Verðbólga jókst umfram væntingar í júlí og fór úr 5,8% í 6,3%. Hækkun á ársverðbólgu skýrist aðallega af auknu framlagi húsnæðis. Það sem kom mest á óvart var að matur og drykkur hækkuðu mun meira en við bjuggumst við og sumarútsölur voru nokkuð dræmar miðað við síðustu ár. Þótt almennt megi búast við að verðbólga sveiflist eitthvað milli mánuða telst það vonbrigði hversu mikið vísitalan hækkaði umfram spár í júlí.
Við spáum því að ársverðbólga haldist tiltölulega stöðug í ágúst og september en hjaðni niður í 5,6% í október. Undanfarið höfum við spáð því að Seðlabankinn haldi stýrivöxtum óbreyttum í ágúst og að vaxtalækkunarferli hefjist ekki fyrr en í október eða nóvember. Peningastefnunefnd tilkynnir um næstu vaxtaákvörðun 21. ágúst nk. og nýja verðbólgumælingin er sú síðasta fyrir ákvörðunina. Við höldum okkur við þá spá að vöxtum verði haldið óbreyttum þá. Fari svo munu stýrivextir hafa haldist óbreyttir í heilt ár.
Vísitala íbúðaverðs hækkaði um 1,4% á milli mánaða í júní og jókst árshækkun hennar úr 8,4% í 9,1%. Árshækkunin hefur hækkað smám saman undanfarið ár og velta á markaðnum hefur færst verulega í aukana. Verðhækkanir á íbúðamarkaði eru þó nokkuð umfram almennar verðhækkanir og raunverð íbúða er 5% hærra en á sama tíma í fyrra. Þessi kraftur á íbúðamarkaði gerir peningastefnunefnd erfitt fyrir og dregur verulega úr líkunum á vaxtalækkun í bili.
Verulega hefur dregið úr árshækkun launavísitölunnar á síðustu mánuðum. Vísitalan er nú 6,0% hærri en á sama tíma í fyrra, en í júní 2023 var hún 10,9% hærri en í júní 2022. Þetta skýrist aðallega af hófstilltari launahækkunum í síðustu kjarasamningum en í þeim sem gerðir voru ári fyrr, en einnig kann að vera að minnkandi spenna á vinnumarkaði hafi dregið úr launaskriði. Árshækkun launa er sambærileg verðbólgunni og því hefur kaupmáttur launa staðið nokkurn veginn í stað á síðustu 12 mánuðum.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
