Verðbólga mældist 5,9% í september og hefur verðbólga nú mælst yfir 5% allt þetta ár. Mælingin var að mestu leyti í takt við spá okkar en mestu munaði um að flugfargjöld til útlanda lækkuðu nokkuð minna en við höfðum spáð. Eldsneytisverð skýrir langmest af hækkun verðbólgu í september, sem bæði má rekja til þess að tímabundin lækkun á virðisaukaskatti rann út um mánaðamótin og hækkunar á heimsmarkaðsverði á olíu. Áhrif hækkunar komugjalda á heilsugæslu höfðu einnig áhrif til hækkunar, í takt við spá okkar.
Peningastefnunefnd Seðlabankans fundar í næstu viku og kynnir vaxtaákvörðun sína miðvikudaginn 7. október. Nefndin hefur hækkað vexti á síðustu þremur fundum en við teljum að vaxtahækkunarferlinu sé nú lokið og gerum ráð fyrir að nefndin haldi vöxtum óbreyttum. Við síðustu vaxtaákvörðun gaf nefndin nokkuð skýrt til kynna að hún teldi aðhaldið nægjanlegt. Frá síðasta fundi hefur þróun verðbólgu verið í takt við spá Seðlabankans, verðbólguvæntingar svipaðar og hagkerfið sýnir áfram merki kólnunar.
Ágúst er þriðji mánuðurinn í röð þar sem íbúðaverð helst nánast óbreytt á milli mánaða og raunverð íbúða hefur nú lækkað tíu mánuði í röð. Það sem af er ári hafa kaupsamningar um íbúðarhúsnæði verið færri en sömu mánuði í fyrra. Skráð atvinnuleysi skv. Vinnumálastofnun mældist 3,9% í ágúst og er 0,5 prósentustigum meira en í ágúst í fyrra, sem er í takt við þróun síðustu mánaða. Greiðslukortavelta heimila dróst saman um 1,2% í ágúst sem er mesti samdráttur frá því í lok árs 2023. Það sem af er ári hafa örlítið færri ferðamenn komið til landsins en á sama tímabili í fyrra.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
