Vikubyrjun 17. mars 2025
Við búumst við að peningastefnunefnd lækki vexti um 0,25 prósentustig á miðvikudaginn. Í síðustu viku fóru fram verðmælingar vegna marsmælingar vísitölu neysluverðs og við spáum því að verðbólga lækki úr 4,2% í 3,9%. Atvinnuleysi var 4,3% í febrúar og hækkaði um 0,4 prósentustig á milli ára. 147 þúsund erlendir ferðamenn fóru um Keflavíkurflugvöll í febrúar, 5,6% færri en í sama mánuði í fyrra.
17. mars 2025
Vikan framundan
- Í dag birtir Seðlabankinn greiðslumiðlun í febrúar.
- Á þriðjudag birtir HMS vísitölu íbúðaverðs í febrúar.
- Á miðvikudag er vaxtaákvörðun hjá Seðlabanka Íslands. Við eigum von á 0,25 prósentustiga lækkun. HMS birtir vísitölu leiguverðs og það er vaxtaákvörðun í Bandaríkjunum.
- Á fimmtudag birtir HMS mánaðarskýrslu um fasteignamarkaðinn og það er vaxtaákvörðun hjá Englandsbanka.
- Á föstudag birtir Hagstofan vísitölu launa í febrúar.
Mynd vikunnar
Verðbólga fór hæst í 10,2% í febrúar fyrir tveimur árum en hefur síðan lækkað niður í 4,2%. Við eigum von á að hún lækki áfram niður í 3,9% nú í mars. Ef við skoðum meðaltal helstu mælikvarða á verðbólguvæntingum sést að það fór hæst í 6,5% í maí 2023. Það lækkaði síðan samhliða lækkun verðbólgu og var komið niður í 3,8% í nóvember í fyrra. Þrátt fyrir að verðbólga hafi lækkað síðan í nóvember hafa verðbólguvæntingar hækkað og eru nú komnar upp í 4,0%. Það getur reynst erfitt að ná verðbólgunni niður í 2,5% verðbólgumarkmið ef verðbólguvæntingar lækka ekki fyrst og því er stýrivöxtum haldið hærra en ella.
Það helsta frá vikunni sem leið
- Í síðustu viku fóru fram verðmælingar vegna marsmælingar vísitölu neysluverðs. Við spáum því að vísitalan hækki um 0,54% á milli mánaða og ársverðbólgan lækki úr 4,2% í 3,9%. Lækkun á ársverðbólgu á milli mánaða skýrist að mestu af mikilli hækkun á reiknaðri húsaleigu á milli mánaða í febrúar í fyrra, en sú mæling dettur núna út úr ársverðbólgunni. Eftir nokkuð öra hjöðnun síðustu tvö ár teljum við komið að kaflaskilum í baráttunni við verðbólguna og að nú hægi á hjöðnuninni. Þannig gerum við ráð fyrir að verðbólga verði nokkuð stöðug í kringum 4% næstu mánuði.
- Skráð atvinnuleysi var 4,3% í febrúar og hækkaði um 0,4 prósentustig á milli ára. Þetta er annar mánuðurinn í röð sem atvinnuleysi er 0,4 prósentustigum hærra en í sama mánuði árið áður, en megnið af síðasta ári mældist um 0,2-0,3 prósentustiga aukning milli ára.
- 147 þúsund erlendir ferðamenn fóru um Keflavíkurflugvöll í febrúar, 5,6% færri en í sama mánuði í fyrra. Í janúar sl. voru ferðamenn 5,8% færri en í janúar í fyrra. Janúar og febrúar í fyrra voru mjög sterkir mánuðir, en erlendum ferðamönnum fjölgaði um 6,1% á milli ár í janúar og um 13,8% í febrúar það ár.
- Íbúar landsins voru 389 þúsund í byrjun árs og fjölgaði um 5.700 manns í fyrra (1,5%).
- Verðbólga í Bandaríkjunum mældist 2,8% febrúar og lækkaði úr 3,0% í janúar. Talan var lægri en búist var við. Þrátt fyrir það er alls óvíst hvaða áhrif þetta hefur á vaxtalækkunarferlið vestanhafs þar sem mikil óvissa ríkir nú um framvindu efnahagsmála þar.
- Fjármála- og efnahagsráðuneytið setti fram tillögur um uppgjör HFF-bréfa og boðaði til fundar með eigendum HFF150434 og HFF150644 þar sem atkvæðagreiðsla verður haldin um tillögurnar.
- Oculis birti uppgjör.
