Líkt og tíðrætt hefur verið í Hagsjám Hagfræðideildar er mikið líf á fasteignamarkaði höfuðborgarsvæðisins um þessar mundir. Hækkanir eru orðnar nokkuð meiri en spár gerðu ráð fyrir og er ástandið m.a. farið að valda Seðlabankanum áhyggjum. Samkvæmt mælingum Hagstofunnar virðast viðskipti með sérbýli á höfuðborgarsvæðinu leiða hækkanirnar. 12 mánaða hækkun íbúðaverðs mælist nú 17% í sérbýli á höfuðborgarsvæðinu og 14% í fjölbýli en aðeins 8% alls utan höfuðborgarsvæðisins. Eftirspurnin jókst verulega eftir sérbýliseignum eftir að Covid-19-faraldurinn braust út og mögulega hefur íbúðamarkaður utan höfuðborgarsvæðisins getað mætt þeirri eftirspurn betur með þeim afleiðingum að verðhækkanir eru hóflegri þar.
Víða finnast þó einstaka þéttbýliskjarnar þar sem verðhækkanir eru meiri en á höfuðborgarsvæðinu, til að mynda Árborg, þar sem íbúðaverð hækkaði um 18% milli ára á öðrum ársfjórðungi samkvæmt athugun úr Verðsjá Þjóðskrár Íslands. Til samanburðar mældist hækkunin 15% á höfuðborgarsvæðinu. Sé litið til þróunar frá upphafi árs 2015 í nokkrum af stærstu þéttbýliskjörnum landsins má sjá að almennt hefur íbúðaverð hækkað mest í Árborg og því næst Reykjanesbæ.
Meðalfermetraverð mælist þó um þriðjungi lægra í þéttbýliskjörnunum utan höfuðborgarsvæðisins en á höfuðborgarsvæðinu, þrátt fyrir hækkanir síðustu ára. Lægsta fermetraverðið meðal þeirra kjarna sem til skoðunar er í Reykjanesbæ þar sem fermetrinn seldist á um 350.000 kr. á öðrum ársfjórðungi þessa árs til samanburðar við 550.000 kr. á höfuðborgarsvæðinu.
Lesa Hagsjána í heild
Hagsjá: Höfuðborgarsvæðið leiðir verðhækkanir – þó er mikið líf víða
