Hagsjá: Áfram kröftugur vinnumarkaður
Samantekt
Samkvæmt tölum Hagstofu Íslands voru tæplega 202 þúsund manns starfandi á íslenskum vinnumarkaði í júlí sem er svipaður fjöldi og í júlí í fyrra. Starfandi fólki hefur fjölgað um rúmlega 2 þúsund frá því í júlí 2016. Sé litið á 12 mánaða hlaupandi meðaltal fjölgaði starfandi fólki um u.þ.b. 6.300 milli júlí 2016 og júlí 2017, eða um 3,4%. Vegna árstíðasveiflunnar sem jafnan kemur fram í tölum Hagstofunnar ætti sú tala að gefa betri mynd af þróuninni á vinnumarkaðnum.
Vinnumarkaðskönnun Hagstofunnar í júlí byggir á svörum frá 789 einstaklingum, eða um 0,4% af fjölda fólks á vinnumarkaði, þannig að skekkjumörk niðurstaðna eru töluverð.
Atvinnuþátttaka er ennþá mjög mikil í sögulegu samhengi og var rúmlega 83% af heildarfjölda virks vinnuafls nú í júlí, sem er þó lægra hlutfall en í maí og júní.
Samkvæmt mælingum Hagstofunnar var atvinnuleysi 1% í júlí sem er lægsta mæling frá því Hagstofan hóf mælingar 2003. Árstíðasveifla í tölum Hagstofunnar er jafnan mikil og vikmörk 1% atvinnuleysis eru 0,8 stig í báðar áttir. Meðalatvinnuleysi síðustu 12 mánaða var 2,8% í júlí sem er lægsta tala frá því í nóvember 2008. Skráð atvinnuleysi samkvæmt tölum Vinnumálastofnunar var 1,8% í júlí og 2,2% að meðaltali síðustu 12 mánuði. Tölur Vinnumálastofnunar sýna fjölda þeirra sem eiga rétt á atvinnuleysisbótum en tölur Hagstofunnar byggja á mati þátttakenda á eigin stöðu í Vinnumarkaðskönnunum. Síðustu ár hefur atvinnuleysi minnkað jafnt og þétt, en verulega hefur hægt á þeirri þróun.
Vinnutími hefur haldist nokkuð óbreyttur síðustu mánuði, samkvæmt tölum Hagstofunnar. Það þýðir að fjölgun vinnustunda skýrist fyrst og fremst af fjölgun þeirra sem starfa.
Í því þensluástandi sem nú ríkir er fjölgunin á íslenskum vinnumarkaði aðallega knúin áfram af erlendu vinnuafli. Á 2. ársfjórðungi 2017 voru erlendir ríkisborgarar hér á landi um 35.500, eða um 10% af þjóðinni, og hafði fjölgað um 5.600, eða 19%, á einu ári. Á fjórðungnum var fjöldi aðfluttra erlendra ríkisborgara umfram brottflutta 3.130 manns, þar af voru þrír af hverjum fjórum á aldrinum 20-39 ára. Á sama tímabili fjölgaði þjóðinni allri um 2,4% og þar af innlendum ríkisborgurum um 0,8%.
