Hægir á vexti vöruskiptahallans
Þó vöruskiptahalli haldi áfram að aukast hefur hann ekki aukist eins mikið á milli ára í ár og síðustu tvö ár. Halli á vöruviðskiptum er viðbúinn, en síðasta áratug hefur verið viðvarandi vöruskiptahalli. Á sama tíma hafa þjónustuviðskipti skilað ríflegum afgangi. Þetta skýrist t.d. af auknum umsvifum í ferðaþjónustu sem hafa kallað á mikinn vöruinnflutning en á móti skilað töluverðum afgangi af þjónustuviðskiptum. Staðan í utanríkisviðskiptum gefur oft ágætis mynd af stöðunni í hagkerfinu og minni aukning vöruskiptahalla getur verið merki um að hagkerfið fari kólnandi. Í ár gerum við ráð fyrir að afgangur af þjónustuviðskiptum rétt nái að vega upp vöruskiptahalla ársins í heild.
Ágætis kraftur í vöruútflutningi í október
Heilt á litið var ágætis kraftur í vöruútflutningi í október og verðmæti vöruútflutnings jukust um 9% á verðlagi hvers árs. Ef tekið er tillit til gengisþróunar voru verðmætin um 8% meiri en á sama tíma í fyrra. Útflutningsverðmæti jukust í nánast öllum greinum vöruútflutnings í október.
Útflutningsverðmæti sjávarafurða jukust um 2% á milli ára á föstu gengi, en hafa dregist saman um 3% það sem af er ári. Útflutningsverðmæti áls og álafurða í mánuðinum voru um 1% meiri en á sama tíma í fyrra á föstu gengi, en hafa dregist saman um 6% það sem af er ári. Heimsmarkaðsverð á áli hefur hækkað og frá því í apríl hefur álverð verið hærra en á sama tíma í fyrra. Nú í október var heimsmarkaðsverð á áli um 18% hærra en í október í fyrra. Á sama tíma hefur álframleiðsla dregist saman, enda hafa stórnotendur raforku búið við skerðingar síðustu misseri.
Útflutningur á eldisfiski og lyfjum færist hratt í aukana
Töluverður kraftur hefur verið í útflutningi á eldisfiski það sem af er ári. Í október jukust útflutningsverðmæti eldisfisks um 26% á milli ára á föstu gengi og það sem af er ári hafa verðmætin aukist um 24% á milli ára. Útflutningsverðmæti lyfja og lækningavara færast nokkuð hratt í aukana og nú í október voru útflutningsverðmæti þeirra um 84% meiri en í fyrra. Það sem af er ári hafa útflutningsverðmæti aukist um 57% á milli ára á föstu gengi.
Annar útflutningur en talinn er upp hér að ofan hefur staðið nokkurn veginn í stað það sem af er ári.
Vöruinnflutningur eykst í október
Verðmæti vöruinnflutnings jókst um 6% á milli ára á föstu gengi í október en það sem af er ári hafa verðmætin aukist um 1%. Innflutningur fjárfestingarvara jókst um 2% á milli ára í október á föstu gengi, en það sem af er ári hefur innflutningur á fjárfestingarvörum aukist um 4%. Nokkuð hefur hægt á innflutningi fjárfestingarvara eftir því sem liðið hefur á árið. Í nýlegri hagspá gerum við ráð fyrir litlum breytingum á fjárfestingu á seinni hluta ársins og eru þessar tölur í samræmi við þá spá. Innflutningur á hrávörum jókst hins vegar um 30% í október og hafa innflutningsverðmæti hrávara aukist um 8% á föstu gengi það sem af er ári. Þá jókst innflutningur á neysluvörum um 11% í október, og hefur aukist um 7% það sem af er ári á föstu gengi. Á móti hefur innflutningur á fólksbílum dregist töluvert saman það sem af er ári, eða um 48%. Við spáum lítilli aukningu í einkaneyslu á árinu.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
