Greiðslukortavelta heimilanna jókst um 2,7% á milli ára í október, að teknu tilliti til verðlags og gengis. Þar af jókst kortavelta erlendis um 11,3% á milli ára á föstu gengi, sem sýnir að það er áfram mikill vöxtur í kortaveltu Íslendinga erlendis. Íslendingar fóru í rúmlega 14% fleiri utanlandsferðir nú í október en í fyrra, samkvæmt talningu Ferðamálastofu. Kortavelta Íslendinga erlendis kemur bæði frá kortum sem eru notuð á ferðalögum erlendis og erlendri netverslun. Kortavelta innanlands dróst einungis saman um 0,1% að raunvirði í október, sem er talsvert minni samdráttur en síðustu mánuði.
Aldrei hefur stærri hluti neyslunnar verið erlendis
Í október mældist hlutfall erlendrar neyslu Íslendinga 26% og hefur aldrei mælst hærra. Það sem af er ári hefur hlutfallið verið á bilinu 23-25,6%. Sé litið til breytingar á milli ára þá jókst kortavelta erlendis, sem fyrr segir, um 11,3% á milli ára í október miðað við fast gengi sem er meiri vöxtur en hefur sést á allra síðustu mánuðum. Frá áramótum hefur þó að jafnaði mælst um 12% aukning á milli ára á mánaðarlegri kortaveltu heimilanna erlendis, að teknu tilliti til gengis.
Hægir verulega á vexti einkaneyslu
Dregið hefur úr vexti innlendrar kortaveltu íslenskra heimila síðustu misseri. Vöxtur mælist áfram í neyslu Íslendinga erlendis þrátt fyrir að Íslendingar hafi farið í rúmlega 7% færri utanlandsferðir það sem af er ári en á sama tíma í fyrra. Í þessu samhengi ber að hafa í huga að kortavelta Íslendinga erlendis kemur bæði frá kortum sem eru notuð á ferðalögum til útlanda en einnig í erlendri netverslun sem framkvæmd er innanlands.
Háir vextir, aukið atvinnuleysi og hægari kaupmáttarvöxtur hafa dregið úr neysluvilja og neyslugetu heimila. Í nýjustu hagspá okkar gerum við ráð fyrir að einkaneysla aukist lítið í ár en taki síðan smám saman við sér þegar vextir fara að lækka og óvissa minnkar. Innlán heimila hafa aukist mikið undanfarið og við gerum ráð fyrir að hluti þess sparnaðar renni í aukna neyslu þegar fram sækir.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.










