Vikubyrjun 21. október 2024
Í síðustu viku birtum við hagspá til ársins 2027. Vísitala íbúðaverðs og vísitala leiguverðs lækkuðu á milli mánaða í september og greiðslukortavelta heimilanna dróst saman á milli ára innanlands en jókst erlendis. Seðlabankinn birti fundargerð peningastefnunefndar og voru allir nefndarmenn sammála um að lækka vexti. Nokkur fyrirtæki birta uppgjör í þessari viku.
21. október 2024
Vikan framundan
- Í dag birtir Sjóvá uppgjör.
- Á þriðjudag birta Icelandair og Síminn uppgjör.
- Á miðvikudaginn birtir Hagstofan veltu skv. VSK skýrslum og vísitölu launa. Íslandsbanki og Landsbankinn birta uppgjör.
- Á fimmtudag birtir Play uppgjör.
Mynd vikunnar
Við spáum því að hagkerfið standi nánast í stað á milli ára í ár. Bakslag í útflutningsgreinum setti svip sinn á fyrri hluta árs, loðnubrestur og hægari vöxtur ferðaþjónustu ollu samdrætti á sama tíma og háir vextir hafa kælt eftirspurnina sem engu að síður mælist nokkuð kröftug. Samkvæmt spánni fer hagkerfið svo rólega af stað með um 2% hagvexti árlega næstu árin. Við spáum því að verðbólgan hjaðni nokkuð stöðugt út spátímann, þó einstaka bakslag geti gert vart við sig. Peningastefnunefnd Seðlabankans hóf vaxtalækkunarferlið fyrr í þessum mánuði og við spáum því að áfram verði tekin hægfara skref til lækkunar samhliða hjaðnandi verðbólgu.
Það helsta frá vikunni sem leið
- Samkvæmt fundargerð peningastefnunefndar greiddu allir nefndarmenn atkvæði með tillögu seðlabankastjóra um að lækka vexti um 0,25 prósentustig á síðasta fundi nefndarinnar, þótt einn nefndarmaður hefði heldur kosið að halda vöxtum óbreyttum. Samstaðan var meiri en við höfðum búist við.
- HMS birti vísitölu íbúðaverðs, vísitölu leiguverðs og mánaðarskýrslu. Vísitala íbúðaverðs lækkaði á milli mánaða í fyrsta sinn frá því í janúar, nú um 0,28%. Sérbýli á höfuðborgarsvæðinu lækkaði mest í verði, um 1,72%, á meðan sérbýli á landsbyggðinni hækkaði í verði, um 2,45%. Árshækkun vísitölunnar lækkaði úr 10,8% niður í 9,5%. Vísitala leiguverðs lækkaði einnig á milli mánaða, um 0,6%. Þrátt fyrir að leiguverðsvísitalan hafi lækkað minna en íbúðaverðsvísitalan er árshækkun leiguverðs meiri en íbúðaverðs, eða 10,5%.
- Alls nam greiðslukortavelta íslenskra heimila 120,8 mö.kr. í september og jókst um 1,2% á milli ára, að teknu tilliti til verðlags og gengis. Innanlands dróst kortavelta íslenskra heimila saman um 1,8% að raunvirði og erlendis jókst hún um 12,4% á föstu gengi, sé miðað við septembermánuð í fyrra. Þótt áfram sé kraftur í kortaveltu Íslendinga erlendis virðist loks farið að hægja á henni innanlands. Innlend kortavelta dróst saman í fyrsta sinn frá því í mars og heildarkortaveltan jókst þó nokkuð minna en á allra síðustu mánuðum.
- Frumvarp um kílómetragjald vegna notkunar ökutækja var sett í samráðsgátt stjórnvalda. Við bíðum frekari upplýsinga frá Hagstofunni um það hvort eða hvernig breytt gjaldtaka kann að hafa áhrif á vísitölu neysluverðs.
- Samtök atvinnulífsins birtu niðurstöður nýrrar könnunar Gallup á meðal 400 stærstu fyrirtækja landsins.
- Seðlabanki Evrópu lækkaði vexti um 0,25 prósentustig. Almennt var búist við þessari lækkun, en verðbólga á evrusvæðinu fór nýlegu undir 2% verðbólgumarkmið bankans og flestar nýlegar hagtölur hafa bent til kólnunar. Bankinn hóf vaxtalækkunarferilinn í júní og er þetta þriðja lækkunin á fjórum fundum.
- Verðbólga í Bretlandi mældist 1,7% í september og er þar með komin niður fyrir verðbólgumarkmið þar í landi.
