Verðbólga hjaðnar í 5,2%
Vísitala neysluverðs hækkaði um 0,81% á milli mánaða í mars, samkvæmt nýbirtum tölum Hagstofunnar. Verðbólga hjaðnaði því úr 5,4% í 5,2%. Hækkun á eldsneytisverði hafði mest áhrif til hækkunar í mánuðinum. Samanlagt hækkaði verð á bensíni og díselolíu um rúmlega 14%. Flugfargjöld til útlanda hækkuðu um 6%, nokkuð minna en við höfðum spáð, en við spáðum 16,7% hækkun. Matarkarfan og föt og skór lækkuðu lítillega í apríl.
Mælingin bendir til örlítið minni undirliggjandi verðbólguþrýstings
Frá því í desember hafa kjarnavísitölurnar, sem eiga að mæla undirliggjandi verðbólguþrýsting, hækkað nokkuð. Í mars stóðu þær í stað en lækkuðu allar lítillega nú í apríl, sem bendir frekar til þess að undirliggjandi verðbólguþrýstingur sé að minnka en að aukast. Það er í samræmi við langtímaverðbólguspá okkar í nýlegri hagspá þar sem við gerðum ráð fyrir að verðbólga myndi ná hámarki nú í apríl og fara svo lækkandi. Munurinn er ef til vill sá að verðbólga er að hjaðna örlítið hraðar en við væntum þó það sé varasamt að lesa of mikið í einstaka mælingu.
Breytt samsetning
Ef við skoðum breytingu á samsetningu ársverðbólgu á milli mars og apríl sést að framlag innfluttra vara til ársverðbólgu hafði langmest áhrif, sem skýrist að nánast öllu leyti af hækkun á bensínverði. Framlag annara liða var til lækkunar. Flugfargjöld til útlanda hækkuðu töluvert minna en í fyrra, sem skýrist líklega af því að páskarnir voru búnir nokkuð fyrir verðsöfnunardaga Hagstofunnar. Þó reiknuð húsaleiga hafi hækkað meira en síðustu mánuði hækkaði hún minna en í apríl í fyrra og er því framlag hennar til lækkunar á ársverðbólgu. Aðrir liðir höfðu lítil áhrif í mánuðinum.
Helstu liðir
- Matarkarfan lækkaði í apríl um 0,02%, eftir að hafa hækkað nokkuð fyrstu þrjá mánuði ársins.
- Föt og skór lækkuðu líka um 0,02% í mánuðinum og eru ennþá ódýrari en fyrir janúarútsölur. Þróunin er því nokkuð svipuð og í fyrra. Verð á fötum og skóm hefur aðeins hækkað um 1,4% frá því í apríl í fyrra.
- Flugfargjöld hækkuðu um 6,1%, en við spáðum 16,7% hækkun. Nú er 8% dýrara að fljúga en í apríl í fyrra og dregur því nokkuð skarpt úr árshækkun flugfargjalda, en í mars var um 23% dýrara að fljúga en mars í fyrra.
- Reiknuð húsaleiga hækkaði um 0,8% og því í fyrsta skipti í fjóra mánuði sem liðurinn hækkar meira en spá okkar gerði ráð fyrir. Þrátt fyrir það gerum við áfram ráð fyrir minni hækkunum á milli mánaða næstu mánuði, eða um 0,4%. Töluvert hefur hægt á bæði íbúða- og leiguverðshækkunum undanfarna mánuði og við gerum ráð fyrir að það hægi á hækkunum á liðnum.
- Verð á eldsneyti hækkaði töluvert í apríl eða um rétt rúmlega 14%. Við gerum ráð fyrir að það mælist um 9,7% lægra á milli mánaða í maí. Hækkun á heimsmarkaðsverði hefur áhrif til hækkunar, en lækkun á VSK á eldsneyti hefur áhrif til lækkunar.
Áfram líkur á vaxtahækkun
Spá okkar fyrir næstu mánuði er -0,21% í maí, 0,67% í júní og 0,33% í júlí. Gangi spáin eftir mun ársverðbólga mælast 4,8% í maí, 4,6% í júní og 4,7% í júlí. Þrátt fyrir að aprílmælingin væri lægri en við áttum von á breytist spá okkar um ársverðbólgu næstu mánuði lítið. Það skýrist af því að við hækkum aðeins spá okkar um bensínverð næstu mánuði vegna hærra heimsmarkaðsverð á olíu og breytum ekki spá okkar um flugfargjöld næstu mánuði þrátt fyrir að nýjasta mælingin hafi komið á óvart niður á við.
Við gerum enn ráð fyrir því að stýrivextir verði hækkaðir í maí en þessi mæling eykur frekar líkur á því að minna skref verði tekið. Í nýlegri hagspá gerðum við ráð fyrir 0,5 prósentustiga stýrivaxtahækkun í maí en teljum nú auknar líkur á 0,25 prósentustiga hækkun.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
