Kortavelta heimilanna dróst saman í ágúst
Greiðslukortavelta heimila dróst saman um 1,2% á milli ára í ágúst, að teknu tilliti til verðlags og gengis. Þetta er mesti samdráttur sem hefur mælst síðan í október 2023. Kortavelta erlendis jókst um 3,8% í ágúst á föstu gengi, sem er minnsti vöxtur sem hefur mælst síðan í apríl 2024. Kortavelta Íslendinga innanlands dróst saman um 2,6% að raunvirði á milli ára sem er svipuð þróun og hefur sést á allra síðustu mánuðum, að júní undanskildum en þá jókst kortaveltan lítillega. Þessi gögn eru vísbending um að það hægi á vexti einkaneyslu og benda til þess að aukið vaxtaaðhald Seðlabankans síðustu mánuði sé farið að hafa áhrif.
Stór hluti neyslunnar fer fram erlendis
Það sem af er ári hefur hlutfall neyslu Íslendinga sem fer fram erlendis verið á bilinu 24-26,5%. Í júlí var hlutfallið 26,5% og hefur aldrei mælst hærra. Sé litið til þróunar á milli ára þá jókst kortavelta, sem fyrr segir, um 3,8% á milli ára í ágúst miðað við fast gengi, sem er talsvert minni vöxtur en hefur mælst á síðustu mánuðum. Frá áramótum hefur að jafnaði mælst um 12% aukning á milli ára á mánaðarlegri kortaveltu heimilanna erlendis að teknu tilliti til gengis.
Dregið hefur úr utanlandsferðum Íslendinga í ár
Talsvert hefur dregið úr utanlandsferðum Íslendinga það sem af er ári, samkvæmt talningu Ferðamálastofu. Nú í ágúst fóru Íslendingar í um 10% færri utanlandsferðir en í ágúst í fyrra, en samdráttur hefur mælst í utanlandsferðum Íslendinga alla mánuði ársins að júlí undanskildum. Það sem af er ári hefur utanlandsferðum Íslendinga fækkað um rúmlega 10% frá sama tímabili í fyrra. Í þessu samhengi er vert að benda á að kortavelta Íslendinga erlendis kemur bæði frá kortum sem notuð eru á ferðalögum erlendis og frá erlendri netverslun.
Hægir á vexti neyslu
Kortaveltutölur ágústmánaðar benda til þess að það hægi á neyslu landsmanna þar sem nú mælist samdráttur á milli ára, en slíkt hefur aðeins gerst einu sinni á þessu ári. Þróunin bendir jafnframt til þess að hluti neyslu Íslendinga færist frá innlendri verslun í erlenda. Engu að síður er vöxturinn í kortaveltu erlendis í ágúst sá minnsti frá því á fyrri hluta árs 2024, samkvæmt þessum tölum. Einkaneysla á öðrum ársfjórðungi jókst um 0,8%, sem var talsvert minni vöxtur en á fyrsta fjórðungi ársins, þegar hún jókst um 1,7%. Þessi gögn benda til þess að jafnvel megi gera ráð fyrir enn hófstilltari vexti á þriðja ársfjórðungi.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
