16. janúar 2023
Vikan framundan
- Í dag birtir Seðlabankinn tölur um veltu greiðslukorta í desember.
- Á þriðjudag birtir Húsnæðis- og mannvirkjastofnun vísitölu íbúðaverðs á höfuðborgarsvæðinu.
- Á miðvikudag fáum við verðbólgutölur frá Bretlandi.
Mynd vikunnar
Tæplega 1,7 milljónir erlendra farþega fóru um Leifsstöð í fyrra. Fimm fjölmennustu þjóðirnar voru Bandaríkjamenn, Bretar, Þjóðverjar, Frakkar og Pólverjar. Bandaríkjamenn eru langfjölmennasti ferðamannahópurinn á sumrin en Bretar eiga það til að koma frekar utan háannatíma. Þannig komu fleiri Bretar en Bandaríkjamenn í desember, en á háannatímanum (júlí og ágúst) voru farþegar frá Bandaríkjunum rúmlega sex sinnum fleiri en farþegar frá Bretlandi.
Helsta frá vikunni sem leið
- Í síðustu viku fóru fram verðmælingar vegna janúarmælingu vísitölu neysluverðs. Við spáum því að vísitalan hækki um 0,31% milli mánaða í janúar. Gangi spáin eftir lækkar ársverðbólgan úr 9,6% í 9,4%. Það hefur ekki orðið veruleg breyting á verðbólguhorfum til næstu mánaða frá því við birtum síðast spá í lok desember. Við eigum enn von á að verðbólgan hjaðni rólega á næstu mánuðum og fari niður fyrir 8% í apríl. Við gerum þó ráð fyrir ögn hægari hjöðnun nú, m.a. vegna hærra matvælaverðs.
- Rétt tæplega 1,7 milljónir erlendra ferðamanna lögðu upp frá Keflavíkurflugvelli árið 2022, sem gerir það fimmta stærsta ferðamannaárið frá upphafi. Ferðamenn voru tæplega 115 þúsund í desember, þó nokkuð færri en í sama mánuði árin 2019 og 2018. Hver ferðamaður eyddi að jafnaði meiru en þá miðað við fast gengi.
- Skráð atvinnuleysi var 3,4% í desember. Atvinnuleysi lækkaði nokkuð á síðasta ári, en til samanburðar var það 4,9% í desember 2021. Lækkunin átti sér aðallega stað á fyrri helmingi ársins, en atvinnuleysið hefur legið á bilinu 3,2% til 3,4% síðan í júlí á síðasta ári. Við teljum þetta nokkuð nálægt jafnvægi og ólíklegt að það fari mikið neðar. Atvinnuleysi í desember var mest á Suðurnesjum, en minnst á Norðurlandi vestra.
- Ársverðbólgan í Bandaríkjunum mældist 6,5% í desember sem var í samræmi við væntingar markaðsaðila. Þetta var sjötti mánuðurinn í röð þar sem verðbólga hjaðnar í Bandaríkjunum en verðbólgan fór hæst í 9,1% í júní í fyrra. Seðlabanki Bandaríkjanna hækkaði stýrivexti um 0,5 prósentustig í desember en hann hefur gefið í skyn að næstu skref verði smærri og búast markaðsaðilar við 0,25 prósentustiga hækkun í febrúar.
- Við birtum Hagsjá þar sem við svörum því af hverju krónan hefur veikst í vetur.
- Á skuldabréfamarkaði voru tvö útboð: Landsbankinn hélt útboð á sértryggðum skuldabréfum og Reykjavíkurborg hélt skuldabréfaútboð. Arion banki birti útgáfuáætlun fyrir 2023.
- Á hlutabréfamarkaði birtu Hagar (fjárfestakynning) og Ölgerðin árshlutauppgjör. Alvotech tilkynntu að félagið hefði hafið rannsókn á lyfjahvörfum AVT05 og að félagið hefði gert samkomulag við Fuji Pharma um samstarf á Japansmarkaði. Íslandsbanki birti samantekt á áliti greinanda vegna 4F 2022 ársuppgjörsins.
