Áfram rólegt á íbúðamarkaði
Vísitala íbúðaverðs lækkaði um 0,4% á milli mánaða í maí. Þetta er í fyrsta sinn á árinu sem vísitalan lækkar á milli mánaða, en hún stóð í stað í apríl.
Verðlækkun á sérbýli á höfuðborgarsvæðinu skýrir lækkun á vísitölunni í maí, en fjölbýli á höfuðborgarsvæðinu hækkaði lítillega.
Fjölbýli á höfuðborgarsvæðinu helst nokkuð stöðugt
Lækkunin í maí skýrist einkum af 1,9% lækkun á verði sérbýlis á höfuðborgarsvæðinu. Verð á sérbýli sveiflast mun meira en verð á fjölbýli, enda eru sérbýli færri og fjölbreyttari en íbúðir í fjölbýli. Skammtímabreytingar á verði sérbýlis segja því minna um undirliggjandi verðþrýsting á íbúðamarkaði. Bæði fjölbýli á höfuðborgarsvæðinu og á landsbyggðinni hækkuðu um 0,3%. Verð á sérbýli á landsbyggðinni hækkaði um 0,4%. Þróun verðs á fjölbýli á höfuðborgarsvæðinu, sem gefur skýrari mynd af undirliggjandi þróun íbúðaverðs, hefur haldist nokkuð stöðug á síðustu misserum.
Ef íbúðaverð er skoðað með sama hætti og verðbólga, þ.e. þróun vísitölunnar síðustu tólf mánuði, hefur ársbreytingin haldist nokkuð stöðug það sem af er ári. Á síðustu tólf mánuðum hefur íbúðaverð hækkað um 2,2%. Frá því í ársbyrjun hefur ársbreytingin verið á bilinu 2,2-2,6%. Verðið hefur hækkað meira á höfuðborgarsvæðinu en á landsbyggðinni síðustu 12 mánuði, eða um 2,5% á höfuðborgarsvæðinu og um 1,3% á landsbyggðinni.
Raunverð hefur lækkað sex mánuði í röð
Á síðustu tólf mánuðum hefur íbúðaverð hækkað þó nokkuð minna en almennt verðlag. Raunverð íbúða er nú 2,4% lægra en á sama tíma í fyrra og hefur mælst lægra sex mánuði í röð. Raunverð fæst með því að taka tillit til verðbólgu og við notum vísitölu neysluverðs án húsnæðis til þess. Raunverð lækkar þannig á milli ára ef árshækkun íbúðaverðs er minni en árshækkun vísitölu neysluverðs án húsnæðis.
Kaupsamningum fækkar um 15% á milli ára
Velta á íbúðamarkaði er töluvert minni fyrstu fimm mánuði ársins en á sama tíma í fyrra. Alls voru um 750 kaupsamningar undirritaðir í maí, álíka margir og í apríl. Undirrituðum kaupsamningum fækkaði um 27% á milli ára í maí. Sé litið til fyrstu fimm mánaða ársins hefur kaupsamingum fækkað um 15% frá sama tímabili í fyrra. Þessar tölur benda til þess að enn sé rólegt á íbúðamarkaði. Verðþróun er afar hófstillt, þó enn virðist vera nokkur gangur í sölu.
Fyrirvari
Innihald og form þessarar greiningar er unnið af starfsfólki Greiningardeildar Landsbankans hf. (greiningardeild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Greiningardeildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Greiningardeild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
