Vikubyrjun 3. mars 2025
Verðbólga lækkaði úr 4,6% í 4,2% í febrúar, en við teljum að heldur muni draga úr lækkunartakti verðbólgu næstu mánuði. Hagvöxtur mældist 2,3% á fjórða ársfjórðungi 2024 og 0,6% fyrir árið í heild. Umsvif í hagkerfinu voru umfram spár, en Hagstofan færði upp hagvöxt á fyrstu níu mánuðum ársins. Í vikunni fram undan eru nokkur uppgjör, Seðlabankinn birtir greiðslujöfnuð við útlönd og það er vaxtaákvörðun hjá Seðlabanka Evrópu.
3. mars 2025
Vikan framundan
- Í dag birta Reitir uppgjör og Eurostat birtir verðbólgutölur fyrir evrusvæðið.
- Á þriðjudag birtir Eimskip uppgjör.
- Á fimmtudag birtir Seðlabankinn greiðslujöfnuð við útlönd, erlenda stöðu þjóðarbúsins og erlendar skuldir, Hampiðjan og Síldarvinnslan birta uppgjör og það er vaxtaákvörðun hjá Seðlabanka Evrópu.
- Á föstudaginn birtir Kaldalón uppgjör og það verða birtar atvinnuleysistölur í Bandaríkjunum.
Mynd vikunnar
Hagvöxtur á mann dróst saman um 1,4% á síðasta ári. Síðast varð samdráttur miðað við höfðatölu á covid-árinu 2020 og þar áður í kjölfar fjármálahrunsins, á árunum 2009 og 2010. Í heild var hagvöxtur á síðasta ári 0,6% en á sama tíma fjölgaði landsmönnum um 2%. Hagvöxtur á mann er betri vísbending um lífskjör en hagvöxtur, enda finnur hver og einn landsmaður minna fyrir hagvexti sem skýrist aðeins af því að landsmenn séu fleiri. Einkaneysla á mann dróst líka saman í fyrra, þótt einkaneyslan hafi aukist, þannig að neysla hvers og eins var að meðaltali minni en árið áður.
Það helsta frá vikunni sem leið
- Vísitala neysluverðs hækkaði um 0,91% á milli mánaða í febrúar og við það lækkaði verðbólga úr 4,6% í 4,2%. Mælingin var mjög nærri því sem við áttum von á, en við spáðum að vísitalan myndi hækka um 0,98% á milli mánaða og að verðbólga myndi hjaðna í 4,3%. Það sem kom mest á óvart var að föt og skór hækkuðu mun minna og matarkarfan meira en við áttum von á. Við eigum von á að verulega hægi á lækkunartakti verðbólgunnar næstu mánuði og að verðbólga verði komin niður í 3,8% í maí.
- Á fjórða ársfjórðungi síðasta árs mældist tæplega 70 ma.kr. halli á vöru- og þjónustujöfnuði við útlönd. Þetta er um 26 ma.kr. verri niðurstaða en á sama fjórðungi árið áður þegar 44 ma.kr. halli mældist. Verri niðurstaða skýrist aðallega af meiri vöruinnflutningi, en meðal annars var óvenju mikið flutt inn af búnaði til uppbyggingar á gagnaverum.
- Hagstofan birti tölur um veltu skv. VSK-skýrslum í nóv-des á síðasta ári. Veltan dróst saman á milli ára á því tímabili, eftir að leiðrétt er fyrir verðlag. Þó mátti greina aukningu í ferðaþjónustu og framleiðslu málma sem er á skjön við þróunina fyrir árið í heild í þeim tveimur atvinnugreinum. Skýringin á aukningu í veltu í framleiðslu málma liggur í hærra heimsmarkaðsverði á áli.
- Skráðum gistinóttum á öllum tegundum gististaða fjölgaði um 2,8% á milli ára í janúar, þar af um 1,4% á hótelum. Hagstofan er ennþá að vinna að því að endurskoða gögnin eftir þjóðerni, þannig að hún birti ekki gistinætur erlendra ferðamanna.
- Alma íbúðarfélag, Brim, Fossar, Iceland Seafood, Nóva klúbburinn og Skagi birtu uppgjör. Síminn lækkaði afkomuspá í kjölfar dóms hæstaréttar, Amaroq kynnti rannsóknarniðurstöður, stjórn Íslandsbanka afþakkaði boð um samrunaviðræður við Arion banka og Landsbankinn kláraði kaup á TM.
