Vikubyrjun 15. apríl 2024
Verðbólga hjaðnar þó nokkuð í apríl, úr 6,8% í 6,1%, en breytist lítið næstu mánuði þar á eftir og verður 5,9% í júlí, samkvæmt okkar nýjustu verðbólguspá. Þótt vaxtahækkanir hafi slegið nokkuð á eftirspurn má enn greina kraft í hagkerfinu og spennu á vinnumarkaði. Þá mælast verðbólguvæntingar enn vel yfir markmiði.
15. apríl 2024
Peningastefnunefnd Seðlabankans kemur saman snemma í maí og ef mat þeirra á verðbólguhorfum er það sama og okkar teljum við líklegt að þau bíði með vaxtalækkanir fram yfir sumarmánuðina.
Vikan framundan
- Á þriðjudag birtir Seðlabankinn gögn um greiðslumiðlun í mars og Húsnæðis- og mannvirkjastofnun birtir vísitölu íbúðaverðs.
- Á fimmtudag birtir Ölgerðin ársuppgjör.
- Á föstudag birti Sjóvá árshlutauppgjör.
Mynd vikunnar
Við spáum því að verðbólga hjaðni úr 6,8% í 6,1% í apríl og mælist áfram 6,1% í maí. Svo teljum við að hún haldist nokkurn veginn óbreytt í júní og júlí í 5,9%. Hjöðnunin sem við sjáum fyrir okkur í apríl skýrist helst af svokölluðum grunnáhrifum. Grunnáhrif verða vegna þess að verðbólga segir til um breytingar á vísitölu neysluverðs síðustu 12 mánuði. Vísitalan hækkaði verulega í apríl á síðasta ári og nú í apríl dettur sú hækkun loks út úr verðbólgumælingunni. Mánuðina á eftir eru engin jafnskýr grunnáhrif í augsýn og líkur á þrálátri verðbólgu á sumarmánuðunum.
Það helsta frá vikunni sem leið
- Um 173.300 erlendir ferðamenn fóru um Keflavíkurflugvöll í mars og hafa aldrei verið fleiri í marsmánuði, samkvæmt tölum Ferðamálastofu sem voru birtar í síðustu viku. Hugsanlega héldu jarðhræringar á Reykjanesskaga lítillega aftur af komum ferðamanna í desember og janúar sl. en eftir það er ekki að sjá að hamfarirnar hafi áhrif á heimsóknir hingað til lands. Íslendingar fóru 36 þúsund utanlandsferðir í mars, 16 þúsund fleiri en farnar voru í mars í fyrra, enda byrjuðu páskar í mars í ár en í apríl í fyrra. Ferðir Íslendinga á fyrstu þremur mánuðum þessa árs eru 8,1% fleiri en á fyrstu þremur mánuðum síðasta árs.
- Skráð atvinnuleysi mældist 3,8% í mars samkvæmt nýjustu mánaðarskýrslu Vinnumálastofnunar. Það minnkaði úr 3,9% frá febrúarmánuði en er 0,3 prósentustigum meira en í mars á síðasta ári. Atvinnulausum fækkaði í flestum atvinnugreinum en mest í greinum tengdum ferðaþjónustu.
- Við birtum verðbólguspá fyrir aprílmánuð og til næstu þriggja mánaða. Við teljum að verðbólga mælist 6,1% í apríl og maí og 5,9% í júní og júlí.
- Verðbólga í Bandaríkjunum mældist 3,5% í mars, lítillega umfram væntingar og 0,3 prósentustigum umfram verðbólgu í febrúar. Markaðsaðilar vestanhafs telja nú ólíklegt að vaxtalækkunarferli hefjist fyrr en í fyrsta lagi í september.
- Evrópski seðlabankinn hélt vöxtum óbreyttum í liðinni viku en gaf í skyn að fljótlega yrði hægt að slaka á taumhaldinu ef verðbólga héldi áfram að mjakast í átt að markmiði.
- Arion banki birti niðurstöðu útboðs sértryggðra skuldabréfa.
- Lánamál ríkisins birtu niðurstöður í útboði ríkisskuldabréfa, auk niðurstaða úr viðbótarútgáfu. Lánamál ríkisins birtu einnig niðurstöðu úr útboði ríkisvíxla.
- Alma íbúðafélag birti niðurstöðu skuldabréfaútboðs frá 9. apríl.
