1. nóvember 2021 - Greiningardeild
Vikan framundan
- Á miðvikudag birtir Sýn uppgjör.
- Á fimmtudag birtir Reginn uppgjör og Hagstofan birtir niðurstöður úr vinnumarkaðsrannsókn sinni fyrir 3. ársfjórðung.
Mynd vikunnar
Verðbólga mældist 4,5% í október. Til að meta undirliggjandi verðbólguþrýsting eru oft notaðar svokallaðar kjarnavísitölur, þ.e. vísitala neysluverðs án sveiflukenndra liða. Hagstofan reiknar og birtir fjórar mismunandi kjarnavísitölur. Ársbreyting kjarnavísitölu 1 (vísitala neysluverðs án búvara, grænmetis, ávaxta og bensíns) og kjarnavísitölu 2 (kjarnavísitala 1 án opinberrar þjónustu) er aðeins lægri en vísitölu neysluverðs í heild. Ef áhrif vaxtabreytinga á reiknaða húsaleigu eru einnig fjarlægð (kjarnavísitala 3) mælist 5,1% verðbólga. Ef við fjarlægjum hins vegar reiknaða húsaleigu alveg (kjarnavísitala 4) mælist einungis 2,6% verðbólga, þ.e. rétt yfir verðbólgumarkmiði Seðlabankans.
Efnahagsmál
- Vísitala neysluverðs hækkaði um 0,59% milli mánaða í október og mælist verðbólga 4,5%. Þetta var í samræmi við væntingar, en við spáðum +0,6% milli mánaða. Mest áhrif til hækkunar hafði kostnaður við að búa í eigin húsnæði (+1,4% milli mánaða) og bensín (+4,2% milli mánaða), mestu áhrif til lækkunar höfðu flugfargjöld til útlanda (-4,3% milli mánaða).
- Velta samkvæmt virðisaukaskattskýrslum var 25% meiri á VSK-tímabilinu júlí-ágúst 2021 en á sama tímabili 2020 og 9% meiri en á sama tímabili 2019. Mesta aukning milli 2019 og 2021 var í veltu erlendra fyrirtækja sem eru virðisaukaskattskyld á Íslandi, framleiðslu málma, og sölu og viðhaldi vélknúinna ökutækja.
- Samkvæmt vinnumarkaðsrannsókn Hagstofunnar var atvinnuleysi 2,8% í september sem er 1,6 prósentustigum lægra en í september í fyrra. Atvinnuleysi samkvæmt skrám Vinnumálastofnunnar var nokkuð hærra, eða 5,0%. Alls voru 207.900 manns á vinnumarkaði í september sem samsvarar 78% atvinnuþátttöku. Af þeim voru um 202.000 starfandi og um 5.900 atvinnulausir.
- Heildarfjöldi greiddra gistinótta í september var 698.000 sem er um 15% færri en í september 2019 en tæplega fimm sinnum fleiri en í september 2020. Um ein af hverjum fimm gistinóttum var notuð af Íslendingum.
Fjármálamarkaðir
- Arion banki, Eik (fjárfestakynning), Festi, Íslandsbanki, Landsbankinn, Síminn, Skeljungur og Sjóvá birtu uppgjör í síðustu viku.
- Reitir birtu afkomuviðvörun.
- Síminn seldi Mílu til Ardian.
- Seðlabankinn birti fundargerð fjármálastöðugleikanefndar.
- Lánamál ríkisins luku útboði ríkisvíxla.
Hagtölur og markaðsupplýsingar
Þú gætir einnig haft áhuga á
17. mars 2025
Við búumst við að peningastefnunefnd lækki vexti um 0,25 prósentustig á miðvikudaginn. Í síðustu viku fóru fram verðmælingar vegna marsmælingar vísitölu neysluverðs og við spáum því að verðbólga lækki úr 4,2% í 3,9%. Atvinnuleysi var 4,3% í febrúar og hækkaði um 0,4 prósentustig á milli ára. 147 þúsund erlendir ferðamenn fóru um Keflavíkurflugvöll í febrúar, 5,6% færri en í sama mánuði í fyrra.
