Spáum 4,9% verðbólgu í febrúar
Við spáum því að vísitala neysluverðs hækki um 0,64% á milli mánaða í febrúar og að ársverðbólga lækki úr 5,2% í 4,9%. Janúarútsölur ganga alla jafna til baka í febrúar og mars sem skýrir stærstan hluta þeirrar hækkunar sem við gerum ráð fyrir á milli mánaða í febrúar. Við búumst við því að húsnæðisliðurinn hækki svipað og í fyrra og muni því ekki ýta undir verðbólgu. Samkvæmt spánni hækka flestir aðrir liðir minna en í febrúar í fyrra og hjöðnun á milli mánaða því á nokkuð breiðum grunni, þó hún sé ekki mikil.
Útsölur ganga til baka
Janúarútsölurnar voru svipaðar og í fyrra. Verð á fötum og skóm lækkaði um 7,4% í janúar og við gerum ráð fyrir að verðlækkunin gangi til baka á tveimur mánuðum eins og venjulega. Útsölutakturinn á fötum og skóm í fyrra var þó óvenjulegur að því leyti að útsölurnar gengu mjög hægt til baka, ef frá eru taldar nóvemberútsölurnar sem gengu til baka í einum rykk í desember. Við gerum ekki ráð fyrir sambærilegri þróun og í fyrra og búumst við því að verð á fötum og skóm hækki um 4% nú í febrúar og um 3% í mars. Útsölutakturinn á húsgögnum og heimilisbúnaði var þó hefðbundinn í fyrra og við spáum því að útsölur í þeim lið gangi til baka að fullu nú í febrúar og að verð hækki um 5%.
Matarkarfan hækkar minna
Við gerum ráð fyrir að verð á mat og drykkjarvörum hækki um 0,34%. Síðustu mánuði hefur hægt nokkuð á verðhækkunum á mat og drykkjarvörum, að janúar undanskildum. Hækkunin nú er töluvert minni en í febrúar í fyrra og mun því hafa áhrif til lækkunar á ársverðbólgu.
Húsnæðisliðurinn stendur í stað
Það eru ekki allar gjaldskrárhækkanir komnar fram ennþá. Gjaldskrárbreytingar fyrir sorphirðu, kalt vatn og holræsagjöld koma inn í mælingar í febrúar hvers árs, nú þriðja árið í röð. Við gerum ráð fyrir að það hafi nokkur áhrif til hækkunar á milli mánaða í febrúar, en að breytingin verði þó svipuð og í fyrra og hafi því ekki áhrif á ársverðbólgu. Við gerum áfram ráð fyrir að reiknuð húsaleiga hækki um 0,5% eins og síðustu mánuði.
Spá um þróun VNV í febrúar 2026
| Undirliður | Vægi í VNV | Breyting (spá) | Áhrif (spá) |
| Matur og drykkjarvara | 15,5% | 0,3% | 0,05% |
| Áfengi og tóbak | 2,5% | 0,0% | 0,00% |
| Föt og skór | 3,5% | 4,0% | 0,14% |
| Húsnæði án reiknaðrar húsaleigu | 9,4% | 0,5% | 0,05% |
| Reiknuð húsaleiga | 20,9% | 0,5% | 0,10% |
| Húsgögn og heimilisbúnaður | 4,1% | 5,0% | 0,20% |
| Heilsa | 4,0% | 0,0% | 0,00% |
| Ferðir og flutningar (annað) | 5,8% | 0,6% | 0,03% |
| - Kaup ökutækja | 4,7% | 0,1% | 0,00% |
| - Bensín og díselolía | 2,6% | 0,1% | 0,00% |
| - Flugfargjöld til útlanda | 2,1% | -1,4% | -0,03% |
| Upplýsingar og fjarskipti | 4,3% | 1,0% | 0,04% |
| Afþreying, íþróttir og menning | 9,2% | 0,1% | 0,01% |
| Menntun | 1,1% | 0,0% | 0,00% |
| Hótel og veitingastaðir | 5,6% | 0,3% | 0,02% |
| Fjármálaþjónusta | 1,2% | 0,1% | 0,00% |
| Umhirða og félagsþjónusta | 3,4% | 0,3% | 0,01% |
| Alls | 100,0% | 0,64% |
Gerum ráð fyrir því að verðbólga mjakist niður næstu mánuði
Við spáum því að vísitala neysluverðs hækki um 0,64% í febrúar, 0,32% í mars, 0,71% í apríl og verði óbreytt í maí. Gangi spáin eftir verður verðbólga 4,9% í febrúar, 4,8% í mars, 4,6% í apríl og 4,4% í maí. Þessi spá er aðeins lægri en síðasta spá okkar, en það skýrist að mestu af því að við endurskoðuðum spána um verð flugfargjalda til útlanda næstu mánuði niður á við.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
