Óbreyttir vextir í samræmi við væntingar

Nefndin ákvað að halda vöxtum óbreyttum í 8,0% í morgun. Í yfirlýsingunni er nefnt að eldsneytisverð hafi haldist hátt en að afleidd áhrif hækkunar á eldsneytisverð hafi verið minni en óttast var. Á móti vega verri hagvaxtarhorfur, ekki síst vegna hægari vaxtar einkaneyslu. Verðbólga er þó enn of há og óvissa um verðhólguhorfur enn töluverð. Nefndarmenn lýstu auknum áhyggjum af stöðu raunhagkerfisins og að áhættumatið hefði færst meira í þá átt að hætta væri á að vextir yrðu lækkaðir of seint.
| Dags. | Vikur frá síðustu ákvörðun | Ákvörðun | Atkvæði með | Atkvæði móti | Kosið annað | Meginvextir |
| 7. febrúar 2024 | 11 | óbr. | ÁJ, RS, ÁÓP, HS | GJ (-0,25%) | 9,25% | |
| 20. mars 2024 | 6 | óbr. | ÁJ, RS, ÁÓP, HS | GJ (-0,25%) | 9,25% | |
| 8. maí 2024 | 7 | óbr. | ÁJ, RS, ÁÓP, HS | AS (-0,25%) | 9,25% | |
| 21. ágúst 2024 | 15 | óbr. | ÁJ, RS, TB, ÁÓP, HS | 9,25% | ||
| 2. október 2024 | 6 | -0,25% | ÁJ, RS, TB, ÁÓP | HS (óbr.) | 9,00% | |
| 20. nóvember 2024 | 7 | -0,50% | ÁJ, RS, TB, ÁÓP, HS | 8,50% | ||
| 5. febrúar 2025 | 11 | -0,50% | ÁJ, ÞGP, TB, ÁÓP, HS | 8,00% | ||
| 19. mars 2025 | 6 | -0,25% | ÁJ, ÞGP, TB, ÁÓP, HS | 7,75% | ||
| 21. maí 2025 | 9 | -0,25% | ÁJ, ÞGP, TB, ÁÓP | HS (óbr.) | 7,50% | |
| 20. ágúst 2025 | 13 | óbr. | ÁJ, ÞGP, TB, ÁÓP, HS | 7,50% | ||
| 8. október 2025 | 7 | óbr. | ÁJ, ÞGP, TB, ÁÓP, HS | 7,50% | ||
| 19. nóvember 2025 | 6 | -0,25% | ÁJ, ÞGP, TB, ÁÓP, HS | 7,25% | ||
| 4. febrúar 2026 | 11 | óbr. | ÁJ, ÞGP, TB, ÁÓP, HS | 7,25% | ||
| 18. mars 2026 | 6 | +0,25% | ÁJ, ÞGP, TB | ÁÓP, HS (+0,50%) | 7,50% | |
| 20. maí 2026 | 9 | +0,25% | ÁJ, ÞGP, TB, ÁÓP, HS | 7,75% | ||
| 19. ágúst 2026 | 13 | +0,25% | ÁJ, ÞGP, ÁÓP, HS | TB (óbr.) | 8,00% | |
| 7. okt. 2026 | 7 | óbr. | ÁJ, ÞGP, TB, ÁÓP, HS | 8,00% | ||
| 18. nóv. 2026 | 6 | óbr. | ÁJ, ÞGP, TB, ÁÓP, HS | 8,00% |
AS: Arnór Sighvatsson, ÁJ: Ásgeir Jónsson, ÁÓP: Ásgerður Ósk Pétursdóttir, GJ: Gunnar Jakobsson, HS: Herdís Steingrímsdóttir, RS: Rannveig Sigurðardóttir, TB: Tómas Brynjólfsson, ÞGP: Þórarinn G. Pétursson
Heimild: Seðlabanki Íslands
Áhættan af því að halda vöxtum of háum er að verða meira áberandi
Samhliða vaxtaákvörðuninni birti bankinn ný Peningamál með nýrri verðbólgu- og hagvaxtarspá. Verðbólguspáin breyttist lítið frá fyrri spá og er enn gert ráð fyrir tiltölulega hraðri verðbólguhjöðnun strax á fyrstu mánuðum næsta árs. Þar er gert ráð fyrir að verðbólga verði komin niður í 4,6% á fyrsta fjórðungi næsta árs og endi í 3,1% á fjórða fjórðungi ársins.
Nefndarmenn töldu núverandi raunvaxtastig hæfilegt, en að það yrði of hátt á næsta ári ef vextir verða óbreyttir og verðbólguspá bankans gengur eftir. Nefndarmenn telja nú að áhættan af því að halda vöxtum háum of lengi sé orðin meiri en fyrr á árinu og að áhættumatið á milli þess að lækka of hratt eða of hægt sé nær jafnvægi en áður. Með öðrum orðum hefur nefndin meiri áhyggjur en áður af því að hagkerfið sé að kólna um of og slakinn í hagkerfinu gæti orðið meiri og hraðari en spáð er. Verðbólga og verðbólguvæntingar væru þrátt fyrir það ennþá of háar sem gæfi nefndinni takmarkað svigrúm til að lækka vexti.
Hagvaxtarhorfur hafa versnað
Í nýju Peningamálunum kemur fram að hagvaxtarhorfur hafi versnað. Bankinn gerir nú ráð fyrir 1% hagvexti í ár og 1,2% á næsta ári en spáin frá því í ágúst gerði ráð fyrir 1,4% vexti í ár og 1,9% á næsta ári. Gert er ráð fyrir minni einkaneyslu en áður var talið og horfur í útflutningi hafa versnað, einkum vegna verri horfa í sjávarútvegi í kjölfar síðasta loðnuleiðangurs Hafrannsóknarstofnunar.
Þetta eru merki um að þétt peningalegt aðhald hafi náð að kæla hagkerfið og því ætti verðbólga að lækka í kjölfarið.
Tónninn að breytast og styttist í lækkun ef spár ganga eftir
Það kom skýrt fram í máli seðlabankastjóranna að gangi verðbólguspáin eftir yrði núverandi vaxtaaðhald of mikið. Fyrstu verðbólgumælingar næsta árs munu því líklega skipta miklu fyrir tímasetningu vaxtalækkana. Við teljum að gangi spá Seðlabankans eftir og verðbólga mælist 4,6% á fyrsta fjórðungi næsta árs, verði hægt að lækka vexti þá.
Við gáfum nýverið út hagspá þar sem við spáum fyrstu vaxtalækkuninni í febrúar. Samkvæmt nýjustu verðbólguspá okkar mun verðbólga mælast 5,1% í janúar. Gangi sú spá eftir eykst aðhaldsstig peningastefnunnar verulega miðað við liðna verðbólgu og ætti að styrkja væntingar um að verðbólga muni lækka áfram. Við teljum því enn líkur á að fyrsta vaxtalækkunin verði í febrúar, í ljósi kólnandi hagkerfis og versnandi hagvaxtarhorfa.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.









