22. apríl 2024
Samkvæmt nýjustu talningu Húsnæðis- og mannvirkjastofnunar (HMS) á íbúðum í byggingu hefur nýframkvæmdum fækkað á milli ára og HMS telur horfur á að íbúðauppbygging næstu árin verði langt undir því sem þörf er á. Gangi uppbyggingarspá HMS eftir er ekki ólíklegt að verðhækkanir á íbúðamarkaði færist nokkuð í aukana þegar vaxtalækkanir taka að kynda undir eftirspurn.
Vikan framundan
- Á þriðjudag birta Hagar uppgjör fyrir síðasta ár og Síminn og Össur birta uppgjör fyrir fyrsta fjórðung þessa árs.
- Á miðvikudag birtir Hagstofan vísitölu neysluverðs. Við spáum lækkun verðbólgu úr 6,8% í 6,1%. Icelandair og Nova klúbburinn birta uppgjör fyrir fyrsta ársfjórðung.
Mynd vikunnar
Ný vísitala íbúðaverðs sem HMS hóf að birta í síðasta mánuði sýnir meðal annars ólíka þróun íbúðaverðs á landsbyggðinni og höfuðborgarsvæðinu. Verðþrýstingur virðist almennt hafa verið lítillega meiri á landsbyggðinni en höfuðborgarsvæðinu síðustu misseri. Í júlí í fyrra mældist árslækkun á höfuðborgarsvæðinu á meðan verð á landsbyggðinni hélt áfram að hækka lítillega. Eins og sést hefur verðþrýstingur á íbúðamarkaði nú aukist aftur frá því um mitt ár í fyrra og verðið á landinu öllu er 5,2% hærra en fyrir ári síðan. Það kann að skýrast af ýmsum þáttum, svo sem eftirspurn Grindvíkinga, væntingum um hærra verð, fjölgun hlutdeildarlána og ónógri íbúðauppbyggingu. HMS spáir því að á næstu tveimur árum takist aðeins að byggja um 58% af þeim íbúðum sem þörf er á.
Það helsta frá vikunni sem leið
- Seðlabankinn birti í síðustu viku gögn um greiðslukortaveltu í mars. Samkvæmt þeim dregst kortavelta íslenskra heimila þó nokkuð saman innanlands á milli ára, en eykst verulega erlendis. Alls nam greiðslukortavelta heimila 100,1 ma.kr. í mars og dróst saman um 2,2% á milli ára á föstu verðlagi. Innanlands dróst kortavelta íslenskra heimila saman um 6,2% að raunvirði í mars en á móti jókst hún erlendis um 15,2% á föstu gengi. Samdráttur í kortaveltu er vísbending um að áfram dragi smám saman úr eftirspurn í hagkerfinu.
- Íbúðaverð hækkaði um 0,8% í mars samkvæmt vísitölu íbúðaverðs sem HMS birti á þriðjudag. Hækkunin er lítillega yfir meðalhækkun vísitölunnar á mánuði frá upphafi árs 2023. HMS birti einnig niðurstöður úr nýrri talningu á íbúðum í byggingu þar sem meðal annars kemur fram að framkvæmdir séu hafnar við byggingu 9,3% færri íbúða en á sama tíma í fyrra.
- Fjármálaráðuneytið birti ríkisfjármálaáætlun áranna 2025-2029 á þriðjudag. Áætlun um afkomu ríkissjóðs til næstu ára er lítið breytt frá síðustu fjármálaáætlun. Gert er ráð fyrir 49 ma.kr. halla í ár. Ekki er áætlað að það takist að draga úr hallarekstri á þessu ári frá því í fyrra, enda hafa umfangsmikil ófyrirséð útgjöld fallið til, svo sem í tengslum við hamfarir í Grindavík og kjarasamninga. Smám saman á að rétta úr rekstrinum á næstu árum en afgangur er ekki áætlaður fyrr en eftir alls níu ár af hallarekstri, árið 2028, þá 3 ma.kr. afgangur.
- Verðbólga í Bretlandi mældist 3,2% í mars og hjaðnaði örlítið minna en búist var við. Í fyrsta skipti í tvö ár er verðbólga í Bretlandi minni en í Bandaríkjunum, en markaðsaðilar fara varlegar í að spá vaxtalækkunum í Bretlandi eftir nýjustu verðbólgutöluna.
- Sjóvá birti uppgjör fyrir 1F 2024.
