Erfitt ár á hlutabréfamörkuðum að baki

Verð á hlutabréfum lækkaði almennt séð í desember sé litið til helstu markaða viðskiptalanda Íslands. Lækkunin hér á landi var 2,6% sem er svipað og var að meðaltali í viðskiptalöndunum.

6. janúar 2023

Íslenski markaðurinn lækkaði um 16,8% á síðasta ári sem er mesta lækkun síðan í hruninu. Síðasta ár var erfitt á hlutabréfamörkuðum en flestir þeirra lækkuðu yfir árið. Mikil verðbólga, hækkandi vextir og dekkri efnahagshorfur í heimshagkerfinu hafa dregið úr væntingum fjárfesta.

Mesta lækkun á vísitölunni hér á landi síðan í hruninu

Vísitala Aðallista Kauphallarinnar lækkaði um 2,6% í desember og kom sú lækkun í kjölfar 0,4% lækkunar í nóvember. Vísitalan lækkaði um 16,8% á síðasta ári og var það versta ávöxtun hennar síðan á árinu 2008, en þá lækkaði vísitalan um 90% enda urðu hlutabréf viðskiptabankanna þriggja, sem voru fyrir hrunið langstærstu félögin að markaðsvirði, verðlaus vegna gjaldþrots þeirra. Sé litið til síðasta árs hækkaði vísitalan einungis yfir 3 mánuði og lækkaði hina 9 mánuðina. Mesta lækkunin var í maí þegar vísitalan lækkaði um tæp 10% en þar á eftir kom lækkunin í september sem var 8,3%. Mesta hækkunin var í júlí eða 7% en næstmest í október eða 5,2%. Verðþróunin hér á landi stýrðist að miklu leyti af verðþróuninni erlendis; markaðurinn hér á landi hækkaði þegar verðhækkanir urðu erlendis, og að sama skapi lækkaði hann hér þegar hann gerði það úti. Viðbúið er að verðþróunin hér á landi verði áfram fyrir miklum áhrifum af verðþróun á öðrum hlutabréfamörkuðum á þessu ári.

Alvotech kom inn á Aðallistann í desember með hvelli

Alvotech kom nýtt inn á Aðallistann í desember og gerði það með miklum hvelli en félagið hækkaði um 68% í mánuðinum, sem var langmesta hækkunin hjá félögunum á Aðallistanum, sem nú eru orðin 23 talsins. Næstmest hækkaði Origo, um 15,8%, en þar á eftir kom Nova Klúbburinn með 9,1% hækkun. Alls hækkuðu 5 félög á Aðallistanum í desember en mikill meirihluti þeirra lækkaði í verði, alls 16 fyrirtæki. Verð á tveimur félögum stóð í stað, fjarskiptafélögunum Símanum og Sýn. Bréf Marels lækkuðu mest í desember, um 10,9%. Bréf Iceland Seafood lækkuðu næstmest, um 9,7%, og þar á eftir bréf Icelandair Group, um 8,4%.

Iceland Seafood lækkaði mest yfir árið

Af þeim 20 félögum á Aðallistanum sem komu ekki ný inn á markaðinn á árinu var besta ávöxtunin hjá Origo yfir árið í heild. Félagið hækkaði um 37,5%. Þar á eftir komu útgerðarfyrirtækin á Aðallistanum: Síldarvinnslan og Brim. Síldarvinnslan hækkaði um 19,8% og Brim um 16%. Meirihluti fyrirtækjanna, 14 af 20, lækkaði þó yfir árið. Mest lækkaði Iceland Seafood, um 59,1%, en þar á eftir kom Marel með 43,9% lækkun. Þriðja mesta lækkunin var í Kviku banka, 29,1%.

Ekki meiri lækkun á bandaríska hlutabréfamarkaðnum síðan í alþjóðlegu fjármálakreppunni

Langflestir hlutabréfamarkaðir erlendis lækkuðu á árinu en jafn almennar lækkanir hafa ekki sést síðan 2018. Þar áður þurfti að fara aftur til ársins 2011 til að finna viðlíka lækkanir. Bandaríski markaðurinn lækkaði um 19,4% á árinu og var það mesta lækkun hans síðan í Alþjóðlegu fjármálakreppunni 2008/2009 og á þetta við um fleiri markaði, til dæmis þann íslenska, hollenska, sænska og svissneska. Mestu lækkanir í fyrra voru á mörkuðum eins og þeim rússneska (-39,2%), þýska (-25,6%) og sænska (-24,6%). Hlutabréfamarkaðir á evrusvæðinu lækkuðu um 14,4% og um 20,5% í löndum Evrópusambandsins.

Fyrirvari

Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara.

Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.

Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.

Þú gætir einnig haft áhuga á

25. sept. 2023

Vikubyrjun 25. september 2023

Vísitala íbúðaverðs á höfuðborgarsvæðinu hækkaði um 0,7% milli mánaða í ágúst, samkvæmt gögnum sem HMS birti í síðustu viku. Vísitalan lækkaði þó nokkuð í júní og júlí og hækkunin kom því nokkuð á óvart. Í næstu viku ber hæst birting Hagstofunnar á vísitölu neysluverðs á fimmtudag.