13. mars 2025
Við spáum 0,25 prósentustiga vaxtalækkun í næstu viku. Verðbólga hjaðnaði um 0,4 prósentustig í febrúar en við teljum að hagvöxtur umfram væntingar og aukin neysla, lítil breyting á verðbólguvæntingum og ólga á vinnumarkaði haldi peningastefnunefnd á tánum.
13. mars 2025
Við spáum því að vísitala neysluverðs hækki um 0,54% á milli mánaða í mars og að verðbólga hjaðni úr 4,2% í 3,9%. Hjöðnun á milli mánaða skýrist ekki síst af töluvert minni hækkun á reiknaðri húsaleigu en fyrir ári síðan. Við gerum ekki ráð fyrir miklum breytingum á verðbólgu næstu mánuði og teljum að hún verði áfram rétt undir 4% í júní.
10. mars 2025
Verulegur halli mældist á viðskiptum við útlönd í fyrra og sömuleiðis á vöruviðskiptum í febrúar samkvæmt gögnum sem bárust í síðustu viku. Seðlabanki Evrópu lækkaði vexti í síðustu viku, eins og við var búist. Í vikunni fara fram verðmælingar fyrir marsmælingu vísitölu neysluverðs, Vinnumálastofnun birtir skráð atvinnuleysi og Ferðamálastofa birtir tölur um fjölda ferðamanna um Keflavíkurflugvöll.
7. mars 2025
Verulegur halli mældist á viðskiptum við útlönd í fyrra, en stór hluti hans var vegna færslna sem höfðu ekki í för með sér gjaldeyrisflæði og styrktist krónan því þrátt fyrir þetta og erlend staða þjóðarbúsins batnaði.
3. mars 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
3. mars 2025
Verðbólga lækkaði úr 4,6% í 4,2% í febrúar, en við teljum að heldur muni draga úr lækkunartakti verðbólgu næstu mánuði. Hagvöxtur mældist 2,3% á fjórða ársfjórðungi 2024 og 0,6% fyrir árið í heild. Umsvif í hagkerfinu voru umfram spár, en Hagstofan færði upp hagvöxt á fyrstu níu mánuðum ársins. Í vikunni fram undan eru nokkur uppgjör, Seðlabankinn birtir greiðslujöfnuð við útlönd og það er vaxtaákvörðun hjá Seðlabanka Evrópu.
28. feb. 2025
Hagvöxtur var 0,6% árið 2024. Krafturinn í hagkerfinu var lítillega umfram flestar spár sem gerðu heldur ráð fyrir lítils háttar samdrætti. Hagvöxturinn var ekki síst drifinn áfram af aukinni fjárfestingu, bæði í atvinnuvegum og íbúðauppbyggingu.
27. feb. 2025
Vísitala neysluverðs hækkaði um 0,91% á milli mánaða í febrúar, samkvæmt nýbirtum tölum Hagstofu Íslands. Ársverðbólga lækkar því úr 4,6% í 4,2%. Við eigum enn von á að verðbólga hjaðni næstu mánuði, þó það hægi á lækkunartaktinum, og mælist 3,8% í maí.
24. feb. 2025
Í vikunni birtir Hagstofan febrúarmælingu vísitölu neysluverðs og þjóðhagsreikninga fyrir lokafjórðung síðasta árs. Í síðustu viku uppfærði Hafrannsóknarstofnun ráðleggingar um loðnuafla en samkvæmt því munu íslensk skip fá um 4,6 þúsund tonn. Í síðustu viku bárust einnig gögn um greiðslukortaveltu landsmanna í janúar sem var 6,5% meiri að raunvirði en árið áður. Vísitala íbúðaverðs hækkaði um 1,5% á milli mánaða í janúar, en svo mikið hefur hún ekki hækkað síðan í febrúar 2024.