- Síminn birti niðurstöðu víxlaútboðs.
- Landsbankinn birti niðurstöðu útboðs sértryggðra skuldabréfa.
- Lánamál ríkisins hélt útboð á nýjum flokki ríkisbréfa.
- Orkuveitan birti niðurstöðu útboðs grænna skuldabréfa.
- Ölgerðin birti ársreikning.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
9. sept. 2024
Í þessari viku ber hæst útgáfa á tölum um fjölda ferðamanna í ágúst og skráð atvinnuleysi á morgun. Í síðustu viku birtist fundargerð peningastefnunefndar þar sem fram kom að allir nefndarmenn voru sammála um að halda vöxtum óbreyttum á síðasta fundi, ólíkt því sem var síðustu þrjá fundi þar áður þar sem einn nefndarmaður vildi lækka vexti um 0,25 prósentustig.
6. sept. 2024
Meðfylgjandi er mánaðarlegt yfirlit sértryggðra skuldabréfa.
5. sept. 2024
Halli mældist á viðskiptum við útlönd á öðrum fjórðungi þessa árs, ólíkt öðrum ársfjórðungi í fyrra, þegar lítils háttar afgangur mældist. Það var afgangur af þjónustujöfnuði og frumþáttatekjum, en halli á vöruskiptum og rekstrarframlögum. Hrein staða þjóðarbúsins versnaði lítillega á fjórðungnum.
3. sept. 2024
Mánaðarlegt fréttabréf frá Hagfræðideild um nýjustu hagtölur og stöðu og horfur í efnahagsmálum.
2. sept. 2024
Verðbólga lækkaði óvænt á milli mánaða í ágúst. Hagkerfið dróst örlítið saman á milli ára á öðrum ársfjórðungi, en á sama tíma er nú ljóst að hagvöxtur í fyrra var meiri en áður var talið og einnig að samdráttur var minni á fyrsta ársfjórðungi. Í þessari viku birtir Seðlabankinn gögn um greiðslujöfnuð við útlönd og fundargerð peningastefnunefndar.
30. ágúst 2024
Hagkerfið dróst örlítið saman á milli ára á öðrum ársfjórðungi, samkvæmt nýbirtum þjóðhagsreikningum Hagstofunnar. Á sama tíma er nú ljóst að hagvöxtur var meiri í fyrra en áður var talið og samdráttur einnig minni á fyrsta ársfjórðungi. Umsvif í hagkerfinu eru því meiri en áður var talið þótt landsframleiðsla dragist saman.
29. ágúst 2024
Vísitala neysluverðs hækkaði um 0,09% á milli mánaða í ágúst, samkvæmt nýbirtum tölum Hagstofu Ísland. Ársverðbólga lækkar því úr 6,3% í 6,0%, um 0,3 prósentustig. Vísitalan hækkaði nokkuð minna en við gerðum ráð fyrir, en við spáðum óbreyttri verðbólgu. Það sem kom okkur mest á óvart var lækkun á menntunarliðnum, sem skýrist af niðurfellingu á skólagjöldum einstaka háskóla. Verð á matarkörfunni lækkaði í fyrsta skiptið í þrjú ár.
27. ágúst 2024
Afgangur af þjónustuviðskiptum náði ekki að vega upp halla af vöruviðskiptum á öðrum ársfjórðungi, ólíkt því sem var fyrir ári síðan. Bæði var meiri halli af vöruviðskiptum og minni afgangur af þjónustuviðskiptum en á öðrum fjórðungi síðasta árs.
26. ágúst 2024
Peningastefnunefnd hélt vöxtum óbreyttum í síðustu viku, eins og búist var við. Nokkur kraftur er í fasteignamarkaðnum og vísitala íbúðaverðs og vísitala leiguverðs hækkuðu báðar þó nokkuð í júlí. Í þessari viku fáum við verðbólgutölur fyrir ágústmánuð og þjóðhagsreikninga annars ársfjórðungs.
20. ágúst 2024
Hagstofan hefur frá því í júní notað nýja aðferð við að mæla kostnað við búsetu í eigin húsnæði. Hefði Hagstofan ekki breytt um aðferð væri verðbólgumælingin nú líklega hærri. Um næstu áramót áforma stjórnvöld að breyta innheimtu gjalda á ökutæki sem mun að líkindum einnig hafa áhrif til lækkunar á mældri verðbólgu.