Vikubyrjun 25. nóvember 2024
Seðlabankinn lækkaði stýrivexti um 0,5 prósentustig í síðustu viku, í takt við væntingar. Í þessari viku birtir Hagstofan verðbólgumælingu nóvembermánaðar en við eigum von á að verðbólga hjaðni úr 5,1% í 4,5%. Á föstudag, þegar Hagstofan birtir þjóðhagsreikninga, kemur svo í ljós hvernig hagvöxtur þróaðist á þriðja ársfjórðungi.
25. nóvember 2024
Vikan framundan
- Í dag birtir Hagstofan vöru- og þjónustujöfnuð vegna þriðja ársfjórðungs.
- Á miðvikudag birtir Skaginn uppgjör.
- Á fimmtudag birtir Hagstofan vísitölu neysluverðs fyrir nóvember. Við eigum von á að verðbólga hjaðni í 4,5%.
- Á föstudag birtir Hagstofan þjóðhagsreikninga fyrir þriðja ársfjórðung, Ísfélagið birtir uppgjör og verðbólgutölur berast fyrir evrusvæðið.
Mynd vikunnar
Peningastefnunefnd Seðlabanka Íslands lækkaði stýrivexti um 0,5 prósentustig í síðustu viku, í takt við spár. Þetta er önnur vaxtalækkunin í röð og standa meginvextir nú í 8,5%. Í yfirlýsingu nefndarinnar er, líkt og síðast, lögð áhersla á varkárni og tekið fram að áfram þurfi að viðhalda hæfilegu aðhaldsstigi til þess að koma verðbólgu í markmið. Næsta ákvörðun er ekki fyrr en 5. febrúar og munu þrjár verðbólgumælingar hafa borist í millitíðinni. Miðað við okkar verðbólguspá verður verðbólga komin nálægt 4% í janúar. Gangi spáin eftir munu raunstýrivextir því hækka talsvert á næstunni og aðhaldið herðast. Nánar má lesa um þættina sem stuðla að lækkun verðbólgu næstu mánuði hér.
Það helsta frá vikunni sem leið
- Húsnæðis- og mannvirkjastofnun (HMS) birti vísitölu íbúðaverðs sem stóð nánast í stað á milli mánaða í október, hækkaði aðeins um 0,2%. Þetta kemur í kjölfar 0,3% lækkunar á milli mánaða í september. Árstaktur mælist nú 8,7% og hefur lækkað þrjá mánuði í röð. HMS birti einnig vísitölu leiguverðs sem hækkaði um 1,8% á milli mánaða og gaf út mánaðarskýrslu.
- Samhliða stýrivaxtaákvörðuninni birti Seðlabankinn nóvemberhefti Peningamála þar sem fram kemur að samkvæmt spá bankans hafi verðbólguhorfur batnað talsvert. Nú er gert ráð fyrir 4,1% verðbólgu á fyrsta fjórðungi næsta árs í stað 5,1% líkt og í síðustu spá bankans frá því í ágúst. Hagvaxtarhorfur hafa aftur á móti versnað lítillega og nú er gert ráð fyrir því að landsframleiðsla standi í stað á milli ára í ár.
- Við tókum upp hlaðvarp þar sem við förum yfir það nýjasta í efnahagsmálum.
- Hagstofan birti vísitölu launa fyrir október sem hækkaði um 0,3% á milli mánaða. Síðastliðna 12 mánuði hefur vísitalan hækkað um 6,0%. Vísitala grunnlauna hækkaði um 0,2% á milli mánaða og hefur hækkað um 6,2% síðastliðna 12 mánuði.
- Verðbólga í Bretlandi mældist 2,3% í október og jókst úr 1,7% í september.
- Iceland Seafood, Brim, Hampiðjan og Síldarvinnslan birtu uppgjör. Íslandsbanki tilkynnti um frekari framkvæmd endurkaupaáætlunar.
- Reitir hélt skuldabréfaútboð. Lánamál ríkisins, Hagar, Útgerðarfélag Reykjavíkur og Fossar voru með víxlaútboð.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
29. maí 2026
Landsframleiðsla jókst um 2,7% á milli ára að raunvirði á fyrsta fjórðungi ársins. Mest var framlag utanríkisviðskipta til hagvaxtar sem skýrist að mestu af auknum umsvifum gagnavera. Einkaneysla jókst einnig á fjórðungnum þó hægt hafi á vexti hennar.