20. sept. 2023

Vísitala íbúðaverðs hækkar lítillega og verðbólguspáin með

Vísitala íbúðaverðs hækkaði um 0,7% milli mánaða í ágúst. Árshækkun vísitölunnar fór úr 0,8% í 2,0%. Undirritaðir kaupsamningar á höfuðborgarsvæðinu voru 9,6% færri í júlí en í sama mánuði í fyrra. Vísitalan er hærri en við gerðum ráð fyrir við gerð verðbólguspár fyrir septembermánuð og því færum við hana upp og spáum 7,8% ársverðbólgu í stað 7,7%.

18. sept. 2023

Aukinn þjónustuútflutningur skýrist allur af vexti ferðaþjónustu

Um 282 þúsund erlendir ferðamenn fóru um Keflavíkurflugvöll í ágúst. Ef sumarmánuðirnir eru teknir saman hafa aðeins einu sinni komið fleiri ferðamenn að sumri, árið 2018. Samkvæmt nýjustu þjóðhagsreikningum Hagstofunnar jókst þjónustuútflutningur á fyrstu tveimur fjórðungum ársins um 21%, og má rekja allan þann vöxt til ferðaþjónustunnar.

18. sept. 2023

Vikubyrjun 18. september 2023

Í síðustu viku komu tölur um brottfarir frá Leifsstöð, skráð atvinnuleysi og veltu greiðslukorta. Í þessari viku ber hæst vísitala íbúðaverðs, sem kemur á þriðjudag, og yfirlýsing fjármálastöðugleikanefndar Seðlabanka Íslands, sem gefin verður út á miðvikudaginn.

15. sept. 2023

Frekari merki um hægari takt

Nýjar kortaveltutölur bera með sér frekari vísbendingar um að verulega sé að hægja á innlendri eftirspurn. Heildarkortavelta íslenskra heimila dróst saman um 3,4% milli ára í ágúst. Kortavelta Íslendinga innanlands var 4,3% minni en í ágúst í fyrra á föstu verðlagi og hefur nú dregist saman sex mánuði í röð. Erlendis jókst kortavelta Íslendinga um 0,7% á milli ára og kortaveltujöfnuður er jákvæður um 19,2 milljarða.

14. sept. 2023

Spáum 7,7% verðbólgu í september

Við spáum því að vísitala neysluverðs hækki um 0,07% milli mánaða í september og að ársverðbólga standi í stað og verði áfram 7,7%. Útsölulok hafa aftur mest áhrif til hækkunar milli mánaða í september samkvæmt spánni. Það sem helst dregur spána niður er árstíðabundin lækkun á flugfargjöldum til útlanda. Við gerum ráð fyrir að verðbólga lækki áfram næstu mánuði og verði 6,6% í desember.

11. sept. 2023

Vikubyrjun 11. september 2023

Í síðustu viku birti Seðlabankinn fundargerð peningastefnunefndar. Samkvæmt henni greiddi einn nefndarmaður atkvæði gegn tillögu seðlabankastjóra um að hækka vexti um 0,50 prósentustig á síðasta fundi nefndarinnar og hefði heldur kosið að hækka þá um 0,25 prósentustig. Í þessari viku berast gögn yfir fjölda brottfara um Leifsstöð, skráð atvinnuleysi og kortaveltu.

4. sept. 2023

Mánaðaryfirlit yfir sértryggð skuldabréf - ágúst 2023

Meðfylgjandi er mánaðarlegt yfirlit um sértryggð skuldabréf.

4. sept. 2023

Vikubyrjun 4. september 2023

Verðbólga jókst úr 7,6% í 7,7% samkvæmt ágústmælingu Hagstofunnar. Hagvöxtur mældist 4,5% á öðrum ársfjórðungi samkvæmt nýjum þjóðhagsreikningum sem Hagstofan birti í vikunni, en hagvöxtur á fyrsta ársfjórðungi mældist 7,1%. Minni vöxtur einkaneyslu skýrir að stórum hluta minni hagvöxt á öðrum ársfjórðungi.

31. ágúst 2023

Hægir á hagvexti og einkaneysla á mann dregst saman

Hagvöxtur mældist 4,5% á öðrum ársfjórðungi, samkvæmt fyrsta mati Hagstofunnar. Eins og við var að búast benda tölurnar til þess að hægt hafi á hagkerfinu, en hagvöxtur mældist 7,1% á fyrsta ársfjórðungi. Vaxtahækkanir hafa tekið að tempra innlenda eftirspurn á sama tíma og hægt hefur á vexti kaupmáttar á síðustu misserum. Einkaneysla jókst örlítið en vegna hraðrar fólksfjölgunar dróst hún saman á mann.