Hagtölur og markaðsupplýsingar
Þú gætir einnig haft áhuga á
18. sept. 2026
Kortavelta Íslendinga, að teknu tilliti til verðlags og gengis, dróst saman í ágúst og samdrátturinn hefur ekki mælst meiri síðan á síðari hluta árs 2023. Innanlands eyddu Íslendingar minna en á sama tíma í fyrra og vöxturinn í neyslu erlendis var minni en á síðustu mánuðum.
17. sept. 2026
Við spáum því að vísitala neysluverðs hækki um 0,23% í september og að ársverðbólga aukist úr 5,6% í 5,8%. Eldsneytisverð hækkaði skarpt um mánaðamótin þegar tímabundin lækkun virðisaukaskatts féll úr gildi. Á móti kemur að flugfargjöld til útlanda lækka í takt við árstíðasveiflu. Hærri komugjöld á heilsugæslu og gjöld vegna skimunar munu svo einnig hafa áhrif í mánuðinum.
14. sept. 2026
Fjöldi erlendra ferðamanna sem komu til landsins í ágúst stóð nánast í stað á milli ára, en utanlandsferðum Íslendinga fækkaði um 10% á sama tíma. Í síðustu viku birti fjármálaráðherra fjárlagafrumvarp fyrir næsta ár. Í vikunni fáum við vísitölu íbúðaverðs og gögn um kortaveltu í ágúst.
9. sept. 2026
Um 150 milljarða króna halli mældist á viðskiptum við útlönd á fyrstu sex mánuðum ársins. Þrátt fyrir það hefur krónan styrkst. Skýringin er líklega sú að viðskiptum við útlönd fylgir ekki alltaf samsvarandi gjaldeyrisflæði. Viðskiptajöfnuður mælir tekjur og gjöld samkvæmt uppgjörsreglum en gengið ræðst af raunverulegum og væntum kaupum og sölu á gjaldeyri.
7. sept. 2026
Hagkerfið dróst saman um 1,1% á milli ára á öðrum ársfjórðungi. Samkvæmt fundargerð peningastefnunefndar ræddi nefndin að hækka vexti um 0,25 prósentustig eða halda þeim óbreyttum á fundi sínum í ágúst.
1. sept. 2026
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
31. ágúst 2026
Landsframleiðsla dróst saman um 1,1% á milli ára á öðrum ársfjórðungi. Samdráttur í vöruútflutningi, sér í lagi áli og sjávarafurðum skýrir samdráttinn að mestu. Minni vöxtur var í einkaneyslu. Fjárfesting, önnur en atvinnuvega, dróst saman.
31. ágúst 2026
Verðbólga mældist 5,6% í ágúst. Samkvæmt VSK-skýrslum jókst velta í helstu útflutningsgreinum í maí og júní, að ferðaþjónustu undanskilinni. Mörg félög í kauphöllinni birtu uppgjör í síðustu viku. Í dag birtir Hagstofan þjóðhagsreikninga fyrir annan ársfjórðung.
27. ágúst 2026
Vísitala neysluverðs hækkaði um 0,20% á milli mánaða í ágúst og verðbólga hækkar því úr 5,3% í 5,6%. Við spáðum 5,5% verðbólgu í ágúst. Áhrif sólmyrkvans á verðmælingar í mánuðinum voru hóflegri en við höfðum spáð. Verðhækkanir í mánuðinum voru því á breiðari grunni en við gerðum ráð fyrir í spánni. Það er óheppileg þróun, haldi hún áfram.
26. ágúst 2026
Velta í flestum útflutningsreinum jókst í maí og júní að ferðaþjónustu undanskilinni, samkvæmt nýjum VSK-skýrslum. Aukna veltu útflutningsgreina má að miklu leyti rekja til hagfelldrar þróunar á heimsmarkaðsverði frekar en meiri framleiðslu. Á sama tíma sjást merki um kólnun í innlenda hagkerfinu, einkum í greinum sem reiða sig meira á innlenda eftirspurn.