Vísitala neysluverðs hækkaði um 0,36% á milli mánaða í júlí og verðbólga hækkar því úr 5,2% í 5,3%. Við höfðum spáð því að vísitalan myndi hækka um 0,34% og að verðbólga yrði óbreytt í 5,2%. Júlí er sjöundi mánuðurinn í röð þar sem verðbólga mælist yfir 5%. Vísitala neysluverðs án húsnæðis hélst óbreytt á milli mánaða í 4,8%. Þetta er síðasta mælingin sem birtist fyrir vaxtaákvörðun Peningastefnunefndar þann 19. ágúst og teljum við líkur á að vextir verði hækkaðir aftur þá.
Breytt samsetning ársverðbólgu
Ef við skoðum breytingu á samsetningu ársverðbólgu sést að framlag bensíns lækkaði á milli mánaða. Heimsmarkaðsverð á olíu hefur aftur á móti hækkað síðan í verðkönnunarvikunni, þannig að það er viðbúið þetta gangi til baka í ágúst. Framlag ferðaþjónustu án flugfargjalda til útlanda og framlag húsnæðis hækkaði.
Helstu liðir
Það var mjög lítill munur á spá okkar og mælingu Hagstofunnar og enginn undirliður sem kom mikið á óvart. Matarkarfan var næstum óbreytt á milli mánaða, en við áttum von á smá hækkun. Upplýsingar og fjarskipti hækkuðu, en við áttum von á smá lækkun.
- Matarkarfan var næstum óbreytt á milli mánaða, en við spáðum 0,3% hækkun.
- Föt og skór lækkuðu um 4,7% vegna júlíútsalna, sem er svipað og síðustu ár.
- Flugfargjöld til útlanda hækkuðu um tæp 15,7%, en við spáðum 15,2% hækkun. Flugfargjöld eru nú 23% dýrari en fyrir ári.
- Reiknuð húsaleiga hækkaði um 0,6% eins og við áttum von á.
- Eldsneytisverð lækkaði um 3,6% á milli mánaða, en við spáðum 3,0% lækkun.
Eigum von á að verðbólga verði áfram yfir 5% næstu þrjá mánuði
Við gerum ráð fyrir að vísitalan lækki um 0,08% í ágúst, hækki um 0,16% í september og hækki um 0,11% í október. Gangi spáin eftir mun ársverðbólgan mælast 5,3% í ágúst, 5,4% í september og 5,0% í október. Við gerum ekki miklar breytingar frá síðustu spá sem við birtum í verðkönnunarvikunni. Við gerum þó ráð fyrir aðeins lægri ársverðbólgu í ágúst, en aftur á móti meiri í september sem skýrist m.a. af því að komugjöld á heilsugæslu hækka samkvæmt reglugerð í september, en ekki ágúst, líkt og frétt á vef stjórnarráðsins í byrjun júlí gaf til kynna. Heimsmarkaðsverð á olíu hefur hækkað talsvert síðan í verðkönnunarvikunna og erum við því að gera ráð fyrir hærra olíuverði næstu mánuði.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
