Hagsjá: Fasteignamarkaður áfram í algerri kyrrstöðu
Samantekt
Samkvæmt tölum Þjóðskrár hækkaði fasteignaverð á höfuðborgarsvæðinu um 0,1% milli júní og júlí. Verð á fjölbýli lækkaði um 0,2% og verð á sérbýli hækkaði um 1,1%. Horft yfir 12 mánaða tímabil hefur verð á fjölbýli hækkað um 3,1% og verð á sérbýli um 2,1%. Vegin árshækkun húsnæðisverðs nemur nú 2,9%, sem er 0,3 prósentustiga lækkun frá fyrri mánuði.
Árshækkun íbúðarhúsnæðis hefur ekki verið lægri síðan í apríl 2011. Í júlí í fyrra var árshækkunin 5,2% og 19% í júlí 2017. Markaðurinn er því orðinn mjög rólegur í sögulegu samhengi.
Vísitala neysluverðs án húsnæðis lækkaði um 0,4% milli mánaða í júlí og hækkaði um 2,8% á einu ári, eða nokkuð minna en fasteignaverð á sömu 12 mánuðum. Raunverð fasteigna hækkaði því lítillega milli mánaða, sérstaklega raunverð sérbýlis. Horft yfir lengra tímabil hefur hófleg hækkun fasteignaverðs síðustu mánuði náð að halda nokkurn veginn í við þróun verðbólgunnar án húsnæðiskostnaðar. Því hefur raunverð íbúðarhúsnæðis verið nokkuð stöðugt. Raunverð fór hæst í október 2007 fyrir hrun en lækkaði svo mikið. Það náði aftur sama stigi í apríl 2017 og hefur síðan hækkað um tæp 10%.
Árshækkun raunverðs er orðin hóflegri en áður. Þannig var raunverð fasteigna nú í júlí um 0,1% hærra en í júní 2018. Hækkun raunverðs síðustu 12 mánuði er mun minni en árin tvö þar á undan. Samsvarandi tölur voru 3,7% fyrir júní 2018 og 22,8% fyrir júní 2017.
Viðskipti með íbúðarhúsnæði á höfuðborgarsvæðinu í júlí voru þau mestu frá því í janúar. Fjöldi viðskipta fyrstu sjö mánuði ársins 2019 var um 4% minni og á sama tíma fyrir ári og fjöldi viðskipta í júlí í ár var um 5% lægri en í júlí 2018. Fasteignamarkaðurinn hefur því gefið töluvert eftir hvað fjölda viðskipta varðar. Meðalfjöldi viðskipta á fyrstu sjö mánuðum ársins er hins vegar um 6% minni en var á öllu árinu 2018.
Gott sumar hefur ekki farið vel í fasteignamarkaðinn á höfuðborgarsvæðinu. Verð er mjög stöðugt og viðskipti með minnsta móti. Hagfræðideild var á sínum tíma á því að aukið framboð nýrra íbúða, sem að jafnaði eru með hærra fermetraverð, myndi leiða áframhaldandi verðhækkanir á markaðnum. Svo virðist ekki vera, frekar má segja að aukið framboð íbúða haldi aftur af verðhækkunum.
Mikil óvissa í efnahagslífinu dró eflaust úr fasteignaviðskiptum fyrstu mánuði ársins. Þar má bæði nefna óvissu vegna kjarasamninga og áfallið sem hagkerfið varð fyrir í kjölfar gjaldþrots WOW air.
Allt kann þetta að hafa leitt til biðstöðu á markaðnum. Fólk vildi mögulega sjá framtíðina betur fyrir sér áður en stórar ákvarðanir væru teknar.
Vísitala fyrirhugaðra stórkaupa hækkaði örlítið á öðrum ársfjórðungi og var það helst vegna aukningar á fyrirhuguðum húsnæðiskaupum, en vísitalan hefur ekki mælst hærri síðan í september 2007. Nýjustu tölur af fasteignamarkaði sýna að enn er nokkuð í land með að þær væntingar rætist. Mögulega eru margir að bíða eftir skýrum og jákvæðum skilaboðum frá stjórnvöldum varðandi yfirlýsingar um húsnæðismál sem gefnar voru í tengslum við kjarasamningana í vetur.
Lesa Hagsjána í heild
![Gönguleið](https://images.prismic.io/landsbankinn/33cdc5f2-10ba-4d29-a88e-3db117f83c02_Gullfoss-gonguleid.jpg?fit=max&w=3840&&q=50)
![Fataverslun](https://images.prismic.io/landsbankinn/1da63ef3-f754-4e33-85b0-ae3d774b3971_Fataverslun.jpg?fit=max&w=3840&&q=50)
![](https://images.prismic.io/landsbankinn/a923b976-0b6c-45a6-b7b7-b7efbe46320a_Landsbankinn_Irma_Abstrakt_016.jpg?fit=max&w=3840&rect=397,396,745,559&q=50)
![](https://images.prismic.io/landsbankinn/028a0757-28f9-4183-b615-499104716808_Landsbankinn_Irma_Abstrakt_018.jpg?fit=max&w=3840&rect=0,140,1168,876&q=50)
![Litríkir bolir á fataslá](https://images.prismic.io/landsbankinn/0715ffd5-f0a2-446e-bbf1-561d88cd1730_Fataverslun-bolir-varasamt-kortagengi.jpg?fit=max&w=3840&rect=240,0,1440,1080&q=50)
![Flugvél á flugvelli](https://images.prismic.io/landsbankinn/c68d10e5-e50c-4447-8778-bd06a35cab8f_Jet-Brussels-iStock-1161966623.jpg?fit=max&w=3840&rect=1119,770,2455,1841&q=50)
![](https://images.prismic.io/landsbankinn/2fffc01a-44b7-44ee-bdc1-b8bd2c29c1ea_5.jpg?fit=max&w=3840&rect=55,0,1708,1281&q=50)
![Bílar](https://images.prismic.io/landsbankinn/135415c5-fb94-4d8d-8130-b0c165cf7c82_LB_Brimborg_Festi_V4A9178_1920.jpg?fit=max&w=3840&rect=94,295,1305,979&q=50)
![Paprika](https://images.prismic.io/landsbankinn/a06f0e51-f8d7-4614-95bf-d3f9a1b06eba_Paprika-iStock-518590344-2020.jpg?fit=max&w=3840&rect=210,0,1600,1200&q=50)
![Fjölbýlishús](https://images.prismic.io/landsbankinn/d1432608-ac46-49b6-b68a-6f93b661de51_Fjolbylishus-nylegt.jpg?fit=max&w=3840&rect=371,405,853,640&q=50)