Verðbólgumælingin bendir til kólnunar þrátt fyrir hækkun ársverðbólgu
Vísitala neysluverðs hækkaði um 0,94% á milli mánaða í júní, samkvæmt nýbirtum tölum Hagstofunnar. Verðbólga hækkar því úr 5,1% í 5,2%. Flugfargjöld til útlanda skýra muninn á spá okkar og mælingu Hagstofunnar. Þau skýra einnig áfram stærstan hluta hækkunar á milli mánaða í júní og eru nú um 28% hærri en í fyrra. Árshækkun vísitölu neysluverðs án húsnæðis mældist 4,8% í júní og munurinn á vísitölunni með og án húsnæðis minnkar því áfram. Húsnæðisliðurinn er því sífellt minni hluti verðbólgunnar.
Vísbendingar um kólnun sífellt skýrari
Vísbendingar um kólnun í hagkerfinu og minni eftirspurn verða æ meira áberandi í verðbólgutölum. Framlag matvöru, húsnæðis og fatnaðar til ársverðbólgu hefur minnkað þó nokkuð síðustu mánuði. Framlag flestra liða til ársverðbólgu hefur dregist nokkuð saman frá ársbyrjun en mikil hækkun á eldsneyti og flugfargjöldum veldur því að verðbólga dregst ekki meira saman og virðist nokkuð föst í kringum 5,2%.
Breytt samsetning
Ef við skoðum breytingu á samsetningu ársverðbólgu sést að flugfargjöld til útlanda hafa langmest áhrif til hækkunar ársverðbólgunnar á milli mánaða. Framlag ferðaþjónustu án flugfargjalda eykst einnig lítillega. Framlag innfluttra vara án bensíns minnkaði á milli mánaða, sem og framlag húsnæðis sem minnkar lítillega.
Helstu liðir
- Matarkarfan hækkaði um 0,23% í júní. Matarkarfan er 3,9% dýrari en fyrir ári.
- Föt og skór lækkuðu um 0,74% í júní. Verð á fötum og skóm er því 1,2% lægra en fyrir ári.
- Flugfargjöld hækkuðu um 20,1% í júní. Nú er um 28% dýrara að fljúga en fyrir ári síðan.
- Reiknuð húsaleiga hækkaði um 0,6%. Árshækkun húsnæðisliðarins í heild var 6,5% nú í júní en var 7,2% í ársbyrjun.
- Verð á eldsneyti lækkaði lítillega í júní, eða um rétt tæplega hálft prósent.
Aðeins betri verðbólguhorfur
Þrátt fyrir að júnítalan hafi verið aðeins hærri en við gerðum ráð fyrir lækkar spá okkar til næstu mánaða. Við gerum ráð fyrir að vísitalan hækki um 0,15% í júlí, 0,01% í ágúst og lækki um 0,06% í september. Gangi spáin eftir mun ársverðbólgan mælast 5,0% í júlí, 5,2% í ágúst og 5,0% í september.
Lægri spá skýrist af tvennu. Í fyrsta lagi breyttum við forsendum um þróun olíuverðs með tilliti til nýlegrar þróunar og aukinnar bjartsýni um að skipaflutningar um Hormússund komist í eðlilegt horf. Í öðru lagi gerum við nú ráð fyrir minni hækkun flugfargjalda í júlí vegna mikillar hækkunar nú í júní. Áhrif flugfargjalda á verðbólgu eru þó meiri í spánni til næstu mánaða en í síðustu spá.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
