Spáum 6,0% verðbólgu í nóvember
Vísitala neysluverðs hækkaði um 0,46% í október og ársverðbólga stóð í stað í 5,9%. Við spáum nú 0,41% lækkun vísitölunnar í nóvember og að ársverðbólga hækki í 6,0%. Ástæða hækkunar á verðbólgu er að lækkunin á milli mánaða í nóvember á síðasta ári var meiri, eða 0,48%. Hagstofan birtir nóvembermælinguna fimmtudaginn 26. nóvember.
Nóvembertilboð og flugfargjöld hafa mest áhrif á mælinguna
Verð á flugfargjöldum til útlanda lækka alla jafna í nóvember og við gerum ráð fyrir að það hafi mest áhrif til lækkunar í mánuðinum. Við gerum ráð fyrir að verðhækkanir á nýjum bílum hafi mest áhrif til hækkunar í mánuðinum, en rafbílastyrkur var lækkaður úr 500 í 400 þúsund krónur og felldur alveg niður fyrir bíla dýrari en 8 m.kr.
Flugfargjöld lækka þó nokkuð í nóvember
Verð á flugfargjöldum til útlanda lækkar alla jafna töluvert á milli mánaða í nóvember og við gerum nú ráð fyrir að flugfargjöld lækki nokkurn veginn jafn mikið á milli mánaða nú og í nóvember í fyrra, eða um rétt tæplega 15%.
Hægt hefur á hækkun eldsneytis
Samkvæmt verðathugun okkar hefur verð á eldsneyti hækkað um tæp 2% frá síðustu verðsöfnunarviku. Þar af hefur bensínverð hækkað um 1,1% en verð á dísilolíu um tæp 4%. Verð á dísilolíu hefur hækkað töluvert meira en verð á bensíni á síðustu mánuðum. Sem dæmi var verð á dísilolíu í október orðið hærra en það var í desember í fyrra, áður en olíugjöld voru felld niður. Verð á bensíni hefur hækkað minna og er enn þá lægra en það var í lok síðasta árs.
Hækkun á verði nýrra bíla
Styrkur til rafbílakaupa var lækkaður úr 500 í 400 þúsund krónur um síðustu mánaðamót og felldur niður fyrir rafmagnsbíla sem kosta meira en 8 m.kr. Við vitum ekki nákvæmlega hvaða bíla Hagstofan mælir og því ríkir talsverð óvissa um áhrifin á þennan lið en okkur þykir líklegt að vinsælustu rafbílarnir séu nú ekki lengur styrkhæfir og kosti neytendur því 500 þúsund krónum meira. Heilt yfir gerum við ráð fyrir að verð á nýjum bílum hækki um 2% í nóvember.
Matarkarfan hækkar aðeins
Við gerum ráð fyrir að matarkarfan hækki aðeins lítillega í nóvember, eða um 0,06% frá síðasta mánuði. Samkvæmt verðlagseftirliti ASÍ mældist um 0,05% hækkun á milli mánaða samkvæmt uppfærslu þeirra 5. nóvember. Minni hækkun í nóvember en síðustu mánuði skýrist meðal annars af sterkara gengi samkvæmt spá okkar.
Reiknuð húsaleiga hækkar hægar
Síðustu tvo mánuði hefur hægt þó nokkuð á hækkunum á reiknaðri húsaleigu. Við teljum það vísbendingu um að hægari verðhækkanir á íbúða- og leigumarkaði séu farnar að koma fram í útreikningum á þeim lið. Við gerum ráð fyrir að mánaðarhækkun á reiknaðri húsaleigu verði að meðaltali í kringum 0,4% allra næstu mánuði.
Spá um þróun VNV í október 2026
| Undirliður | Vægi í VNV | Breyting (spá) | Áhrif (spá) |
| Matur og drykkjarvara | 15,3% | 0,1% | 0,01% |
| Áfengi og tóbak | 2,5% | 0,0% | 0,00% |
| Föt og skór | 3,4% | -2,0% | -0,07% |
| Húsnæði án reiknaðrar húsaleigu | 9,4% | 0,3% | 0,02% |
| Reiknuð húsaleiga | 21,0% | 0,4% | 0,08% |
| Húsgögn og heimilisbúnaður | 3,9% | -2,0% | -0,08% |
| Heilsa | 4,1% | 0,5% | 0,02% |
| Ferðir og flutningar (annað) | 5,7% | -0,8% | -0,05% |
| Kaup ökutækja | 4,4% | 2,0% | 0,09% |
| Bensín og díselolía | 3,4% | 2,0% | 0,07% |
| Flugfargjöld til útlanda | 2,3% | -15,0% | -0,40% |
| Upplýsingar og fjarskipti | 4,3% | -0,6% | -0,03% |
| Afþreying, íþróttir og menning | 9,1% | -0,3% | -0,03% |
| Menntun | 1,1% | 0,0% | 0,00% |
| Hótel og veitingastaðir | 5,5% | -0,6% | -0,03% |
| Fjármálaþjónusta | 1,2% | -0,1% | 0,00% |
| Umhirða og félagsþjónusta | 3,4% | -0,6% | -0,02% |
| Alls | 100,0% | -0,41% |
Verðbólguspá til næstu mánaða nær óbreytt
Spá okkar fyrir næstu mánuði er að vísitalan lækki um 0,41% í nóvember, hækki svo um 0,92% í desember, lækki um 0,25% í janúar og hækki svo um 0,79% í febrúar. Gangi spáin eftir mun verðbólga mælast 6,0% í nóvember, 5,7% í desember, 5,1% í janúar og 4,9% í febrúar. Spáin er lítið breytt frá fyrri spá.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
