Seigla í ferðaþjónustunni þrátt fyrir mikla óvissu
Þrátt fyrir minna flugframboð um Keflavíkurflugvöll það sem af er ári hafa jafn margir erlendir ferðamenn farið um flugvöllinn samanborið við sama tíma í fyrra, samkvæmt talningu Ferðamálastofu. Utanlandsferðir Íslendinga hafa aftur á móti dregist verulega saman á sama tíma, eða um rúmlega 15%. Einnig hefur fjöldi tengifarþega um völlinn dregist saman. Samhliða hefur verð á flugfargjöldum til og frá landinu hækkað nokkuð og verið að meðaltali um 20% hærra en á fyrstu mánuðum síðasta árs. Minna framboð og hærra verð hefur hingað til ekki haft áhrif á komur ferðamanna til landsins, en haft meiri áhrif á utanlandsferðir Íslendinga. Þetta er sérlega áhugavert í ljósi þess að raungengið er mjög hátt núna, sem ætti að draga úr komum til landsins og hvetja til utanlandsferða Íslendinga.
Ferðamenn eyða jafn miklu og í fyrra en fá minna
Það má þó sjá áhrif hás raungengis í þróun kortaveltu erlendra ferðamanna. Það sem af er ári hefur kortavelta á hvern ferðamann nokkurn veginn staðið í stað borið saman við sömu mánuði í fyrra, ef við leiðréttum fyrir gengi. Það þýðir að ferðamenn eyða jafn miklu í ferðalög sín, í sínum gjaldeyri, og í fyrra. Ef við leiðréttum kortaveltu á hvern ferðamann með verðlagi sést að hún hefur dregist saman og var um 7,5% lægri að meðaltali fyrstu fjóra mánuði ársins borið saman við sama tímabil í fyrra. Það þýðir að ferðamenn eru að eyða jafn miklu og í fyrra en vegna þess að verð á þjónustu hefur hækkað fá þeir minna fyrir. Apríl sker sig reyndar aðeins úr þar sem kortavelta á mann dróst nokkuð meira saman, bæði á föstu gengi og á föstu verðlagi. Ef við lítum aðeins á fyrstu þrjá mánuði ársins voru ferðamenn að eyða meira en sömu mánuði í fyrra en fengu fyrir það minni þjónustu.
Sólmyrkvi í ágúst en óvissa um framhaldið
Útlitið fyrir sumarið er þokkalegt og þá sérstaklega ágústmánuð vegna sólmyrkvans sem verður 12. þess mánaðar. Gisting er meira og minna uppbókuð í kringum þá dagsetningu og því útlit fyrir nokkuð góðan mánuð í heild.
Ein stærsta óvissan fyrir ferðaþjónustuna og raunar efnahagsþróun almennt snýr að því hvenær samningar nást á milli Bandaríkjanna og Írans og hvenær opnað verður fyrir skipaumferð um Hormússund. Icelandair hefur til að mynda dregið úr flugframboði nú á öðrum ásfjórðungi um 2%, en einnig tilkynnt að flugframboð fyrir næsta haust verði minnkað, að stærstum hluta vegna hækkunar á olíuverði.
Fréttir hafa þó borist um að flugfélög í Evrópu hafi ekki miklar áhyggjur af eldsneytisskorti fyrir sumarið. Aukið olíuframboð, til dæmis frá Bandaríkjunum og Noregi, hefur dregið verulega úr þeim áhyggjum. Mikil hækkun á verði flugvélaeldsneytis hefur hvatt olíuhreinsistöðvar í Evrópu til að forgangsraða framleiðslu á flugvélaeldsneyti. Það er því síður útlit fyrir skort á flugvélaeldsneyti en útlit fyrir að verð á flugfargjöldum verði aftur á móti nokkuð hærra en ella.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
