27. maí 2024
Vikan framundan
- Á miðvikudag birtir VÍS uppgjör.
- Á fimmtudag birtir Hagstofan verðbólgutölur fyrir maí, við spáum því að verðbólga verði áfram 6,0%.
- Á föstudag birtir Hagstofan þjóðhagsreikninga fyrir fyrsta ársfjórðung, Ísfélagið birtir uppgjör og Eurostat birtir verðbólgutölur fyrir evrusvæðið.
Mynd vikunnar
Kaupsamningum um íbúðir hefur fjölgað verulega á síðustu mánuðum. Undirritaðir kaupsamningar á höfuðborgarsvæðinu voru meira en tvöfalt fleiri í apríl á þessu ári (720) en í apríl í fyrra (332). Þar til í ágúst í fyrra fækkaði kaupsamningum á milli ára í hverjum mánuði í um það bil tvö ár. Markaðurinn lifnaði við á seinni helmingi síðasta árs, íbúðaverð tók við sér um leið og kaupsamningum tók að fjölga.
Það helsta frá vikunni sem leið
- Vísitala íbúðaverðs hækkaði um 0,8% milli mánaða í apríl. Hækkunin er sú sama og í mars en í febrúar hækkaði vísitalan um 1,9% og í janúar lækkaði hún um 1%. Við þetta jókst árshækkun vísitölunnar úr 5,2% í 6,4%. Árshækkun vísitölunnar fór lægst í 0,8% í júlí í fyrra, en hefur hækkað statt og stöðugt síðan þá. Árshækkun á landsbyggðinni er meiri en á höfuðborgarsvæðinu og árshækkun fjölbýlis meiri en sérbýlis. Auk vísitölu íbúðaverðs birti HMS vísitölu leiguverðs og mánaðarskýrslu.
- Samkvæmt fundargerð peningastefnunefndar vegna vaxtaákvörðunar 8. maí greiddi einn nefndarmaður atkvæði gegn tillögu seðlabankastjóra um að vextir bankans yrðu óbreyttir og vildi lækka vexti um 0,25%.
- Launavísitalan hækkaði um 0,5% í apríl, samkvæmt gögnum sem Hagstofan birti á föstudag. Vísitalan hækkaði um 2,4% í mars þegar kjarasamningar á stórum hluta almenna vinnumarkaðarins tóku gildi og umsamdar launahækkanir komu inn í vísitöluna. Búast má við sambærilegum hækkunum einhverja næstu mánuði eftir því sem fleiri félög undirrita kjarasamninga.
- Vöru- og þjónustujöfnuður var neikvæður um 43 ma. kr. á fyrsta ársfjórðungi. Hallinn jókst þó nokkuð milli ára, en hann var 19 ma. kr. á fyrsta ársfjórðungi í fyrra. Aukinn halli skýrist bæði af minni útflutningi og meiri innflutningi. Minni útflutningur skýrist svo helst af loðnubresti og minni álútflutningi.
- Verðbólga í Bretlandi mældist 2,3% í apríl og hjaðnaði þó nokkuð frá marsmánuði þegar hún mældist 3,2%. Verðbólgan var þó umfram væntingar Englandsbanka og helstu greinenda og verðhækkun á þjónustu kom mest á óvart. Eftir birtingu nýju verðbólgutölunnar er talið ólíklegra en áður að vextir þar í landi verði lækkaðir í júní.
- Íslandshótel féllu frá útboði og skráningu félagsins í kauphöllinni.
- Alvotech, Brim, Hampiðjan og Síldarvinnslan birtu uppgjör.
- Landsbankinn hélt útboð og skiptiútboð sértryggðra skuldabréfa, Fossar héldu víxlaútboð og Arion banki keypti til baka skuldabréf í evrum.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
16. júní 2026
Kortavelta íslenskra heimila stóð nokkurn veginn í stað á milli ára í maí, að teknu tillit til verðlags og gengis. Tölur fyrir apríl voru jafnframt leiðréttar upp á við en þær höfðu sýnt töluverðan samdrátt. Gömlu apríltölurnar voru birtar daginn fyrir ákvörðun peningastefnunefndar og hafa mögulega haft áhrif á ákvörðunina. Uppfærðar tölur benda til þess að áfram hægi á vexti einkaneyslu, en ekki til snöggkólnunar eins og apríltölurnar gáfu til kynna.
15. júní 2026
Erlendum ferðamönnum fjölgaði í maí þrátt fyrir minna flugframboð en utanlandsferðir Íslendinga eru færri. Skráð atvinnuleysi mældist 4,2% í maí.
12. júní 2026
Fjölgun sumarhúsa hér á landi hefur haldist nokkuð stöðug síðasta áratug, en rúmlega helmingur sumarhúsa landsins er staðsettur á Suðurlandi. Kaupsamningum hefur fækkað lítillega frá því í fyrra og verðhækkanir hafa verið hóflegar.
11. júní 2026
Við spáum því að verðbólga standi í stað í júní og mælist aftur 5,1%. Ferðaþjónustutengdir liðir hækka alla jafna í júní og mun verð á flugfargjöldum til útlanda hafa mest áhrif til hækkunar, gangi spáin eftir. Við gerum einnig ráð fyrir hækkun á hótelum og veitingastöðum í júnímælingunni. Við gerum ráð fyrir að verðbólga aukist næstu mánuði og teljum nánast öruggt að forsendur kjarasamninga bresti í ágúst.
8. júní 2026
Á fyrsta ársfjórðungi mældist minni halli á viðskiptum við útlönd en á sama tíma í fyrra. Í síðustu viku birti HMS fasteignamat fyrir 2027, en fasteignamat lækkaði að raunvirði á milli ára.
1. júní 2026
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
1. júní 2026
Samkvæmt fyrsta mati Hagstofunnar mældist 2,7% hagvöxtur á fyrsta ársfjórðungi. Vísitala neysluverðs hækkaði um 0,07% á milli mánaða og verðbólga lækkaði því úr 5,2% í 5,1%.
29. maí 2026
Landsframleiðsla jókst um 2,7% á milli ára að raunvirði á fyrsta fjórðungi ársins. Mest var framlag utanríkisviðskipta til hagvaxtar sem skýrist að mestu af auknum umsvifum gagnavera. Einkaneysla jókst einnig á fjórðungnum þó hægt hafi á vexti hennar.
28. maí 2026
Vísitala neysluverðs hækkaði um 0,07% á milli mánaða og verðbólga lækkar því úr 5,2% í 5,1%. Við höfðum spáð því að verðbólga myndi lækka í 4,9%. Hækkun á flugfargjöldum hafði mest áhrif til hækkunar á ársverðbólgu í mánuðinum en lækkun á virðisaukaskatti á eldsneyti hafði mest áhrif til lækkunar. Án lækkunarinnar á virðisaukaskatti hefði verðbólga mælst 5,5%. Athygli vekur að verð á mat og drykk lækkaði á milli mánaða, annan mánuðinn í röð.
27. maí 2026
Þrátt fyrir minna flugframboð um Keflavíkurflugvöll hafa jafn margir erlendir ferðamenn farið um flugvöllinn fyrstu fjóra mánuði ársins í ár og í fyrra. Á móti fara færri tengifarþegar um flugvöllinn og utanlandsferðir Íslendinga hafa dregist verulega saman. Þó sumarið líti ágætlega út er meiri óvissa um haustið.