Vísitala íbúðaverðs hækkar um 1,4% milli mánaða
Vísitalan hækkaði um heil 1,4% á milli mánaða í september og hefur ekki hækkað jafnmikið síðan í mars síðastliðnum. Mánuðinn á undan hækkaði hún um 0,7% og sú mæling kom aðeins á óvart eftir lækkunarmánuðina þar á undan. Sérbýlishluti vísitölunnar hækkaði um 1,6%, en fjölbýlishlutinn um 1,4%.
Árshækkun vísitölunnar eykst örlítið
Árshækkun vísitölunnar fór úr 2,0% upp í 2,6% í september. Árshækkunin hefur farið hratt lækkandi á þessu ári eftir að hafa farið hæst í 25,5% í júlí í fyrra. Í ágúst og september hækkaði hún þó aðeins á ný.
Dregur úr raunverðslækkun
Raunverð íbúða á höfuðborgarsvæðinu hefur lækkað milli ára síðustu fjóra mánuði. Raunverð fæst með því að taka tillit til verðbólgu, en til þess notum við vísitölu neysluverðs án húsnæðis. Raunverð lækkar þannig milli ára ef árshækkun íbúðaverðs er minni en árshækkun vísitölu neysluverðs án húsnæðis. Mjög tók að hægja á raunverðshækkunum þegar aðrir liðir en húsnæði fóru að hækka í verði á sama tíma og hægði á íbúðaverðshækkunum á seinni hluta síðasta árs. Hækkunin milli mánaða í september dregur þó aðeins úr raunverðslækkun milli ára, sem þó stendur nú í 4,8%.
Vörumst að draga miklar ályktanir
Vísitalan sveiflast gjarnan í ólíkar áttir milli mánaða og því ber að varast að lesa of mikið í stakar mælingar. Til dæmis lækkaði vísitalan í nóvember, desember og janúar síðastliðnum, en hækkaði svo um 0,3% í febrúar og 1,5% í mars.
Hugsanlega hefur nýleg útvíkkun á hlutdeildarlánaúrræði stjórnvalda haft áhrif til hækkunar á verði á íbúðum í fjölbýli. Útvíkkunin var kynnt í júlí og vegna hennar á nú mun stærri hópur kost á hlutdeildarlánum en áður og fleiri íbúðir uppfylla nauðsynleg skilyrði. HMS hefur gefið út að útvíkkunin hafi blásið lífi í útlánin. Íbúðir sem uppfylla skilyrðin eru nýjar og því að jafnaði hlutfallslega dýrar.
Við höfum spáð því að verðþróun á íbúðamarkaði komist ekki aftur á raunverulegt skrið fyrr en merki eru komin fram um að vaxtastigið fari lækkandi, en höfum ekki búist við neinum viðvarandi lækkunum. Það verður spennandi að fylgjast með íbúðamarkaðinum næstu mánuði.
Við spáum nú 7,8% verðbólgu í október í stað 7,6%
Í verðbólguspá okkar frá 12. október gerðum við ráð fyrir því að vísitala íbúðaverðs myndi hækka um 0,1% á milli mánaða í október. Eftir þessa nýju birtingu HMS á vísitölu íbúðaverðs verður sú spá að teljast heldur bjartsýn. Hagstofan notar þó sína eigin íbúðaverðsvísitölu sem tekur tillit til íbúða á öllu landinu, ekki bara á höfuðborgarsvæðinu. Við gerum ráð fyrir að mánaðarbreytingin á vísitölu íbúðaverðs á landinu öllu verði minni en á höfuðborgarsvæðinu, nær 1%. Við gerum þó ekki endilega ráð fyrir að vísitalan haldi áfram að hækka jafnmikið næstu mánuði.
Við hækkum því verðbólguspána fyrir október úr 7,6% í 7,8%. Spáin fyrir næstu mánuði hækkar einnig aðeins og við gerum ráð fyrir að í nóvember verði verðbólga 7,7% og 7,6% í desember. Í janúar teljum við svo að verðbólga hjaðni mun meira, niður í 6,4%.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara. Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti. Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
