Annað metár í ferðaþjónustu í uppsiglingu?
Hóflegur vöxtur næstu ár
Ferðamönnum fjölgaði hratt eftir heimsfaraldurinn og hefur vöxtur greinarinnar síðustu ár verið töluverður á meðan hún var að ná sér aftur á strik. Síðasta ár var metár í ferðaþjónustunni á flesta mælikvarða, þó ekki hafi verið slegið met í fjölda ferðamanna. Met var slegið í erlendri kortaveltu á föstu gengi og í fjölda gistinótta sem skilaði sér í því að hlutur ferðaþjónustunnar af landsframleiðslu hefur aldrei verið stærri en í fyrra, eða um 8,8%, samkvæmt nýlegum ferðaþjónustureikningum Hagstofunnar. Til samanburðar var hlutur ferðaþjónustunnar af landsframleiðslu um 8,1% árið 2018, fjölmennasta ferðmannaári frá upphafi. Í nýrri hagspá gerum við ráð fyrir að fjöldi ferðamanna í ár jafni metið frá 2018 og verði um 2,3 milljónir. Við gerum einnig ráð fyrir að greinin skili meiri útflutningsverðmætum en á síðasta ári og þar með mestu verðmætum frá upphafi.
Árið fer ágætlega af stað
Undir lok síðasta árs og í byrjun þessa árs fækkaði gistinóttum erlendra ferðamanna frá því í fyrra og tölur um kortaveltu bentu til þess að ferðamenn hafi eytt minna. Nýbirtar tölur Hagstofunnar um veltu samkvæmt virðisaukaskattsskýrslum sýna að í nóvember og desember í fyrra, þegar jarðhræringarnar á Reykjanesskaga fóru af stað af krafti, dróst velta í ferðaþjónustutengdum greinum saman um tæplega 5% á milli ára en í janúar og febrúar jókst veltan svo aftur um tæplega 5% á milli ára á föstu verðlagi.
Fyrsti fjórðungur í ár kom ágætlega út þar sem kortavelta mældist örlítið meiri en í fyrra á föstu gengi, þrátt fyrir að gistinætur voru örlítið færri en á sama tíma í fyrra. Fjöldi ferðamanna sem hingað hefur komið á fyrsta fjórðungi þessa árs mælist þó 10% meiri en á sama tíma í fyrra. Hver ferðamaður virðist því vera að eyða minna og gista skemur, en þrátt fyrir það mælist vöxtur í greininni. Áhrif jarðhræringanna á ferðaþjónustuna virðast því ekki vera mikil, þó einhverra áhrifa hafi mögulega gætt þegar þær hófust fyrst undir lok síðasta árs.
Annað metár í uppsiglingu?
Gangi spá okkar eftir verða ferðamenn um það bil jafnmargir á þessu ári og þeir voru á metárinu 2018, um 2,3 milljónir, eða ríflega 3% fleiri en í fyrra. Sætaframboð íslensku flugfélaganna í ferðum til landsins yfir sumarið bendir til þess að gera megi ráð fyrir góðu ferðasumri. Það voru um 2% fleiri hótelherbergi í boði á landinu í mars á þessu ári en í mars í fyrra, samkvæmt talningu Hagstofunnar, sem bendir sömuleiðis til þess að greinin sé að vaxa. Í heild gerum ráð fyrir að útflutningsverðmæti greinarinnar aukist á milli ára, sem þýðir að árið í ár verði stærsta ferðaþjónustuárið hingað til. Við teljum að ferðaþjónustan haldi svo áfram að vaxa hægt og rólega næstu ár á eftir, að ferðamenn verði 2,4 milljónir árið 2025 og 2,5 milljónir árið 2026.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
