Hlutabréfamarkaðir upp í október
Vísitala Aðallista kauphallarinnar hækkaði um 5,2% í október eftir að hafa lækkað um 8,3% í september. Flest félögin í kauphöllinni hækkuðu í október eða 18 af samtals 22 félögum. Langmesta hækkunin var með bréf Origo sem hækkuðu um 30,5% í mánuðinum. Næstmesta hækkunin var í Marel, 13,4% og sú þriðja mesta í Eimskip, 11,8%. Minnstu hækkanirnar urðu í Festi (0,4%), Nova klúbbnum (0,5%) og Sýn (0,8%). Fjögur félög lækkuðu í verði, en mest lækkuðu bréf Iceland Sefood (-5,8%), Ölgerðarinnar Egill Skallagrímsson (-3,2%) og Síldarvinnslunnar (-1,7%).
Helmingur þeirra félaga, sem hafa verið skráð lengur en 12 mánuði á hlutabréfamarkaði, eru með jákvæða ávöxtun á síðustu 12 mánuðum. Mesta hækkunin hefur verið í Skel fjárfestingarfélagi (24,5%) en þar á eftir kemur Origo (16,8%) og Sýn (16,5%). Mesta lækkunin hefur verið hjá Iceland Seafood (-56%) en þar á eftir kemur Marel (-41,2%) og Kvika banki (-31,3%).
Markaðurinn í Hong Kong hefur misst þriðjung á 4 mánuðum
Líkt og hér á landi hækkuðu nánast allir hlutabréfamarkaðir helstu viðskiptalanda Íslands í október. Að meðaltali var hækkunin 6,4% en bandaríski markaðurinn hækkaði um 8%. Einu markaðirnir sem lækkuðu í verði voru sá kínverski og nágrannamarkaðurinn í Hong Kong. Kínverski markaðurinn lækkaði um 4,3% en markaðurinn í Hong Kong lækkaði um 14,7%. Þetta var fjórði mánuðurinn í röð sem sá síðarnefndi lækkar. Samanlagt hefur markaðurinn í Hong Kong tapað þriðjungi af verðgildi sínu á þessum fjórum mánuðum sem er mjög mikil lækkun á ekki lengra tímabili.
Norski markaðurinn sá eini með jákvæða ávöxtun á síðustu 12 mánuðum
Síðustu 12 mánuði hefur ávöxtun hlutabréfamarkaða verið neikvæð í flestum tilfellum. Sé litið til helstu viðskiptalanda Íslands er norski markaðurinn sé eini sem er enn með jákvæða ávöxtun en 12 mánaða ávöxtun hans er 5,4%. Lækkunin er minnst í Japan (-3,6%), þar á eftir kemur Bretland (-6,1%) og Kanada (-7,7%) þar á eftir. Mesta lækkunin er í Þýskalandi (-29,8%), Svíþjóð (-22,6%) og Finnlandi (-17,3%).
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara. Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti. Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
