Íbúðum í byggingu fjölgar á höfuðborgarsvæðinu
Í fyrra bættust 2.192 nýjar íbúðir við húsnæðisstofn höfuðborgarsvæðisins, 1.962 í fjölbýli og 230 sérbýli. Þetta er fækkun upp á 355 íbúðir milli ára, en á árinu 2020 bættust 2.547 nýjar íbúðir við húsnæðisstofn höfuðborgarsvæðisins sem er mesti fjöldi sem hefur sést á einu ári frá upphafi gagnasöfnunar hjá Þjóðskrá. Aðeins tvisvar hafa fleiri íbúðir bæst við stofninn en í fyrra, árin 2007 og 2020. Fjöldi nýbygginga er því talsverður á höfuðborgarsvæðinu eins og staðan er í dag.
Að jafnaði hafa um 1.300 nýjar íbúðir bæst við markaðinn á hverju ári. Nú hefur fjöldinn verið ofar meðaltalinu fjögur ár í röð. Þrátt fyrir það er spenna mikil á fasteignamarkaði og framboð virðist treglega geta mætt aukinni eftirspurn vegna lægri vaxta og breyttra aðstæðna í samfélaginu vegna faraldursins. Það er viðbúið að sú eftirspurn dragist saman eftir því sem vextir hækka, en þrátt fyrir það þarf framboðið að vera tryggt, ekki síst vegna örari fólksflutninga til landsins.
Um síðustu áramót voru alls 3.181 íbúðir í byggingu á höfuðborgarsvæðinu, 2.659 í fjölbýli og 522 í sérbýli. Þetta er aukning upp á 567 íbúðir milli ára, eða 22%, miðað við stöðuna áramótin þar áður. Það má því reikna með að áfram komi talsvert af nýjum íbúðum inn á markað í ár.