28. maí 2026
Vísitala neysluverðs hækkaði um 0,07% á milli mánaða og verðbólga lækkar því úr 5,2% í 5,1%. Við höfðum spáð því að verðbólga myndi lækka í 4,9%. Hækkun á flugfargjöldum hafði mest áhrif til hækkunar á ársverðbólgu í mánuðinum en lækkun á virðisaukaskatti á eldsneyti hafði mest áhrif til lækkunar. Án lækkunarinnar á virðisaukaskatti hefði verðbólga mælst 5,5%. Athygli vekur að verð á mat og drykk lækkaði á milli mánaða, annan mánuðinn í röð.
27. maí 2026
Þrátt fyrir minna flugframboð um Keflavíkurflugvöll hafa jafn margir erlendir ferðamenn farið um flugvöllinn fyrstu fjóra mánuði ársins í ár og í fyrra. Á móti fara færri tengifarþegar um flugvöllinn og utanlandsferðir Íslendinga hafa dregist verulega saman. Þó sumarið líti ágætlega út er meiri óvissa um haustið.
26. maí 2026
Peningastefnunefnd hækkaði vexti bankans um 0,25 prósentustig í síðustu viku, líkt og við höfðum spáð. Nú í vikunni koma verðbólgutölur og þjóðhagsreikningar.
20. maí 2026
Peningastefnunefnd hækkaði stýrivexti um 0,25 prósentustig annað skiptið í röð og segist tilbúin til að hækka vexti enn frekar. Efnahagshorfur hafa þó versnað verulega að mati bankans, en verðbólguspá var hækkuð í nýútgefnum Peningamálum og hagvaxtaspá lækkuð auk þess sem gert er ráð fyrir auknu atvinnuleysi. Kólnunin í hagkerfinu mun þó gera það að verkum að hættan á aukinni verðbólgu fram á við er minni.
19. maí 2026
Kortavelta íslenskra heimila dróst verulega saman á milli ára í apríl, eða um alls 5,8% að teknu tilliti til verðlags og gengis. Svo mikill samdráttur hefur ekki mælst síðan í febrúar 2021. Peningastefnunefnd fundar í dag vegna vaxtaákvörðunar á morgun, en við gerum áfram ráð fyrir 0,25 prósentustiga hækkun vaxta.
18. maí 2026
Í vikunni fram undan er vaxtaákvörðun hjá Seðlabanka Íslands og við spáum 0,25 prósentustiga hækkun. Fjöldi ferðamanna á fyrstu fjórum mánuðum ársins var svipaður og á sama tímabil í fyrra samkvæmt tölum sem birtust í síðustu viku. Utanlandsferðum Íslendinga hefur aftur á móti fækkað töluvert. Atvinnuleysi heldur áfram að aukast á milli ára.
13. maí 2026
Við spáum því að peningastefnunefnd Seðlabanka Íslands hækki vexti um 0,25 prósentustig í næstu viku. Verðbólga er enn yfir markmiði og verðbólguvæntingar hafa reynst þrálátar. Að okkar mati mun það ráða mestu um að nefndin haldi áfram vaxtahækkunarferlinu sem hófst í mars.
12. maí 2026
Við spáum því að vísitala neysluverðs lækki um 0,13% á milli mánaða í maí. Gangi spáin eftir mun verðbólga lækka úr 5,2% í 4,9%. Lægra eldsneytisverð vegna lækkunar á virðisaukaskatti og lækkun flugfargjalda hafa mest áhrif til lækkunar á milli mánaða samkvæmt spánni. Við spáum að verðbólga mælist 4,9% í ágúst og kjarasamningar því mögulega í húfi.
11. maí 2026
Starfandi samkvæmt skrám fækkaði á milli ára. Frjósemi á Íslandi síðastliðin tvö ár hefur ekki mælst minni síðan mælingar hófust. Í þessari viku fáum við m.a. ferðamannatölur og atvinnuleysi ásamt uppgjörum frá félögum.