Hagstofan áætlar að hagvöxtur hafi verið 2,6% á fyrsta fjórðungi ársins. Vöxtinn má einkum rekja til aukinnar fjárfestingar í tengslum við uppbyggingu á gagnaverum, en atvinnuvegafjárfesting jókst um 19,6%. Einnig jókst íbúðafjárfesting áfram af krafti og var 22,4% meiri en á fyrsta fjórðungi síðasta árs. Einkaneysla jókst um 2,3% og bílakaup hafa tekið að færast í aukana eftir samdrátt undanfarinna fjórðunga. Einnig hafa neysluútgjöld Íslendinga erlendis aukist í takt við fjölgun utanlandsferða.
Seðlabankinn lækkaði stýrivexti um 0,25 prósentustig í maí. Meginvextir Seðlabankans standa nú í 7,5% og hafa verið lækkaðir á síðustu fimm fundum nefndarinnar, úr 9,25%. Á kynningarfundi peningastefnunefndar í kjölfar vaxtaákvörðunarinnar kom fram að verðbólga þyrfti að færast nær markmiði til þess að hægt væri að halda vaxtalækkunarferlinu áfram.
Verðbólga var 3,8% í maí. Hún þróaðist nokkurn veginn í takt við væntingar, örlítið undir okkar spá um 3,9% verðbólgu. Dregið hefur úr verðþrýstingi á innfluttum vörum, líklega ekki síst vegna gengisstyrkingar. Flugfargjöld lækkuðu þó nokkuð í maí eftir verulega hækkun í apríl í tengslum við páska. Við spáum 3,9% verðbólgu í júní, 3,6% í júlí og 3,8% í ágúst, en teljum að verðbólga aukist svo lítillega á ný í haust. Verðbólgutala júlímánaðar verður sú nýjasta þegar peningastefnunefnd kemur saman í ágúst.
Íbúðaverð hefur haldið áfram að hækka, samkvæmt nýjustu gögnum HMS sem ná yfir aprílmánuð. Íbúðaverð hefur hækkað um tæplega 7,6% á síðustu tólf mánuðum, þó nokkuð meira en almennt verðlag í landinu. Velta á íbúðamarkaði er töluvert minni en hún var í byrjun síðasta árs, en þó nokkuð meiri en í byrjun árs 2023.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