- Hagar birtu uppgjör (fjárfestakynning). Play tilkynnti að félagið hygðist breyta viðskiptalíkani sínu auk þess að sækja um flugrekstrarleyfi á Möltu, Eik tilkynnti um niðurstöður úr yfirtökutilboðs Langasjávar og Reitir undirrituðu samkomulag um kaup á fasteignum í atvinnuhúsnæði.
- Lánamál ríkisins héldu útboð á ríkisvíxlum og ríkisbréfum. Síminn hélt víxlaútboð.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
28. maí 2026
Vísitala neysluverðs hækkaði um 0,07% á milli mánaða og verðbólga lækkar því úr 5,2% í 5,1%. Við höfðum spáð því að verðbólga myndi lækka í 4,9%. Hækkun á flugfargjöldum hafði mest áhrif til hækkunar á ársverðbólgu í mánuðinum en lækkun á virðisaukaskatti á eldsneyti hafði mest áhrif til lækkunar. Án lækkunarinnar á virðisaukaskatti hefði verðbólga mælst 5,5%. Athygli vekur að verð á mat og drykk lækkaði á milli mánaða, annan mánuðinn í röð.
27. maí 2026
Þrátt fyrir minna flugframboð um Keflavíkurflugvöll hafa jafn margir erlendir ferðamenn farið um flugvöllinn fyrstu fjóra mánuði ársins í ár og í fyrra. Á móti fara færri tengifarþegar um flugvöllinn og utanlandsferðir Íslendinga hafa dregist verulega saman. Þó sumarið líti ágætlega út er meiri óvissa um haustið.
26. maí 2026
Peningastefnunefnd hækkaði vexti bankans um 0,25 prósentustig í síðustu viku, líkt og við höfðum spáð. Nú í vikunni koma verðbólgutölur og þjóðhagsreikningar.
20. maí 2026
Peningastefnunefnd hækkaði stýrivexti um 0,25 prósentustig annað skiptið í röð og segist tilbúin til að hækka vexti enn frekar. Efnahagshorfur hafa þó versnað verulega að mati bankans, en verðbólguspá var hækkuð í nýútgefnum Peningamálum og hagvaxtaspá lækkuð auk þess sem gert er ráð fyrir auknu atvinnuleysi. Kólnunin í hagkerfinu mun þó gera það að verkum að hættan á aukinni verðbólgu fram á við er minni.
19. maí 2026
Kortavelta íslenskra heimila dróst verulega saman á milli ára í apríl, eða um alls 5,8% að teknu tilliti til verðlags og gengis. Svo mikill samdráttur hefur ekki mælst síðan í febrúar 2021. Peningastefnunefnd fundar í dag vegna vaxtaákvörðunar á morgun, en við gerum áfram ráð fyrir 0,25 prósentustiga hækkun vaxta.
18. maí 2026
Í vikunni fram undan er vaxtaákvörðun hjá Seðlabanka Íslands og við spáum 0,25 prósentustiga hækkun. Fjöldi ferðamanna á fyrstu fjórum mánuðum ársins var svipaður og á sama tímabil í fyrra samkvæmt tölum sem birtust í síðustu viku. Utanlandsferðum Íslendinga hefur aftur á móti fækkað töluvert. Atvinnuleysi heldur áfram að aukast á milli ára.
13. maí 2026
Við spáum því að peningastefnunefnd Seðlabanka Íslands hækki vexti um 0,25 prósentustig í næstu viku. Verðbólga er enn yfir markmiði og verðbólguvæntingar hafa reynst þrálátar. Að okkar mati mun það ráða mestu um að nefndin haldi áfram vaxtahækkunarferlinu sem hófst í mars.
12. maí 2026
Við spáum því að vísitala neysluverðs lækki um 0,13% á milli mánaða í maí. Gangi spáin eftir mun verðbólga lækka úr 5,2% í 4,9%. Lægra eldsneytisverð vegna lækkunar á virðisaukaskatti og lækkun flugfargjalda hafa mest áhrif til lækkunar á milli mánaða samkvæmt spánni. Við spáum að verðbólga mælist 4,9% í ágúst og kjarasamningar því mögulega í húfi.
11. maí 2026
Starfandi samkvæmt skrám fækkaði á milli ára. Frjósemi á Íslandi síðastliðin tvö ár hefur ekki mælst minni síðan mælingar hófust. Í þessari viku fáum við m.a. ferðamannatölur og atvinnuleysi ásamt uppgjörum frá félögum.
8. maí 2026
Það sem af er ári hefur krónan styrkst og evran stendur núna í 144 krónum. Nokkuð gott jafnvægi hefur verið á milli innflæðis og útflæðis á gjaldeyrismarkaði. Raungengi er mjög hátt og við eigum von á að krónan veikist næstu ár.