undirliggjandi verðþrýsting á íbúðamarkaði. Þróun verðs á fjölbýli á höfuðborgarsvæðinu, sem gefur skýrari mynd af undirliggjandi þróun íbúðaverðs, hefur haldist nokkuð stöðug á síðustu misserum að júní undanskildum en þá lækkaði verð á fjölbýli á höfuðborgarsvæðinu um 1,2%. Á síðustu tólf mánuðum hefur verð hækkað meira á höfuðborgarsvæðinu en á landsbyggðinni, eða um 1,8% á höfuðborgarsvæðinu og um 1,3% á landsbyggðinni.
Velta á íbúðamarkaði minni það sem af er ári en í fyrra
Velta á íbúðamarkaði er töluvert minni fyrstu sjö mánuði ársins en á sama tíma í fyrra, en alls voru um 900 kaupsamningar undirritaðir í júlí. Undirrituðum kaupsamningum fækkaði um 14% á milli ára í júlí. Þróunin síðustu mánuði bendir því til áframhaldandi hægagangs á íbúðamarkaði, bæði hvað varðar verðhækkanir og umsvif.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
