Merki um að innlend neysla sé að minnka
Greiðslukortavelta heimilanna jókst einungis um 0,8% á milli ára í mars, að teknu tilliti til verðlags og gengis. Þar af jókst kortavelta erlendis um 13,5% á milli ára á föstu gengi, sem er þó nokkur vöxtur í ljósi þess að Íslendingar fóru í tæplega 4% færri utanlandsferðir í mánuðinum samanborið við fyrra ár og er því merki um aukna netverslun Íslendinga. Kortavelta Íslendinga erlendis kemur bæði frá kortum sem eru notuð á ferðalögum erlendis og erlendri netverslun. Kortavelta innanlands dróst saman um 2,8% að raunvirði. Þetta er annar mánuðurinn í röð þar sem kortavelta innanlands dregst saman.
Horfur á hægum vexti einkaneyslu
Í nýjustu hagspá okkar gerum við ráð fyrir verulega minni vexti einkaneyslu í ár en á síðasta ári, enda vöxturinn kraftmikill í fyrra. Aukin einkaneysla í fyrra byggði að miklu leyti á bílakaupum, en hærri vörugjöld á bíla um síðustu áramót hafa eflaust haft áhrif. Við gerum því ráð fyrir því að bílakaup verði með rólegra móti í ár. Gögn fyrir fyrstu þrjá mánuði þessa árs sýna 14% samdrátt á nýskráðum bílum til einstaklinga miða við sama tímabil í fyrra.
Við teljum að hátt vaxtastig muni draga úr vexti einkaneyslu á næstu árum. Við gerum ráð fyrir 0,4% vexti í einkaneyslu í ár, 1,2% á næsta ári og 2,0% árið 2028. Þá gerum við ráð fyrir að vextir verði lægri og að aukinn kraftur færist í atvinnulífið. Kaupmáttur mun þrátt fyrir það aukast öll ár spátímans sem styður við áframhaldandi vöxt einkaneyslu, sem við teljum þó að verður hóflegur, gangi spáin eftir.
Hóflegar launahækkanir næstu misseri
Við spáum mun hófstilltari launahækkunum á spátímanum en síðustu ár. Eftirspurn eftir starfsfólki hefur minnkað og atvinnuleysi aukist. Við teljum að laun hækki að jafnaði um 5,2% í ár og 4,8-4,9% árin á eftir. Í spánni gerum við ráð fyrir að kjarasamningar haldi nokkurn veginn, en samkvæmt verðbólguspá okkar er mjög líklegt að hún verði yfir því sem kveðið er á um í forsenduákvæði samninganna. Um það ríkir þó auðvitað mikil óvissa.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