- Kaldalón og Iceland Seafood héldu víxlaútboð, Eik stækkaði áður útgefinn skuldabréfaflokk og Lánamál ríkisins birtu niðurstöðu viðbótarútgáfu.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
14. júlí 2025
Erlendum ferðamönnum fjölgaði um 10,1% á milli ára í júní, en það sem af er ári hafa þeir verið álíka margir og á sama tíma í fyrra. Atvinnuleysi jókst um 0,3 prósentustig á milli ára í júní, sem er svipuð aukning og hefur verið síðustu mánuði. Við birtum verðbólguspá í vikunni og teljum að verðbólga hjaðni úr 4,2% í 4,0%. Í þessari viku birtir HMS vísitölu íbúðaverðs, vísitölu leiguverðs og mánaðarskýrslu.
10. júlí 2025
Við spáum því að verðbólga minnki lítillega í júlí og mælist 4,0%. Eins og almennt í júlímánuði má búast við að sumarútsölur og breytingar á flugfargjöldum hafi mest áhrif á vísitölu neysluverðs. Við teljum ekki horfur á að verðbólga þokist nær verðbólgumarkmiði á árinu og spáum 4,2% verðbólgu í lok árs.
9. júlí 2025
Íbúðaverð á Íslandi hefur hækkað langtum meira en laun og almennt verðlag frá aldamótum. Greiðslubyrði af meðalláni hélst tiltölulega stöðug til ársins 2021 þegar hún tók að hækka skarpt, sérstaklega greiðslubyrði af óverðtryggðum lánum.
7. júlí 2025
Hækkandi matvöruverð og húsnæðiskostnaður eru þeir þættir sem eiga stærstan þátt í því að viðhalda verðbólgu á Íslandi um þessar mundir. Verðbólga mældist 4,2% í júní, nokkuð umfram spár. Ef matvara og húsnæði væru ekki hluti af vísitölu neysluverðs hefði verðbólga verið undir markmiði Seðlabankans frá því í ágúst í fyrra. Þættir á borð við sterkari krónu og lækkandi olíuverð hafa líkast til haldið aftur af verðhækkunum á ýmsum vörum upp á síðkastið, en á móti hefur þjónustuverð hækkað.
7. júlí 2025
Hagstofa Íslands spáir 2,2% hagvexti á yfirstandandi ári, samkvæmt hagspá sem birt var á föstudaginn. Hagvaxtarhorfur hafa verið færðar upp frá marsspánni þegar gert var ráð fyrir 1,8% hagvexti á árinu. Hagstofan spáir lítillega auknu atvinnuleysi næstu misserin, en Vinnumálastofnun birtir atvinnuleysistölur fyrir júnímánuð síðar í þessari viku.
1. júlí 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
30. júní 2025
Verðbólga jókst úr 3,8% og mældist 4,2% í júní. Aukin verðbólga skýrist aðallega af auknum þrýstingi á innfluttum vörum en einnig af hækkandi flugfargjöldum og verðhækkun á þjónustu. Þá jókst velta samkvæmt virðisaukaskattsskýrslum um 1,5% að raunvirði í mars og apríl.
27. júní 2025
Verðbólga mældist 4,2% í júní og jókst úr 3,8% frá því í maí. Verðlag hækkaði umfram spár, en við höfðum spáð 3,9% verðbólgu. Aukin verðbólga skýrist aðallega af auknum verðþrýstingi á innfluttum vörum, einkum fötum, skóm og tómstundarvörum, en einnig af hækkandi flugfargjöldum og verðhækkun á þjónustu.
27. júní 2025
Sumarhúsum á Íslandi hefur fjölgað um 45% á síðustu 20 árum. Viðskipti með sumarhús færðust verulega í aukana á tímum faraldursins. Fyrst eftir faraldurinn hægðist um en nú virðist aftur hafa glaðnað yfir markaðnum.
25. júní 2025
Velta samkvæmt virðisaukaskattsskýrslum jókst um 1,5% að raunvirði í mars og apríl og um 5,2% í janúar og febrúar, samkvæmt nýbirtum gögnum Hagstofunnar. Veltugögnin bera þess merki að hagkerfið standi vaxtastigið vel af sér sem er í takt við aukinn hagvöxt í byrjun árs. Það sem af er ári hefur velta aukist mest í sölu og viðhaldi á bílum en einnig má greina aukin umsvif í helstu útflutningsgreinunum: álframleiðslu, sjávarútvegi og ferðaþjónustu.