Verðbólga jókst úr 5,2% í 5,4% í marsmánuði og hefur ekki verið meiri síðan í september 2024. Verðbólga var í takt við það sem við spáðum í mánuðinum en horfurnar fram á við hafa aðeins versnað, aðallega vegna hærra olíuverðs sem rekja má til átakanna við Persaflóa. Bráðabirgðaspá okkar gerir nú ráð fyrir 5,5% verðbólgu í apríl, en hægfara hjöðnun í framhaldinu. Gangi þessi spá eftir er nær öruggt að Seðlabankinn hækki vexti í maí um 0,25 eða 0,50 prósentustig. Það yrði þá önnur hækkunin í röð en Peningastefnunefnd hækkaði vexti á fundi sínum í mars, í fyrsta sinn síðan í ágúst 2023, og sló talsvert harðari tón í yfirlýsingunni en heyrðist á febrúarfundinum.
Húsnæðismarkaður heldur áfram að sýna merki kólnunar. Íbúðaverð hækkaði aðeins um 0,1% á milli mánaða í febrúar og hafa íbúðaverðshækkanir á ársgrundvelli verið minni en hækkanir á almennu verðlagi síðustu mánuði. Kaupsamningum fækkaði einnig talsvert á milli mánaða í febrúar eða um 12%. Hægt gengur að selja nýjar íbúðir og sýnir ný talning HMS að fullbúnum óseldum íbúðum fjölgar hratt. Fjöldi þeirra nú er um 41% meiri en í síðustu talningu sem var í september sl. Fjármálastöðugleikanefnd Seðlabankans vakti máls á þessu á fundi sínum í lok mars en nefndi þó að vanskil fyrirtækja í byggingageira væru enn lítil. Þetta væri þó áhættuþáttur sem þyrfti að vera vakandi fyrir.
Almennt má segja að hægt hafi á umsvifum í hagkerfinu. Atvinnuleysi hefur aukist og hægt hefur á kortaveltu. Nýjustu tölur sýna einungis 1,5% raunvöxt kortaveltu í febrúar og hefur vöxturinn ekki verið minni síðan í september 2024. Innanlands hefur kortavelta dregist saman. Ríkisfjármálaáætlun til næstu ára var birt rétt fyrir mánaðamót. Þar er lögð fram hallalaus áætlun sem byggir meðal annars á því að tekjur ríkissjóðs verði auknar í gegnum skattkerfið ásamt hagræðingaraðgerðum.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
