Vinnumarkaður sterkur þrátt fyrir truflanir vegna faraldurs
Samkvæmt vinnumarkaðsrannsókn Hagstofu Íslands er áætlað að um 208.900 manns hafi verið á vinnumarkaði í desember 2021, sem jafngildir 78% atvinnuþátttöku. Af þeim voru um 199.700 starfandi og um 9.200 atvinnulausir og í atvinnuleit, eða um 4,4% af vinnuaflinu.
Starfandi fólki fjölgaði um 11.800 milli ára í desember og atvinnulausum fækkaði um 4.700 á sama tíma. Hlutfall starfandi var 74,6% í desember og hækkaði um 3 prósentustig frá desember 2020.
Atvinnuþátttaka hefur aukist á þessu ári og var 78,0% nú í desember sem er einu prósentustigi meira en í desember í árið áður. Sé miðað við 12 mánaða hlaupandi meðaltal var atvinnuþátttaka mest um mitt ár 2017, en þá fór hún upp í 82%. Samsvarandi tala nú er 78,8% og hefur atvinnuþátttaka aukist nokkuð stöðugt síðasta ár á þennan mælikvarða.
Atvinnuleysi, samkvæmt mælingum Hagstofunnar, var 4,4% í desember sem er 2,5 prósentustigum lægra en á sama tíma í fyrra. Almennt atvinnuleysi skráð hjá Vinnumálastofnun var hins vegar 4,9% og hafði minnkað um 5,8 prósentustig milli ára.
Meðalatvinnuleysi ársins 2021 var eilítið minna en 2020 samkvæmt mælingum bæði Hagstofu og Vinnumálastofnunar. Miklar breytingar urðu innan beggja ára með mikilli aukningu 2020 og mikilli minnkun 2021. Atvinnuleysið á þessum árum var eilítið minna en á árunum 2009 og 2010, en þessi fjögur ár eru með stærstu atvinnuleysisárum sögunnar.
Vinnutími hefur styst töluvert á undanförnum misserum. Venjulegur vikulegur vinnutími var þannig 0,4 stundum styttri nú í desember en í desember 2020. Sveiflur eru miklar í vinnutíma milli mánaða, en sé horft til 12 mánaða hlaupandi meðaltals er vinnutími nú rúmlega klukkustund styttri en hann var í upphafi ársins 2020. Áherslur í kjarasamningum um styttingu vinnutíma koma þannig greinilega í ljós í vinnumarkaðskönnun Hagstofunnar.
Starfandi fólki á 4. ársfjórðungi 2021 fjölgaði um 7,1% miðað við sama tíma 2020. Vinnutími styttist um 0,5% á sama tíma þannig að heildarvinnustundum fjölgaði um 6,6% milli ára. Þetta er þriðji ársfjórðunginn í röð sem heildarvinnustundum fjölgar. Miklar sveiflur hafa verið í vinnuaflsnotkun á tíma faraldursins og sker árið 2020 sig nokkuð úr hvað þróun vinnuaflsnotkunar varðar.
Tölur úr vinnumarkaðskönnuninni síðustu mánuði sýna ótvírætt að vinnumarkaðurinn er óðum að ná fyrri styrk. Þrátt fyrir endurtekin skakkaföll í baráttunni við faraldurinn hefur þróunin á vinnumarkaði verið jákvæð. Þannig hefur t.d. komið í ljós að ný ráðningarsambönd sem byggðu á ráðningarstyrkjum hafa haldið nokkuð vel þrátt fyrir truflanir vegna faraldursins.
Lesa Hagsjána í heild
Hagsjá: Vinnumarkaður sterkur þrátt fyrir truflanir vegna faraldurs
