11. október 2021 - Hagfræðideild
Vikan framundan
- Í dag birtir Ferðamálastofa talningu á fjöldi ferðamanna um Leifsstöð.
- Á föstudag birtir Seðlabankinn tölur um greiðslumiðlun fyrir september.
- Í vikunni fara fram verðmælingar vegna októbermælingar vísitölu neysluverðs, en Hagstofan birtir hana miðvikudag 27. október.
Mynd vikunnar
Í yfirlýsingu peningastefnunefndar vegna vaxtahækkunarinnar í síðustu viku kom fram að hún teldi það áhyggjuefni að verðbólguvæntingar væru að aukast á ný. Þeir tveir mælikvarðar á verðbólguvæntingar sem við höfum úr að spila eru annars vegar kannanir meðal markaðsaðila, stjórnenda fyrirtækja og heimila og hins vegar svokallað verðbólguálag á skuldabréfamarkaði. Verðbólguálag er munurinn á ávöxtunarkröfu óverðtryggðra og verðtryggðra skuldabréfa sem gefin eru út af ríkinu til svipaðs langs tíma. Að öllu jöfnu ætti þessi munur að endurspegla væntingar fjárfesta til verðbólgunnar fram að gjalddaga bréfanna, þ.e. því hærri verðbólgu sem fjárfestar eiga von á, því hærri ávöxtun vilja þeir fá fyrir að eiga óverðtryggð bréf frekar en verðtryggð bréf. Um mitt ár 2020 var þessi munur kominn niður í um 2%, en er núna um 3,5%.
Efnahagsmál
- Peningastefnunefnd hækkaði vexti bankans um 0,25 prósentustig í vikunni. Meginvextir bankans, þ.e. vextir á sjö daga bundnum innlánum, eru eftir ákvörðunina 1,5%.
- Skráð atvinnuleysi mældist 5,0% í september samborið við 5,5% í ágúst.
- Ferðamálastofa birti hlutfallslega skiptingu þjóðerna erlendra ferðamanna fyrir september.
- Seðlabankinn birti Hagvísa og talnaefni um raungengi, gjaldeyrismarkaðinn, krónumarkaðinn, efnahagsreikning Seðlabankans, erlenda stöðu Seðlabankans og efnahagsreikning lífeyrissjóðanna.
- Hagstofan birti tilraunatölfræði um launasummu í júlí og gistinætur í september og fyrsta mat á vöruskiptajöfnuði í september.
Fjármálamarkaðir
- ALMA leigufélag og Lánamál ríkisins héldu skuldabréfaútboð.
- Icelandair birti flutningstölur fyrir september.
- Arion banki tilkynnti til kauphallarinnar lok endurkaupaáætlunar og að bankinn hafi fengið leyfi Fjármálaeftirlits Seðlabanka Íslands til að hefja nýja endurkaupaáætlun.
- Krónan veiktist í september.
- Við birtum mánaðaryfirlit yfir sértryggð skuldabréf.
Hagtölur og markaðsupplýsingar
Þú gætir einnig haft áhuga á
25. sept. 2023
Vísitala íbúðaverðs á höfuðborgarsvæðinu hækkaði um 0,7% milli mánaða í ágúst, samkvæmt gögnum sem HMS birti í síðustu viku. Vísitalan lækkaði þó nokkuð í júní og júlí og hækkunin kom því nokkuð á óvart. Í næstu viku ber hæst birting Hagstofunnar á vísitölu neysluverðs á fimmtudag.
20. sept. 2023
Vísitala íbúðaverðs hækkaði um 0,7% milli mánaða í ágúst. Árshækkun vísitölunnar fór úr 0,8% í 2,0%. Undirritaðir kaupsamningar á höfuðborgarsvæðinu voru 9,6% færri í júlí en í sama mánuði í fyrra. Vísitalan er hærri en við gerðum ráð fyrir við gerð verðbólguspár fyrir septembermánuð og því færum við hana upp og spáum 7,8% ársverðbólgu í stað 7,7%.
18. sept. 2023
Um 282 þúsund erlendir ferðamenn fóru um Keflavíkurflugvöll í ágúst. Ef sumarmánuðirnir eru teknir saman hafa aðeins einu sinni komið fleiri ferðamenn að sumri, árið 2018. Samkvæmt nýjustu þjóðhagsreikningum Hagstofunnar jókst þjónustuútflutningur á fyrstu tveimur fjórðungum ársins um 21%, og má rekja allan þann vöxt til ferðaþjónustunnar.
18. sept. 2023
Í síðustu viku komu tölur um brottfarir frá Leifsstöð, skráð atvinnuleysi og veltu greiðslukorta. Í þessari viku ber hæst vísitala íbúðaverðs, sem kemur á þriðjudag, og yfirlýsing fjármálastöðugleikanefndar Seðlabanka Íslands, sem gefin verður út á miðvikudaginn.
15. sept. 2023
Nýjar kortaveltutölur bera með sér frekari vísbendingar um að verulega sé að hægja á innlendri eftirspurn. Heildarkortavelta íslenskra heimila dróst saman um 3,4% milli ára í ágúst. Kortavelta Íslendinga innanlands var 4,3% minni en í ágúst í fyrra á föstu verðlagi og hefur nú dregist saman sex mánuði í röð. Erlendis jókst kortavelta Íslendinga um 0,7% á milli ára og kortaveltujöfnuður er jákvæður um 19,2 milljarða.
14. sept. 2023
Við spáum því að vísitala neysluverðs hækki um 0,07% milli mánaða í september og að ársverðbólga standi í stað og verði áfram 7,7%. Útsölulok hafa aftur mest áhrif til hækkunar milli mánaða í september samkvæmt spánni. Það sem helst dregur spána niður er árstíðabundin lækkun á flugfargjöldum til útlanda. Við gerum ráð fyrir að verðbólga lækki áfram næstu mánuði og verði 6,6% í desember.
11. sept. 2023
Í síðustu viku birti Seðlabankinn fundargerð peningastefnunefndar. Samkvæmt henni greiddi einn nefndarmaður atkvæði gegn tillögu seðlabankastjóra um að hækka vexti um 0,50 prósentustig á síðasta fundi nefndarinnar og hefði heldur kosið að hækka þá um 0,25 prósentustig. Í þessari viku berast gögn yfir fjölda brottfara um Leifsstöð, skráð atvinnuleysi og kortaveltu.
4. sept. 2023
Meðfylgjandi er mánaðarlegt yfirlit um sértryggð skuldabréf.
4. sept. 2023
Verðbólga jókst úr 7,6% í 7,7% samkvæmt ágústmælingu Hagstofunnar. Hagvöxtur mældist 4,5% á öðrum ársfjórðungi samkvæmt nýjum þjóðhagsreikningum sem Hagstofan birti í vikunni, en hagvöxtur á fyrsta ársfjórðungi mældist 7,1%. Minni vöxtur einkaneyslu skýrir að stórum hluta minni hagvöxt á öðrum ársfjórðungi.
31. ágúst 2023
Hagvöxtur mældist 4,5% á öðrum ársfjórðungi, samkvæmt fyrsta mati Hagstofunnar. Eins og við var að búast benda tölurnar til þess að hægt hafi á hagkerfinu, en hagvöxtur mældist 7,1% á fyrsta ársfjórðungi. Vaxtahækkanir hafa tekið að tempra innlenda eftirspurn á sama tíma og hægt hefur á vexti kaupmáttar á síðustu misserum. Einkaneysla jókst örlítið en vegna hraðrar fólksfjölgunar dróst hún saman á mann.