- Útgerðarfélag Reykjavíkur lauk útgáfu á nýjum skuldabréfaflokki UR 260415.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
7. maí 2025
Ætla má að um þriðjungur íslenskra vara sem fluttar eru frá Íslandi til Bandaríkjanna sé undanþeginn þeim tollum sem nú eru í gildi, til dæmis lyf og flestar lækningavörur. Óvissa um framvindu mála í alþjóðaviðskiptum getur samt ein og sér leitt til þess að fyrirtæki halda að sér höndum og ráðast síður í nýjar fjárfestingar. Á síðasta ári fór um 12% af vöruútflutningi Íslands til Bandaríkjanna.
5. maí 2025
Í apríl jókst verðbólga úr 3,8% í 4,2%, nokkuð umfram okkar spá um 4,0% verðbólgu. Velta samkvæmt VSK-skýrslum jókst á milli ára í flestum atvinnugreinum á fyrstu tveimur mánuðum ársins. Á fyrsta ársfjórðungi mældist hagvöxtur á evrusvæðinu en samdráttur í Bandaríkjunum. Í þessari viku er vaxtaákvörðun í Bandaríkjunum og einnig í Bretlandi.
2. maí 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
2. maí 2025
Ör fólksfjölgun og hækkun húsnæðisverðs hefur aukið eftirspurn eftir leiguíbúðum. Stærstur hluti Airbnb-íbúða er nú leigður út af leigusölum með fleiri en tvær íbúðir í útleigu. Frumvarp um hert skilyrði um skammtímaleigu hefur verið sett í samráðsgátt. Hömlur á skammtímaleigu gætu aukið framboð leiguíbúða og jafnvel söluframboð.
29. apríl 2025
Verðbólga mældist 4,2% í apríl og hækkaði úr 3,8% frá því í mars. Verðbólga var umfram okkar spá, einkum vegna þess að reiknuð húsaleiga og verð á matvörum hækkaði meira en við bjuggumst við.
28. apríl 2025
Alþjóðagjaldeyrissjóðurinn (AGS) birti nýja efnahagsspá um páskana. Hagvaxtarhorfur í heiminum hafa verið færðar niður og AGS telur að spenna í alþjóðaviðskiptum og veruleg óvissa komi til með að draga úr umsvifum í heimshagkerfinu.
28. apríl 2025
Hagstofan birtir verðbólgutölur fyrir aprílmánuð á morgun og við búumst við að verðbólga hækki tímabundið upp í 4%. Í vikunni fáum við fyrstu uppgjör fyrir fyrsta ársfjórðung og fyrsta mat á hagvexti í Bandaríkjunum og á evrusvæðinu á fyrsta ársfjórðungi.
23. apríl 2025
Við teljum horfur á tiltölulega hófstilltum verðhækkunum á íbúðamarkaði næstu árin, 5,9% hækkun á þessu ári, 4,8% hækkun á næsta ári og 6,4% hækkun árið 2027. Til samanburðar hefur íbúðaverð hækkað um 9% á ári að jafnaði frá aldamótum, og að meðaltali um 13% á ári frá árinu 2021.
22. apríl 2025
Leiguverð hefur hækkað um 11,3% á síðustu tólf mánuðum, þó nokkuð meira en íbúðaverð sem hefur hækkað um 8% á sama tímabili. Hækkanir á íbúða- og leigumarkaði eru þó nokkuð umfram almennar verðhækkanir í landinu, en verðbólga mældist 3,8% í mars. Áfram er kraftur í innlendri neyslu, greiðslukortavelta heimila hefur aukist statt og stöðugt síðustu mánuði og var 1,8% meiri í mars síðastliðnum en í mars í fyrra.
16. apríl 2025
Sviptingar í alþjóðaviðskiptum gætu haft margvísleg áhrif á ferðaþjónustu hér á landi. Tollar gætu rýrt kaupmátt Bandaríkjamanna og haft áhrif á komur þeirra hingað til lands. Auk þess eru merki um að áhugi Evrópubúa á að heimsækja Bandaríkin fari dvínandi, sem gæti haft áhrif hingað heim, enda hafa Evrópubúar gjarnan komið við á Íslandi á leið sinni vestur um haf. Í nýrri hagspá gerum við ráð fyrir samdrætti í ferðaþjónustu á þessu ári, en að hún taki aftur við sér á næstu tveimur árum.