- Lánasjóður sveitarfélaga, Orkuveita Reykjavíkur og Reitir héldu skuldabréfaútboð, Alma íbúðafélag hélt útboð á víxlum, Íslandsbanki gaf út skuldabréf í evrum og Landsbankinn gaf út víkjandi forgangsbréf í sænskum krónum. Lánamál ríkisins tilkynntu um niðurstöðu úr viðbótarútgáfu og birtu Markaðsupplýsingar.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
23. apríl 2025
Við teljum horfur á tiltölulega hófstilltum verðhækkunum á íbúðamarkaði næstu árin, 5,9% hækkun á þessu ári, 4,8% hækkun á næsta ári og 6,4% hækkun árið 2027. Til samanburðar hefur íbúðaverð hækkað um 9% á ári að jafnaði frá aldamótum, og að meðaltali um 13% á ári frá árinu 2021.
22. apríl 2025
Leiguverð hefur hækkað um 11,3% á síðustu tólf mánuðum, þó nokkuð meira en íbúðaverð sem hefur hækkað um 8% á sama tímabili. Hækkanir á íbúða- og leigumarkaði eru þó nokkuð umfram almennar verðhækkanir í landinu, en verðbólga mældist 3,8% í mars. Áfram er kraftur í innlendri neyslu, greiðslukortavelta heimila hefur aukist statt og stöðugt síðustu mánuði og var 1,8% meiri í mars síðastliðnum en í mars í fyrra.
16. apríl 2025
Sviptingar í alþjóðaviðskiptum gætu haft margvísleg áhrif á ferðaþjónustu hér á landi. Tollar gætu rýrt kaupmátt Bandaríkjamanna og haft áhrif á komur þeirra hingað til lands. Auk þess eru merki um að áhugi Evrópubúa á að heimsækja Bandaríkin fari dvínandi, sem gæti haft áhrif hingað heim, enda hafa Evrópubúar gjarnan komið við á Íslandi á leið sinni vestur um haf. Í nýrri hagspá gerum við ráð fyrir samdrætti í ferðaþjónustu á þessu ári, en að hún taki aftur við sér á næstu tveimur árum.
14. apríl 2025
Í síðustu viku birtum við hagspá til næstu ára þar sem við spáum 1,4% hagvexti í ár og um 2% hagvexti næstu árin. Ferðamönnum fækkaði um 13,8% milli ára í mars. Skráð atvinnuleysi í mars var 0,4 prósentustigum hærra en í mars í fyrra. Þau tíðindi bárust einnig að skuldabréfaeigendur ÍL-sjóðs hefðu samþykkt að breyta skilmálum bréfanna sem heimilar útgefanda að gera upp bréfin. Í þessari viku birtir svo HMS vísitölu íbúðaverðs og leiguverðs.
10. apríl 2025
Við spáum því að vísitala neysluverðs hækki um 0,77% á milli mánaða í apríl og að verðbólga hækki úr 3,8% í 4,0%. Hækkunin á milli mánaða skýrist meðal annars af tímasetningu páskanna í ár.
9. apríl 2025
Hagkerfið hefur kólnað eftir kröftugt vaxtarskeið fyrstu árin eftir Covid-faraldurinn og við teljum að nú fari það hægt af stað á ný.
7. apríl 2025
Í síðustu viku kynnti Bandaríkjaforseti umfangsmikla tolla á allan innflutning til landsins, þ. á m. 10% tolla á vörur frá Íslandi, sem hafa þegar tekið gildi. Fundargerð peningastefnunefndar var birt og þar kemur fram að nefndin taldi svigrúm til 0,25 eða 0,50 prósentustiga vaxtalækkunar við síðustu vaxtaákvörðun. Samkvæmt nýrri ríkisfjármálaáætlun er markmið ríkisstjórnarinnar að tryggja hallalausan ríkisrekstur árið 2027.
1. apríl 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
31. mars 2025
Verðbólga lækkaði úr 4,2% í 3,8% í mars. Lækkun á verðbólgu skýrist að langstærstum hluta af því að reiknuð húsaleiga hækkaði minna en í sama mánuði í fyrra. Undirliggjandi verðbólga hjaðnaði líka sem sést á því að VNV án húsnæðis og allar kjarnavísitölur lækkuðu á milli mánaða. Fjármálastöðugleikanefnd telur fjármálakerfið standa traustum fótum en segir mikla óvissu í alþjóðamálum geta reynt á viðnámsþrótt þjóðarbúsins.
27. mars 2025
Vísitala neysluverðs hækkaði um 0,37% á milli mánaða í mars, samkvæmt nýbirtum tölum Hagstofu Íslands. Ársverðbólga lækkar úr 4,2% í 3,8% og er komin undir efri vikmörk verðbólgumarkmiðs Seðlabanka Íslands, í fyrsta skipti frá því í lok árs 2020. Verðmælingin var nokkuð góð en við teljum að á næstunni hægi á hjöðnuninni.